JZ சினிமா

In Time (2011)

2012-01-23T06:09:00.000-08:00

எதிர்காலம் இப்படித்தான் இருக்கும்-னு தினுசு தினுசா ஒரு தியரியை உருவாக்கி, அதை மையப்படுத்திய ஹாலிவுட் படங்கள் ஒவ்வொரு வருடமும் மினிமம் ஒண்ணாவது வந்துகிட்டேதான் இருக்கும்.. போன வருஷம் அப்படி சோர்ஸ் கோட் ஒண்ணுதான் வந்திச்சுன்னு நெனைச்சேன். "இல்லை... நானும் இருக்கேன்"னு இந்தப் படம் வருட இறுதியில் வெளியாகி அந்த லிஸ்டில் சேர்ந்து கொண்டுள்ளது.

"நேரம் பொன்னானது"ங்கற பழங்காலத்து பழமொழியை, அப்படியே நடைமுறைக்கு கொண்டுவந்துருக்காங்க.. இந்தப்படத்தில்!
கதை என்னான்னு பார்ப்பதற்கு முதலில் கி.பி 2161-ல உலகம் எந்தக் கண்டிஷன்-ல இருக்கும்னு பார்த்துட்டு போவோம்.

பிறக்கும் எல்லா மனிதர்களது கையிலேயும் "பச்சை குத்தின" மாதிரி இப்படி ஒரு டிஜிட்டல் நேரம் காணப்படும். 25 வயசு வரைக்கும் எல்லாரும் சாதாரணமாத்தான் வளருவாங்க.. ஆனா அதுக்கப்புறம் மனிஷங்களுக்கு வளர்ச்சியே இருக்காது.. அவங்க கையில இருக்க நேரத்துல 1 வருஷத்துக்கான கவுன்ட்-டவுன் ஆரம்பிச்சிரும். டைம் மட்டும் முடிஞ்சுதோ.. காப்பாத்தவே முடியாது, பொசுக்குன்னு பரலோகம் போயிட வேண்டியதுதான்!!

இந்த யுகத்துல காசுக்கு பதிலாக நேரம்தான் பயன்படுகிறது என்பதால், எல்லாரும் வேலை செஞ்சு, சம்பளமாக கிடைக்கும் நிமிடங்களையோ, மணித்தியாலங்களையோ இணைச்சுக்கிட்டு ஆயுளை கூட்டிக்குவாங்க.. அன்றாட செலவுகளுக்கு சேமிச்ச டைம்ல இருந்து சில நிமிடங்களை கழிச்சுக்குவாங்க.. டைம் லோன்களை வாங்கி நேரத்தை கூட்டவும் முடியும்.. ஒருத்தரு கையை இன்னொருத்தர் பிடிச்சு வைத்திருப்பதன் மூலமாக நேரத்தை அவருக்கு transmit செய்யவும் முடியும்!

வாழ்க்கைதான் இப்படின்னா, சமூகத்தை வகுப்பதிலும் இந்த நேரம் பெரும் செல்வாக்கு செலுத்துது. நகரங்களுக்கு பதிலாக உலகத்தை 12 Time Zoneகளாக பிரித்து வைத்திருக்கிறார்கள். அல்ப ஆயுசுல போற ஏழைகளெல்லாம் Daytonங்கற நகரத்தில வாழ்ந்து அன்றாட வாழ்க்கைக்கு திண்டாடுகிறார்கள். New Greenwichங்கற நகரத்துல வாழுற பெரிய மனுசங்களெல்லாம் உட்கார்ந்த இடத்துல இருந்தே செஞ்சுரி, செஞ்சுரியா அடிக்கறாங்க!!!

இந்த படத்தோட கதைக்கு சம்பந்தமான ரெண்டு gangஐப் பற்றியும் நாம தெரிஞ்சுக்கனும்..
முதலாவது கேங் Minutemen. டேய்டன் நகருல திரியுற இந்த 4-பேரு கூட்டத்தோட வேலையே மக்களை மிரட்டி நேரத்தை திருடுறது தான். ஆனா இவங்க செய்யும் திருட்டு, சில வேளைகளில் மக்களின் முழு ஆயுட்காலத்தையும் உறிஞ்சிக் கொள்வதால் கொலைகளாகவும் மாறுவதுண்டு! இந்த கேங்கோட தலைவன் பேரு ஃபோர்ட்டிஸ்.

