The Pirates! (2012)

 ஹாலிவுட்டில் ஸ்டாப்-மோஷன் அனிமேஷன் தொழில்நுட்பத்தை Aardman அளவுக்கு பயன்படுத்திய கம்பெனி வேறெதுவும் இருக்க முடியாது.. Chicken Run, Wallace and Gromit என்று அடுத்தடுத்து சூப்பர்ஹிட் படங்களை கொடுத்தது மட்டுமல்லாமல், தொலைக்காட்சியில் creature comforts,  Shaun the sheep அனிமேஷன் தொடர்களை வெற்றிகரமாக ஓட்டிய பெருமை இதற்கு உண்டு!

 
கடந்த சில வருடங்களாக தனது தனித்துவப் பாணியை கைவிட்டு CG அனிமேஷன் போட்டுக்கொட்டிருந்த இக் கம்பனி, இந்தப் படத்தின் மூலமாக மீண்டும் பழைய ஆயுதத்தையே கையிலெடுத்திருக்கிறது!
அதுவும் கடைசியாக Arthur Christmas படத்தில் கூட்டுச் சேர்ந்திருந்த சோனி அனிமேஷன், இதிலும் கூட்டு சேர்ந்திருக்கிறது..

கதை நடப்பது 1800களில்.. "பைரேட் கேப்டன்"னு தன்னைத்தானே புகழ்ந்து கொள்ளும் ஒரு கடல் கொள்ளைக்காரன். அவனுக்கு கீழே கடல் கொள்ளையில சுத்தமும் அனுபவமில்லாத ஒரு கொள்ளைக்கூட்டம்.. எப்படியாவது தாங்களும் ஒரு பெரிய பைரேட்ஸ்தான்னு வெளியுலகத்துக்கு காட்டனும்னு தவிச்சுக்கிட்டிருக்காங்க.. அதற்கு வசதியாக ஒரு சந்தர்ப்பமும் அமைகிறது!

வருடா வருடம் நடத்தப்படும் "வருடத்தின் சிறந்த கடல் கொள்ளைக்காரன்" போட்டிக்கு தன்னுடைய பெயரையும் இணைத்துக் கொள்கிறார் கேப்டன்! யாரு அதிகளவில் செல்வங்களை கொள்ளையடித்து வருகிறாரோ அவரே போட்டியின் வெற்றியாளன்.. ஏனைய போட்டியாளர்கள் கொண்டுவந்திருக்கும் தங்கங்களையும், வைரங்களையும் பார்த்து அப்படியே வெலவெலத்துப்போகிறார்.. காரணம் இவரு டப்பா காலி!
சரி, இனியாவது அடிச்சு சேர்ப்போமேன்னு முயற்சி செஞ்சா எல்லா அட்டெம்டும் ஃப்ளாப்பு!! அந்தக் கப்பலை அடிச்சு, இந்தக் கப்பலை அடிச்சு.. கடைசியில சார்ள்ஸ் டார்வின் போய்க்கிட்டிருந்த கப்பலையே அடிக்கப் போகிறார்கள்.. கையில காசில்லாமல் இவர்களிடம் மாட்டிக்கிடக்கும் டார்வின், அப்போதான் நம்ம கேப்டனின் தோளிலிருக்கும் செல்லப் பறவையைப் பார்க்கிறார்.. வழக்கமான "பைரேட் கிளி" போலில்லை.. அது ஒரு டோடோ! அதாவது உலகத்தின் கடைசி டோடோ நம்ம கேப்டன் தோளுல தான் உட்கார்ந்திருக்கு!!

