Upstream Color (2013)

Shane Carruth ஐ ஞாபகம் இருக்கிறதா? 7000 டாலர் மினி பட்ஜெட்டில் சயின்ஸ் ஃபிக்ஷனையே ஒரு கலக்கு கலக்கியவர்... தலைமுடியைப் பிய்த்துக்கொள்ள வைக்கும் இவரது முதல் முழுநீளத் திரைப்படமான பிரைமர் பற்றி ஏற்கெனவே ஒரு விளக்கத் தொடராக எழுதியது தொடர்ந்து இங்கு வரும் நண்பர்களுக்கு நினைவிருக்கலாம்.
அதைத் தொடர்ந்து இவரது அடுத்த படம் எப்போ வரும் என்று எதிர்பார்த்து காத்துக் கொண்டேயிருந்தேன். வந்ததும் (போன வருஷம் ஆகஸ்ட் போல..) டவுண்லோடும் பண்ணிவிட்டேன். முழு எதிர்பார்ப்புடன் இருந்து படத்தைப் பார்த்தா தலையும் புரியவில்லை, காலும் புரியவில்லை. பாதிக்கு மேல் படத்தை பார்க்கவே முடியவில்லை.. இத்தனைக்கும் படம் வெறும் 86 நிமிடங்கள் தான்..


என் நண்பன் ஒருவன் மகா மட்டமான படமாக இருந்தாலும் பார்க்கத் தொடங்கினால், கட்டாயம் பார்த்து முடிக்காமல் விடமாட்டான். அவனுக்கே இந்தப் படம் முழுசாக பார்த்து முடிப்பதற்கு 2 நாட்கள் தேவைப்பட்டது. படம் பார்த்தும் 'இது படமா? இல்லை டாகுமென்டரியா?' என்ற சந்தேகத்துடனேயே இருந்தான்..)

எப்படியும் Shane Carruth மீதிருந்த அபரிமிதமான நம்பிக்கையால் (இவரு எடுத்த படம் கண்டிப்பா வெத்து டப்பாவாக இருக்க முடியாது....) படத்தை பார்த்தேயாக வேண்டும் என்று பல தடவைகள் தொடர்ச்சியாக ட்ரை பண்ணி தோல்விகளைத் தழுவிக் கொண்டதுதான் மிச்சம்.
ஒரு கதையென்றால் சம்பவங்களின் கோர்வையாகத் தானே இருக்க வேண்டும். இங்கு முழுப் படமுமே வெறும் காட்சிகளின் கோர்வையாக இருக்கிறது.  எப்பவாவது ஒரு சம்பவம் நடந்து படத்தை சுவாரஸ்யத்தோடு ஃபாலோ செய்தால் வெகு சில வினாடிகளிலேயே சுவாரஸ்யம் காற்றில் கரைந்துவிடுகிறது.
நேற்று வேறு வேலையே இல்லை என்ற நிர்ப்பந்தத்தில்(!?) மீண்டும் படத்தை முதலிலிருந்து துவக்கினேன். ஆரம்பத்தில் கடந்த பார்வைகளின் போது தோன்றிய அதே கொட்டாவிகளே ஆக்கிரமித்துக் கொண்டிருந்தபோதும், தட்டுத் தடுமாறி பாதியைத் தாண்டியபின் லேசாக மண்டைக்குள் பொறி தட்டிக்கொண்டிருந்து கடைசியில் 'புரியுது' என்று வாய்விட்டுச் சொல்லும் வேளைக்குள் படம் முடிந்தே விடுகிறது. ஆனால் படம் முடிந்தவுடன் ஒரு ஃபீல் வரும் பாருங்கள்.. வார்த்தைகளால் விபரிக்க முடியாது! படத்தைப் பற்றிய எனது நெகட்டிவ் அபிப்பிராயங்கள் அனைத்தும் முழு பாசிட்டிவாகி விட்டன. எந்த ஸ்லோ திரைக்கதையும், தொடர்ச்சியான காட்சிக் கோர்வைகளும் அலுப்படையச் செய்கிறது என்று நினைத்துக் கொண்டிருந்தேனோ அவை படத்துக்கு அத்தியாவசியமாக இருந்ததை இப்போது உணர்ந்து கொள்ள முடிகிறது.. கிட்டத்தட்ட ஒரு வருஷமா படத்தை டிலீட் பண்ணாமல் ஹார்ட் ட்ரைவிலேயே வைத்திருந்ததற்கு எதிர்பார்த்ததற்கு மேல் பலன் கிடைத்திருக்கிறது!!