ரெண்டாவது கேங் Timekeepers. பொலிஸ் மாதிரி! இவங்களோட தொழில் நேரத்துடன் தொடர்பான குற்றவாளிகளை கைது செய்து, தண்டனை பெற்றுத் தருவதுதான்.. இந்த க்ரூப்போட தல - ரேமன்ட் லியன்.

இப்போ கதை என்னான்னா, டேய்டன்ல பொறந்த வில் சாலஸ்-ங்கற தொழிற்சாலை தொழிலாளி, Minutemen கேங் கிட்ட இருந்து 105 வயசான ஹமில்டன்-ங்கற பணக்காரரை காப்பாத்துறார்.. ரொம்பவருஷம் வாழ்ந்ததால வாழ்க்கையில ஈடுபாடு குறைந்து போயிருந்த அந்த ஹமில்டன், தன்னோட ஆயுளில் 5 நிமிஷத்தை மாத்திரம் தனக்கென வைச்சுக்கிட்டு, மீதி 116 வருஷத்தையும் தூங்கிக் கொண்டிருந்த வில் சாலஸின் கைக்கு இடம்மாற்றிவிட்டு இறந்து போகிறார்! உண்மையில் என்ன நடந்தது எனத்தெரியாத Timekeepers ஒரு CCTV ரெக்கார்டிங்க்ல, வில் சாலஸையும், இறந்து கிடந்த ஹமில்டனையும் பார்த்துவிட்டு வில்லை கொலையாளியெனக் கருதுகிறார்கள்!!

புதுப் பணக்காரனான வில் சாலஸ் உடனே நியூ க்ரீன்விச் போய் ஹாட்டல் எடுத்து தங்குவதுடன், சூதாட்டம் மூலமாக இன்னும் பல வருடங்களையும் சம்பாதிக்கிறான்.. அந்த சூதாட்டத்தில் வெயிஸ்-ங்கற ஒரு பெரும் பணக்காரரின் அறிமுகம் அவனுக்கு கிடைக்கிறது. இந்த வெயிஸ் டைம்-லோன் கொடுக்கற ஒரு பெரும் தொழிலதிபர். இவர் 1 மில்லியன் வருடத்துக்கான டைம் சார்ஜை பத்திரமாக தனது லாக்கரில் வைத்திருக்கிறாராம்!! அவரது மகளான சில்வியாவும், வில்லும் பேசிப் பழகி, காதலிக்கத் தொடங்குகிறார்கள்.

ஒருநாள் வெயிஸ் நடத்திய பிரம்மாண்டமான பார்ட்டியொன்றில் வைத்து வில்-லை கைது செய்ய Timekeepers வருகிறார்கள். அவர்களை அடித்துவிட்டு வில், சில்வியாவையும் கூட்டிக்கொண்டு தப்பிக்கிறான். டான்யனுக்கு திரும்பும் இருவரும் நேரத்தை அடிப்படையாக கொண்ட பிரிவினையை அழித்து சமத்துவத்தை நிலைநாட்ட உறுதியெடுக்கிறார்கள். இருவராலும் அப்பணியை நிறைவேற்ற முடிந்ததா? இவர்களை துரத்தி வரும் Minutemen, Timekeepers என்னவானார்கள் என்பது மீதிக் கதை..