டார்வின் உடனே ஒரு ஐடியா சொல்றாரு... பிரிட்டிஷ் அரசால நடாத்தப்படும் "வருடத்தின் தலைசிறந்த விஞ்ஞானி" போட்டிக்கு இந்த டேடோவை எடுத்துகிட்டு போ.. அங்கே நீ ஜெயிச்சா உனக்கு எக்கச்சக்கமான பரிசு கிடைக்கும்.. ஆனா அதுல ஒரு சின்ன சிக்கல்! பிரிட்டிஷ் மகாராணிக்கு கடற்கொள்ளையர்கள்னாலே புடிக்காது!!
அதையும் தாண்டி ரிஸ்க் எடுக்கலாம்னு, அந்த கொள்ளைக் கோஷ்டி விஞ்ஞானிகள் போல வேடமிட்டு போட்டிக்கு புறப்படுதுங்க...
இவங்க ஜெயிச்சாங்களா? மகா ராணி உண்மையை கண்டுபுடிச்சாங்களா? கேப்டனுக்கு வருடத்தின் சிறந்த கடல் கொள்ளைக்காரனாக முடிந்ததா? என்பதை பார்த்தறிக!

படத்தோட கதை "கிடியன் டிஃபோ" என்பவால் எழுதப்பட்டு வரும் 5 பாக 'Pirates! புத்தகத் தொடரின்', முதலிரண்டு பாகங்களோட காம்பினேஷன்.. ஏனைய பாகங்களையும் எடுப்பதற்காக இன்னோரு படமும் எடுக்கப் படலாமாம்!

பெரும்பாலான அனிமேஷன் படங்களைப் போலவே காமெடியை மாத்திரமே நம்பி படத்தை கட்டவிழ்க்கிறார்கள்.. படத்தின் கதைதொய்வில்லாமல் சென்று கொண்டிருந்தாலும் பாத்திரங்கள் எதுவும் மனதில் அழுத்தமாக பதிய மறுக்கின்றன.. விதிவிலக்கு அந்த பிரிட்டிஷ் மகாராணி...கடைசி சீனில் குங்ஃபு ரேஞ்சுக்கு தாவி்த்தாவி சண்டைபோடும் சீன் இருக்கே.. சிரிப்பை அடக்கவே முடியாது!

வழக்கமாக ஸ்டாப்-மோஷன் சீன்களில் (குறிப்பாக Shaun the sheepல்..) பிரச்சனையாக இருப்பது தண்ணீர்தான்.. என்னதான் பார்க்க தண்ணி மாதிரி இருந்தாலும், தெறித்து விழும்போது ஏதோ பசை ஒட்டுற மாதிரி இருக்கும்.. இந்தப் படத்துக்குத்தான் கடலையே காட்ட வேண்டுமே! அதனால் சந்தேகம் வராதமாதிரி CGயில் தண்ணி காட்டியிருக்கிறார்கள்!

பேருக்குத்தான் சோனி இருக்தேவிர, படத்துல அங்களோட பங்களிப்பு எங்க இருக்குன்னே புரியலை.. முழுக்க முழுக்க ஒரு Aardman படம் பார்த்த மாதிரி இருக்கு... சோனி திருப்ப ஃபார்முக்கு வந்தா நல்லது!
அவங்களோட அடுத்த படம் Hotel Transylvania இந்த வருஷத்துல நான் எதிர்பார்க்கும் மூணாவது முக்கிய அனிமேஷன் படம் வேற..
(மற்றையவை நம்ம பிக்சாரின் Braveம், ப்ளூ ஸ்கை Ice Age 4ம் தான்... Madagascar வந்தாலும் போனாலும் எனக்கு கவலையில்லை!) நம்பாவிட்டால் இங்க க்ளிக்கி ட்ரெயிலரை பாருங்க.. அமர்க்களப்படுத்தி வைச்சிருக்காங்க!
(நான் ஏற்கெனவே எதிர்பார்த்திருந்த ஒரு முக்கிய படம் டர்ஸாகிப் போனதாக சேதி! இங்க தியேட்டர்ல இன்னும் வராததால் படம் பார்க்க முடியலை..)

அந்தப்படங்களெல்லாம் ரிலீசாகும் வரையில் அனிமேஷன் வெறியர்கள் இந்தப் படத்தைப் பார்த்து பசியாற்றும் படி இத்தால் கேட்டுக்கொள்ளப்படுகிறீர்கள்!

ரேட்டிங்ஸ்,
பாத்திரங்கள்- 12
அனிமேஷன்-14
பின்னணித் தரவுகள்- 15
கதை+திரைக்கதை- 14
இயக்கம்-15

மொத்தம்- 70% மிக நன்று!!