"டேய்,  உனக்காவது இந்த படம் புரியுதாடா?"

படத்தின் கதையை முடிந்தளவு spoil பண்ணாமல் சொல்வதானால், கிறிஸ் (Amy Seimetz) எனும் இளம் வயது உத்தியோகம் பார்க்கும் பெண் ஒரு நாள் மர்ம நபர் ஒருவரால் கடத்தபட்டு போதைக்கு அடிமையாக்கப்படுகிறாள். தொடர்ந்து சில மாதங்கள் கிட்டத்தட்ட ஹிப்னாடைஸ் செய்யபட்ட மனநிலையில் அவளை வைத்துக்கொண்டு அவள் மூலமாகவே அவளது மொத்த சொத்தையும் லவட்டிக்கொண்டு சென்றுவிடுகிறான்.  இதில் முக்கியமான விடயமென்றால் போதைக்காக அவளாளல் உட்கொள்ளப்பட்ட குளுசையில் உயிருள்ள வட்டப்புழு இருப்பதே அவளுக்கு தெரியாது. மெல்ல மெல்ல அந்தப் புழு அவள் உடலிலேயே வளர்ந்துவிட்ட தருணத்தில், பன்றிகளை வளர்த்துவரும் விவசாயியொருவன் இவளை சந்தித்து மயக்கப்படுத்தி இவள் உடலில் இருக்கும் புழுவை எடுத்து இயந்திரம் போன்ற ஒரு செட்டப் கொண்டு இளம் பன்றியொன்றின் உடலில் செலுத்துகிறான். தன் வாழ்க்கையில் என்ன நடந்தது, என்ன நடக்கிறது என்றே தெரியாத ஒரு நிலையில் மீதி வாழ்க்கையை கொண்டு செல்ல முனைகிறாள் கிறிஸ். அப்போது தான் Jeff (வேறு யாரு? Shane Carruth தான்.. ) இன் அறிமுகம் இவளுக்கு கிடைக்கின்றது. ஒருவரையொருவர் முன்பு சந்தித்திராத நிலையிலும் தங்களையும் தாண்டிய ஒரு ஈர்ப்பு மற்றையவர் பால் எழுவதை உணர்கிறாரகள்.....
 ஸபா... அவ்வளவுதாள்! போதும்!! நான் எழுதியதை வாசிக்கும் போது எனக்கே ஏதோ த்ரில்லர் படம் போலிருக்கிறது. நீங்கள் தப்பித்தவறிக் கூட அப்படி நினைத்துவிட வேண்டாம்!

'Experimental படம் எடுக்க ஆசைப்பட்டிருக்கலாம். அதற்காக இவ்வளவு Experimentalஆகவா ஒரு படம் எடுக்கிறது?' சரியா சொல்லனும்னா இது படு ஆழமான Thematic Film!! (தமிழாக்கம் ப்ளீஸ்..)
கிட்டத்தட்ட ஒரு (definite?!) ஸ்டோரிலைனை வைத்துக்கொண்டு இந்த genreயின் பார்டர் வரை சென்று விளையாடி வந்திருக்கிறார். 'இந்த மனுஷனா அவ்வளவு மூளைக்கு வேலை கொடுக்கும் திரைக்கதை கட்டமைப்புடன் பிரைமரை எடுத்தார்?' என்று சந்தேகம் கொள்ளவைக்கிறது இந்தப் படம்.. உண்மையைச் சொல்லப் போனால் இரண்டுமே படு complex-ஆன கதைகள். அதை படமாக எடுப்பது சவாலான விடயமென்றால், படத்தை விளங்கிக் கொள்வது அதை விட சவாலானது. கண்டிப்பாக இரண்டுக்குமே மறுபார்வைகள் தேவைப்படும்... பிரைமராவது ஒரு என்ஜினியரிங் மூளைக்கு விளங்கக்கூடும், இது அதையும் தாண்டிப் புதிரானது!! படம் முடிந்ததும் ஒவ்வொருவரும் படத்தை ஒவ்வொருவிதமாக விளங்கிக் கொண்டிருக்கலாம். படத்திற்கான general interpretation என்னவென வினவியபோது இயக்குனர் அளித்த பதில் இதோ :
 about whether we control our identity or whether our identity controls us