வித்தியாசமான கான்சப்ட்டுங்கறதால படம் முதல் பாதியில் செம இன்டரஸ்டிங்கா போகுது. பிறகு வரும் திருப்பங்கள் யூகிக்கக் கூடியதா இருக்கதால கொஞ்சம் சறுக்கியும் விழுது! 10 செக்கனை மாத்திரம் கையில வைச்சுக்கிட்டு மீதியெல்லாத்தையும் பிணையாக வைச்சு சூதாடுற சீனும், வி்ல்லும், ஃபோர்ட்டிஸும் handfight விளையாட்டை வைச்சே ஒருத்தர் டைமை ஒருத்தர் உறிஞ்சுற சீனும் பிரமாதம்!
படத்துல உறுத்தக்கூடிய விஷயம் முதல் விஷயம் என்னான்னா எல்லாரும் 25 வயசுக்காரங்க மாதிரி தெரியாமல் இருப்பதுதான். ஆக்சுவலா படத்தோட ஹீரோயின் Amanda Seyfried மட்டுந்தான் முழு நடிகர் குழுவிலயுமே 25 வயசுள்ள ஒரே ஆளாம்! ரெண்டாவது, பெரிய பட்ஜெட் இல்லைங்கறதால வருங்கால உலகத்தை அவ்வளவு டெக்னாலஜிக்கலான ஒன்றாக காட்ட முடியவில்லை போலும்.. கார்கள் கூட பழைய மாடலுக்கு gadget ஃபிக்ஸ் பண்ணாப்ல இருக்கு..

படம் முடிந்தவுடன், "இவ்வளவு கஷ்டப்பட்டு இவனுங்க சேமிச்சுக்கிட்டிருக்கற அந்த நேரத்தை, நாம பயனுள்ள விதத்துலதான் பயன்படுத்துறோமா?"ன்னு நமக்குள்ளேயே எழும் அந்தக் கேள்வி- டைரக்டரோட சக்சஸ்!!

2012 மாதிரி படமெல்லாம் ரிலீஸ் பண்ணி உலகம் "அழியப் போகுதே"ன்னு ஒரு கும்பல் பயமுறுத்துது. ஆனா இவனுங்க காட்டுற மாதிரித் தான் வருங்காலம் இருக்குமோன்னு நினைக்கும் போது அதுக்கு 2012-ஏ தேவலைன்னு தோணுது..

ரேட்டிங்ஸ்,
நடிப்பு = 14
இசை = 11
கதை+திரைக்கதை = 16
கலை+ஒளிப்பதிவு = 14
இயக்கம் = 15

மொத்தம் = 70% நன்று

பி.கு - நண்பர் ஹாலிவுட் ரசிகனும் இந்தப் படத்தை பற்றிய பதிவினை எழுதியிருக்காரு.. படத்தில் ஆர்வமாக உள்ளவர்கள் தவறாது அதையும், இங்கு சென்று படித்து வருமாறு கேட்டுக் கொள்ளப் படுகிறீர்கள்..

ஆஸ்கர் அலசல் - Visual effects

2012-01-16T22:26:00.000-08:00

ஹாய் நண்பர்களே, கடந்த பதிவுல அனிமேஷனுக்கான ஆஸ்கர் விருது பெறும் சாத்தியக்கூறுள்ள படங்கள் எவை-ன்னு பார்த்தோம். இப்போ இந்த வருடத்தில் வெளிவந்த, விஷுவல் எஃபெக்ட்ஸுக்கான ஆஸ்கர் விருதைப் பெறுவதற்கு வாய்ப்புள்ள படங்கள் எவைன்னு மேலோட்டமா பார்த்துட்டு போவோம். அதுக்கு முதல்ல இந்த விருதோட வரலாறு...

ஆஸ்கர் வரலாற்றில் சர்ச்சைகளுக்குட்பட்ட விருதுகளில் இந்த விருதும் உண்டு. இப்ப மாதிரி அந்தக்காலத்துல விஷுவல் எஃபெக்ட்ஸ் அனேகமான படங்களில் உபயோகப்படுத்தவில்லை என்ற காரணத்தால், இந்த பிரிவுக்கு விருது கொடுக்கறதா? வேணாமாங்கற கன்பியூஷனே இருந்திச்சு! இருந்தாலும் Special Effects எனும் பெயரில் விருது 1927ம் ஆண்டு அறிமுகமானது.
முதன்முதல்ல விருது வென்ற படம் "Wings". இந்த விருது 1962ம் ஆண்டு வரைக்கும் நடைமுறையிலிருந்தது.
பிறகு 1963ம் ஆண்டுலேர்ந்து 1971 வரைக்கும் Visual Effects என்ற பெயரில் பிரிவு அமைக்கப்பட்டது. பிறகு இதுவும் இடைநிறுத்தம் செய்யப்பட்டு, 1972ம் ஆண்டு முதல் Special Achievements என்ற பெயரில் விருது வழங்கப்பட்டது. ஆனால் இந்த ஒரு விருதுலயே Visual Effects, Sound Effects, Sound Editting, Animation ஆகிய நான்கு பிரிவுகளும் இணைக்கப்பட்டு இருந்ததால, ஒரு வருஷத்துக்கு ஏதாவது ஒரு பிரிவில் சிறப்பாக செய்த படத்துக்கு மட்டும்தான் விருது கொடுக்க முடியும்-ங்கற சிக்கலான நிலை உருவாச்சு!
இந்த கன்பியூஷன் எல்லாத்துக்கும் முடிவு கட்டுவதற்காக 1977ம் ஆண்டு 4 பிரிவுகளையும் தனித்தனியாக பிரிச்சு, ஒவ்வொண்ணுக்கும் தனி விருது உருவாக்கினாங்க..

