J. Edgar (2011)

 அரசதுறை அதிகாரியொருவர் தனது டிபார்ட்மென்டில் புது ஆட்களை எடுப்பதற்காக 3 இளைஞர்களிடம் நேர்காணல் போல கேள்விகளைக் கேட்கிறார்..

"20ம் நூற்றாண்டின் மிகப் பிரபலமான நபர் யார்?"
1வது இளைஞன் - "ஜோன் மெக்கார்த்தி"
"மெக்கார்த்தி ஒரு சந்தர்ப்பவாதி, தேசாபிமானி அல்ல!"
அடுத்த நபரிடமும் இதே கேள்வி,
2வது இளைஞன் - "நீங்கதான் சார்.."
*உதடுவழி எட்டிப்பார்க்கும் புன்முறுவலை அடக்கிக் கொண்டு இருமுகிறார்.*
3வது இளைஞன் - "அவர் என்ன துறையைச் சேர்ந்தவர் என தெரிந்து கொள்ளலாமா?"
"அவரது துறை மேகங்களினிடையே..."
3வது இளைஞன் - "சார்ல்ஸ் லின்ட்பேர்க்"
*சிறிய புன்னகையுடன் 'ஆம்' எனத் தலையசைக்கிறார்*

என்னிடம் இதே கேள்வியைக் கேட்டிருந்தால், "ஐன்ஸ்டைன்" என்றுதான் பதிலளித்திருப்பேன்.. ஆனால் இந்த நேர்காணல் நடந்த நேரத்தில் ஐன்ஸ்டைன் அவ்வளவு பிரபலமாக இருந்திருக்க முடியாது (2ம் உலகப் போர் காரணமாக) என்பதைக் கருத்தில் கொள்ளவும்..
அது சரி, இவர்கள் இவ்வளவு பிரபலமாக நினைக்கும் இந்த லின்ட்பேர்க் எனும் 2 வயதுக் குழந்தையைப் பற்றி நீங்களும் என்னைப் போலவே அறிந்திருக்காவிட்டால், உலக (அல்லது குறிப்பாக அமெரிக்காவின்) வரலாற்றின் முக்கியமான ஒரு கட்டத்தை நாம் ஸ்கிப் செய்து வந்திருக்கிறோம் என்பதையே அது எடுத்துக்காட்டுகிறது..

கடத்தலை அதிகாரபூர்வமாக தண்டனைக்குரிய குற்றமாக்கிய முதல் நாடு அமெரிக்கா என்பது உங்களுக்கு தெரிந்திருக்கலாம். அதற்கு அவசியம் ஏற்பட வைத்திருந்த நிகழ்வு இந்தப் பச்சிளம் பிள்ளையின் கொலைச் சம்பவம்.. "யேசு கிறிஸ்துவின் மீள்எழுச்சிக்கு அடுத்து மிகப்பெரிய நிகழ்வு" எனவும் "நூற்றாண்டின் குற்றம்" எனவும் வர்ணிக்கப் பட்ட நிகழ்வு இது என்றால் பார்த்துக்கோங்களேன்!!
மனதை உருகவைக்கும் இந்த வரலாற்றை விக்கியில் சென்று படித்துக் கொள்ளும் படி கேட்டுக் கொள்கிறேன்..

மேலே குறிப்பிட்ட டிபார்ட்மென்ட் Federal Bureau of Investigation. குறிப்பிடப்பட்ட அதிகாரி அந்த டிபார்ட்மென்டையே உருவாக்கித் தந்த ஜோன் எட்கார் ஹுவர். 40 வருடங்களுக்கும் மேலாக, 6 வேறு அமெரிக்க ஜனாதிபதிகளின் காலகட்டங்களில் சட்டத்துறையின் அசைக்கமுடியாத தனிப்பெருஞ் சக்தியாக திகழ்ந்த நபர்.
இவரது மலைக்கவைக்கும் பிம்பமெனும் வெளிச்சத்தின் பின்னால் முடிய கதவுகளுக்கிடையில் மறைந்து கிடக்கும் இருண்ட உண்மைகளைப் பற்றியதே இந்தப் படம்..