இந்தப் படத்துக்கும் ஒரு விளக்கப்பதிவு எழுதலாம்னு ஆசைதான். ஆனால் அந்தளவுக்கு நான் விளங்கிக் கொள்ளவேயில்லை என்பதுதான் உண்மை. இன்னும் 2 தடவையாவது படத்தை முழுமையாக பார்க்க வேண்டுமென்று நினைக்கிறேன். அதைவிட உண்மையில் இந்தப் படத்தை நேரடியாக விளக்கவே முடியாது!! விளக்கமேயில்லாமல் கண்ணை மூடிக்கொண்டு ஒரு படத்தை appreciate பண்ணக் கூடாதுதான். ஆனால் இந்தப் படத்தை என்னவென்று சொல்வது?... பேசாமல் யாராவது புத்திஜீவிகள் பேசத் தொடங்கும் வரை கையைக் கட்டிக்கொண்டு நிற்க வேண்டியதுதான்.. படத்தை பார்த்தவர்கள் மாத்திரம் இங்கே போய் டவுட் ஏதாவது கிளியராகுதா என்று பார்க்கலாம்..

இட்ஸு மி... த வன் மேன் ஆர்மி!!!

Shane Carruth ரெண்டே படத்தில் காட்டியிருக்கும் வளர்ச்சியும், Potential-உம் வியக்க வைக்கிறது!! Wes Anderson, Alfonso Cuaron போன்றோர் வரிசையில் நான் மிகவும் ரசித்துப் பார்க்க கூடிய இயக்குனர்களில் ஒருவராக மாறியிருக்கிறார்.. தொடர்ந்து இன்டிபென்டன்ட் ரிலீசாகவே கொடுத்துக்கொண்டிருக்கும் இவரை கூடிய விரைவில் Mainstream மக்களும், தயாரிப்பாளர்களும் ஏற்றுக் கொள்வார்கள் என்றே நம்புகிறேன்.. அடுத்ததா Modern Ocean என்று ஒரு படம் இயக்குகிறாராம். படத்தைப் பற்றியோ, படத்தின் கதையைப் பற்றியோ மீடியாவுக்கு ஒரு மூச்சுக்கூட விடவில்லை. அதில என்ன genre இவரு கையில் மாட்டிக்கொண்டு படாதபாடு படப்போகிறதோ?..

படத்தில் பங்காற்றிய குழுவைப்பற்றி சொல்லனும்னா போனமுறை போலவே நடிப்பு, எழுத்து, இயக்கம், தயாரிப்பு, எடிட்டிங், இசை எல்லாமே அவர்தான். என்ன.. இந்த முறை எக்ஸ்ட்ராவாக ஒளிப்பதிவுக்கும், electrical department தோள் கொடுத்திருக்கிறார்!! இதைத் தவிர்த்து படத்தின் மிகப்பெரிய பலம் Amy Seimetz. தனக்கு கொடுக்கப்பட்ட கதாப்பாத்திரத்தை இந்தளவுக்கு உள்வாங்கி அழகாக நடிக்கும் இந்த நடிகைக்கு பெரிய வாய்ப்புக்கள் அமையாதது ஏனோ??

படத்தின்  final verdict - ஸ்ட்ரிக்டாக உலக சினிமா ரசிகர்களுக்கு மட்டும். அதிலும் மிகப் பொறுமைசாலிகளாக இருத்தல் நன்று. அதிலும் பாதி பேர் தான் படத்தை முழுமையாக பார்க்கக்கூடும். அதிலும் வெகுசிலருக்கே படம் பிடிக்கக்கூடும். ஆனால் பிடிச்சிருந்தால் இப்படியொரு படம் உங்கள் சினிமா பார்க்கும் அனுபவத்தில் இன்னொரு முறை வருமா என்று உங்களுக்கே டவுட்டாகக்கூடும்.!!

என் ரேட்டிங் - 7/10