இதுதான் குழப்புதுன்னா, இந்த விருது கொடுக்கறதுக்கே பல கண்டிஷன்களைப் போட்டு சிக்கலாக்கியிருக்கிறார்கள்!
Rule no 1. பயன் படுத்தப்பட்ட விஷுவல் எபெக்ட்ஸானது, படத்தோட Overall Production எந்தளவு பங்களிப்பு செய்கிறது என்பது கவனத்தில் கொள்ளப்படும்..
Rule no 2. விஷுவல் எபெக்ட்ஸோட கலையாக்கம், திறன், நம்பகத்தன்மை என்பவையும் கவனத்தில் கொள்ளப்படும்.
ஸோ, என்னதான் அபாரமா புது தொழில்நுட்பங்களைக் கொண்டு விஷுவல் எபெக்ட்ஸ் காட்சிகளை இமைத்திருந்தாலும் படத்தோட கதைக்கு அது மேலதிகமாக அல்லது அநாவசியமாகத் தென்பட்டால் விருது கைநழுவிச் செல்லும்!!
* 2010ல இருந்து கண்டிப்பாக 5 படங்களை நாமினேட் செய்ய வேண்டும் என்ற புது rule-ம் போடப்பட்டிருக்கு..

ஆஸ்கர் வரலாற்றிலேயே தொடர்ச்சியாக 3 தடவை விஷுவல் எஃபெக்ட்ஸ் விருதைக் கைப்பற்றிச் சென்ற படவரிசை Lord of the Rings சீரீஸ்தான்!! (2001-2003). அதற்குப்பிறகு விஷுவல் எஃபெக்ட்ஸில் கலக்கும் என எதிர்பார்க்கப்பட்ட Harry Potter சீரீஸ் 2004லயும், 2010லயும் நாமினேஷன் வரை வந்தது மட்டும் தான்.. விருது கிட்டவில்லை!
Pirates of the Carribean 2003ல் நாமினேட் ஆனதோடு, 2006ல் அதன் 3ம் பாகம் விருது வென்றது! இந்த இரண்டு சீரீஸ்களினதும் அடுத்த பாகங்கள் 2011ல் வெளியானதால் விருதுக்கு பெரும் போட்டி நிலவலாம் எனக் கருதப்பட்டது. சப்பையாகப் போய்க்கொண்டிருந்த Planet of the apes சீரீஸும் மாறுதலான், அட்டகாசமான எபெக்ட்ஸுடன் களத்தில் குதித்ததால் போட்டி கடுமையாக்கப்பட்டது.. இது போதாதென்று பெரும் புகழ்பெற்ற Mission Impossible, X-men, Transformers ஆகிய சீரீஸ்களின் அடுத்த படங்கள் வேறு போட்டியில் இணைந்து கொண்டன.