இவரைப் பத்தி ஏற்கெனவே சிறிதாக Public Enemies பதிவில் பார்த்தோம். ஹுவரோட உண்மைகள், FBIயின் ஆரம்பகால கேஸ் ஃபைல்கள் எல்லாம் (ஹுவரின் கட்டளையின் பேரில்?) அழிக்கப்பட்டு விட்டதால், அங்கங்கு கிடைத்த தகவல்களின் பிரகாரமே இந்தப் படம் எடுக்கப்பட்டிருக்கிறது. (உண்மைகள் சிக்கியிருந்தால் டாகுமென்டரிப் படமாக எடுத்திருக்க முடியும்.)
லின்ட்பேர்க் கொலைவழக்கில் குற்றவாளி ஹொப்கின்ஸை ஹுவர் கைது செய்யவில்லை என்பது தொடக்கம் அவர் ஓரினச் சேர்க்கையாளர் என்பது வரை படத்தில் காட்டப்படும் தகவல்கள் பலவும் அவரது வாழ்க்கை வரலாற்றுக்கு முரணானதாகவே காட்டப்படுவதால், பார்த்துக் கொண்டிருக்கும் போதே "நம்பலாமா? நம்பப்படாதா?" கேள்விகள் வந்து கொண்டிருக்கின்றன..
லின்ட்பேர்க் சம்பவம் மட்டுமன்றி டிலிங்கரின் கேஸ், கென்னடியின் கொலை போல பல சமகால வரலாற்றுச் சம்பவங்களுன் படம் பயணிக்கிறது..

லியனார்டோ டிகாப்ரியோவின் நடிப்பைப் பற்றிச் சொல்ல வார்த்தைகளே இல்லை. பேசும் டோன் தொடக்கம் ஹுவரின் மேனரிசங்கள் வரை ஊறுகாய் போலத் தொட்டு விளையாடுகிறார்.. கையைக் காலைத்தூக்கி அசைக்காமல் நடப்பதும், பேசுவதுமே பிரதான வேலையாக உள்ளவொரு பாத்திரத்துக்கு டிகாப்ரியோ பொருந்தவே மாட்டாரெனக் கூறிய அனைவருக்கும் முகத்திலேயே ஒரு பதிலடி!! முகத்தில் பிளாஸ்டிக் சர்ஜரி செய்த மாதிரிக் காட்டும் அந்த மேக்கப்பைத் தூக்கிவிட்டால் கிழட்டு ஹுவரையும் இன்னும் முழுமையாக ரசித்திருக்க முடியும்.. கடைசி 30 நிமிடங்களும் டிகாப்ரியோ ரசிகர்களுக்கு (என்னையும் சேர்த்துதாம்பா!) நடிப்பிலேயே தீனி போட்டிருக்கிறார்!
இதுல என்ன பிழையை கண்டுபிடிச்சு, ஆஸ்கர் கொடுக்காம வுட்டானுங்களோ??

படத்தோட டிம்-லைட்டிங்.. வெளியிடங்களுக்கு செல்லும் சீன்களில் பழைய, ராயலான ஃபீலைக் கொடுப்பதற்கு நன்றாக உதவுகிறது... ஆனால் ரூமுக்குள் இருக்கும் சீன்களிலெல்லாம் எரிச்சல்தான் மிஞ்சுகிறது!
படத்தை இயக்கியிருப்பது Millian Dollar Baby-ஐ இயக்கி நடித்த "க்ளின்ட் ஈஸ்ட்வுட்". படத்தோட பிரதான கதாப்பாத்திரம் என்பதால் ஹுவரை ஹீரோ மாதிரியோ, வில்லன் மாதிரியோ காட்டாமல் முன்கோபக்காரனாக, தற்பெருமைக்காரனாக, சிறிது சுயநலக்காரனாக... மொத்தத்தில் ஹுவராகவே காட்டியிருப்பது இவரது பிளஸ்.. மீதியெல்லாம் சுமார் ரகம்தான்..

படத்தில் அழுத்தமான சீன்கள் குறைவு என்பதால் சிலவேளைகளில் சுவாரஸ்யம் குறைவதற்கு நான் கியாரண்டி.. மைனஸ்கள் இருந்தாலும் வரலாற்றை அறிந்து கொள்வதற்காக, டிகாப்ரியோவுக்காக, எனக்காக இந்தப் படத்தை பார்க்க மாட்டீர்களா என்ன?..

ரேட்டிங்ஸ்,
நடிப்பு = 17
இசை = 12
கதை+திரைக்கதை = 13
கலை+ஒளிப்பதிவு =10
இயக்கம் = 14

மொத்தம் = 66% நன்று!