ஜுலையில் ரிலீசான Captain America- The First Avenger படத்தில் ஒல்லியான ஸ்டீவை கட்டுமஸ்தான ஸ்டீவாக மாற்றிய காட்சி ரசிகர்களை வெகுவாகக் கவர்ந்ததோடு, விஷிவல் எஃபெக்ட்ஸிலும் ஒரு புதிய பரிமாணத்தை உலகுக்கு காட்டியது..
கடைசியாக மார்ட்டீன் ஸ்கோர்ஸீசின் உருவாக்கத்தில் வெளிவந்த Hugo படமானது, குழந்தைகளை மகிழ்விக்கும் படமாக மாத்திரம் நின்று விடாது, "3டி-ன்னா இப்படி இருக்கணும்"னு உரக்கச் சொல்லிச்சென்றுள்ளது. இவ்வளவு படங்கள்லேயும் விருது வெல்வதற்கான அதிகபட்ச சாத்தியக்கூறுள்ள 5 படங்கள் பின்வருமாறு -

5. Pirates of the Carribean - On Stranger tides

5 வருடம் கழித்து வரும் அடுத்த பாகமென்பதால் Vfx-ஐ அள்ளி இறைத்திருக்கிறார்கள்.. பத்து விஷுவல் எஃபெக்ட்ஸ் கம்பனிகளின் உதவியோடு 1,112 CG ஷாட்களை உருவாக்கியிருக்கிறர்கள்!! அந்த கடற்கன்னிகள் காட்சிக்காக மட்டும் 8 மாடல் நடிகைகளும், 22 நீச்சல் வீராங்கனைகளும், motion capture-suit அணிந்த ஸ்டன்ட் பெண்களின் க்ரூப்பும் தேவைப்பட்டருக்கிறதாம்!
விருது வெல்வதற்கான சாத்தியக்கூறு -9%

4. Hugo

3டி-ங்கறது வெறும் பொழுதுபோக்குக்காக அல்ல, அது படத்தினை மெருகேற்றவும், முழுமையாக அனுபவிக்கவுமே சேர்க்கப்படுகிறது என்பதை நிரூபித்திருக்கிறது இந்தப்படம்.. படத்தின் முக்கியமான செட்டான ட்ரெயின் ஸ்டேஷனை உருவாக்க, ஒன்றுக்கும் மேற்பட்ட வெவ்வேறான செட்களில் படம்பிடித்து அதை சந்தேகமே வராத வண்ணம் ஒன்றிணைத்திருக்கிறார்கள்!!
விமர்சனம் படிக்க..
விருது வெல்வதற்கான சாத்தியக்கூறு -19%

3. Transformers - The dark of the Moon

இந்த 5 படங்கள்லேயும் விஷுவல் எஃபெக்ட்ஸுக்காக அதிக பணத்தை விரயப்படுத்திய படம் இதுதான்! இதிலே வரும் Driller எனும் கதாப்பாத்திரம் தான் அனிமேட்டர்களுக்கு பெரும் தலையிடியைக் கொடுத்ததாம். காரணம் 70,000 பகுதிகளை ஒன்றிணைத்துத்தான் செய்ய வேண்டுமாம்.. (Optimus Primeக்கே வெறும் 10,000 பகுதிகள் தான் தேவைப்பட்டது)
அதைவிட முக்கியமாக இறுதிக்கட்ட சீனை ரெண்டர் செய்வதற்கு, ILM விஷுவல் எபெக்ட்ஸ் கம்பனியிலுள்ள அத்தனை கம்ப்யூட்டர்களையும் ஒரு நாளுக்கு 200,000 hours of rendering power கொடுத்துத்தான், ஒருவாரத்தில் செய்து முடிக்க முடிந்ததாம். இதே வேலையை ஒரேயொரு கம்ப்யூட்டரில் விட்டிருந்தால் 22.8 வருடங்கள் தேவைப்படுமாம்... அடேங்கப்பா!!! ஆனால் எல்லா செலவையும் டபுளாக யஈடுகட்டுவது போல் 1,124 மில்லியன் சம்பாதித்திருக்கிறார்கள்.
விருது வெல்வதற்கான சாத்தியக்கூறு -21%

2. Rise of the Planet of the Apes

மனதர்களுக்கு மேக்கப் போட்டு குரங்கு மாதிரி நடிக்க வைத்த காலம் போய், இந்த பட சீரீஸ்ல முதன் முறையா Motion capture டெக்னாலஜியை பயன்படுத்தி மனிஷனை நடிக்க விட்டு அனிமேட் செய்திருக்கிறார்கள். இந்த டெக்னாலஜி ஹாலிவுட்டுக்கு புதிதில்லை என்றபோதும், இந்தளவு வினைத்திறனாக பயன்படுத்தியிருக்கிறார்களா என்பது சந்தேகமே.
விருது வெல்வதற்கான சாத்தியக்கூறு -25%

1. Harry Potter and the Deathly Hallows - 2

போன வருஷத்தோட ப்ளாக்பஸ்டர் ஹிட்டு... மொத்தமா 1,328 மில்லியன் வசூல் என்பவற்றுக்கெல்லாம் காரணமாக இருந்தது, 10 வருடங்களாக உலகைத் தனது மந்திரப்பிடியில் கட்டிப் போட்டு வைத்த ஹாரி பாட்டரின் கடைசிப்படம் என்பதால் மட்டுமல்ல.. அதில் வரும் விஷுவல் எஃபெக்டஸுக்கும்தான்! கண்டிப்பாக தியேட்டரில் மாத்திரமே பார்த்து அனுபவிக்க வேண்டிய ஒன்று அது!! அதுவும் ஹாக்வர்ட்ஸில் நடக்கும் அந்த இறுதிக்கட்ட யுத்தத்துக்கான வேலைகளை இப்போ இல்லை... 2008ம் ஆண்டுல இருந்தே தயாராக்கி வந்திருக்கிறாராம்.
Double Negativeங்கற விஷுவல் கம்பனியின் உதவியும் ஸ்கூலை இன்ச்சு இன்ச்சா ஸ்கேன் பண்ணி முற்றுமுழுதா டிஜிட்டலாக மீளக்கட்டியிருக்கிறார்களாம்!
விருது வெல்வதற்கான சாத்தியக்கூறு -26%

பின்னூட்டமிடுபவர்கள் மறக்காமல் தங்களைப் பொறுத்த மட்டிலும் எந்தப் படம் ஜெயிப்பற்கு சாத்தியம் அதிகமாகவுள்ளதென்பதை தெரிவித்து விட்டுச் செல்லுங்கள்..

ஆஸ்கர் அலசல் - Animation

2012-01-13T04:57:00.000-08:00

எல்லாருக்கும் இனிய பொங்கல் வாழ்த்துக்கள்!!! போன வருஷம் தரமானதும், தாங்க முடியாததுமாக எக்கச்சக்கமான அனிமேஷன் படங்கள் ரிலீசாச்சு. இதுல எந்தெந்தப் படங்களுக்கு இந்த வருஷத்துக்கான ஆஸ்கர் அனிமேஷன் விருதைத் தட்டிச்செல்லுவதற்கான சாத்தியம், எந்தளவுக்கு பிரகாசமாக இருக்கிறது என சிறிது அலசுவோம்.. அதுக்கு முதலில் அனிமேஷனுக்கான ஆஸ்கர் விருதோட வரலாற்றை கொஞ்சம் பார்த்துட்டு போவோம்.

முதன்முதல்ல அனிமேஷன் படங்களுக்கும் ஆஸ்கர்ல தனிப் பிரிவொன்றை உருவாக்கி விருது கொடுக்க வேண்டும்-ங்கற ஐடியா 2001ம் ஆண்டுல தான் உருவானது. முதன் முதல் ஆஸ்கர் விருதைப் பெற்ற அனிமேஷன் திரைப்படம் ட்ரீம்வொர்க்ஸின் Shrek. இதுவரைக்கும் கொடுக்கப்பட்டுள்ள 10 அனிமேஷன் விருதுகள்-ல 6 தடவை விருது வென்று முதலிடத்தில் இருப்பது நம்ம பிக்ஸார் ஸ்டூடியோஸ்தான்!!! அதுவும் 2007ல இருந்து தொடர்ச்சியா 4 மெகா ஹிட்டுக்களை கொடுத்து அசைக்கமுடியாத உச்சியில் போய் உட்கார்ந்திருக்காங்க..
ட்ரீம் வொர்க்ஸ் 2 தடவை விருது வென்றுள்ளதோடு, டிஸ்னி தனியாளா ஒரு தடவையும் (Spirited Away), வார்னர் பிரதர்ஸ் ஒரு தடவையும் (Happy Feet) இந்த விருதை ஜெயிச்சிருக்காங்க..

வழக்கம் போல பிக்ஸார் இந்த வருஷத்துக்கும் நிதானமாக ரெடி பண்ணி ஒரேயொரு படம் தந்தாங்க- Cars 2. அந்தப் படம் சிறுவர்களிடம் வெகு பிரபலமானாலும், ரொம்பவே குழந்தைத்தனமாக இருப்பதாக கூறி விமர்சகர்களின் ரேட்டிங் குறைந்து விட்டது. பிக்ஸாரின் இந்த மைனஸ் பாயின்டை பயன்படுத்திக் கொள்வதற்கு ஏற்ற மாதிரி ட்ரீம்வொர்க்ஸ் Kung fu Panda 2, Puss in Boots ஆகிற படங்களைக் கொடுத்தது. அதேவேளை வருட ஆரம்பத்தில் ப்ளூஸ்கை ஸ்டூடியோஸ், Rio-ங்கற மெகா ஹிட்டைக் கொடுத்து அனிமேஷன் ரேஸுல தனக்கும் ஒரு இடம் ஒதுக்கிக் கொண்டது..

ஜுலை மாசத்துல, அமெரிக்காவில் பெருவாரியான வரவேற்பைப் பெற்றிருந்த Smurfs 3டி அனிமேஷன் படமாக வெளியானபோதும் சில குறைபாடுகள் காரணமாக ரேட்டிங்ஸில் பின்வாங்கியது.

பிக்ஸார் காம்பினேஷன் இல்லாமல் டிஸ்னியால் தயாரிக்கப்பட்ட படங்கள் 2 இவ்வருடம் வெளிவந்தன. அதில் Mars Needs Moms கமர்ஷியல் ரீதியாக படுதோல்வியைத் தழுவி "ஆல் டைம் பாக்ஸ் ஆபீஸ் ப்ளாப்" பட்டியலில் 5ம் இடத்தைப் பெற்றுக்கொண்டது. மற்றைய படமான Winnie the Pooh 2டியில் வெளியாகி பிஞ்சு நெஞ்சங்களை கொள்ளை கொண்டது..

நிக்கலோடியன்- பாரமவுன்ட் காம்பினேஷனில் இவ்வருடம் Rango படம் மார்ச்சில் வெளியாகி சிறந்த ரேட்டிங்ஸை அள்ளிக் கொண்டது.
வார்னர் பிரதர்ஸ் நவம்பர் மாசம் Happy Feet-2 படத்தை வெளியிட்டது. இதில் சுவாரஷ்யமான விடயம் என்னவென்றால், 2006ம் ஆண்டு பிக்ஸாரின் Cars படத்தை பின்னுக்குத்தள்ளி Happy Feet ஆஸ்கர் வென்று அதிர்ச்சியளித்தது. இவ் இரு படங்களினதும் இரண்டாம் பாகங்களும் மீள 2011ல் வெளியாகியுள்ளன!
வருட இறுதியில் மிகவும் எதிர்பார்க்கப்பட்ட Tintin ஸ்பீல்பெர்க்- பீட்டர் ஜாக்ஸன் காம்பினேஷனில் வெளியாகி தற்போதும் வெற்றிகரமாக ஓடிக் கொண்டிருக்கிறது.

இவை தவிர வெளியான குறிப்பிடும்படியான அனிமேஷன் படங்கள்-Gnomeo and Juliet, Arthur Christmas
சரி, இப்போ அனிமேஷன் ஆஸ்கரை வெல்வதற்கான நிகழ்தகவுள்ள டாப் 5 படங்கள் எவை எனப் பார்க்கலாம்..

5. Cars 2

ஐயோ பாவம்! நம்ம 6 டைம் சாம்பியனுக்கு இப்ப low chance தான்.. 2006 ல வந்த Cars படமே சாதாரண பிக்ஸார் தரத்துக்கு கீழாக கருதப்பட்ட நிலையில், எந்த தைரியத்தில் அதுக்கு sequel எடுக்க முயன்றார்கள் என்பது புரியாத புதிராகவே உள்ளது. என்ற போதிலும் வசூலுக்கு குறைவில்லாமல் 560 மில்லியன் திரட்டியது.

விமர்சனம் படிக்க..

விருது வெல்வதற்கான சாத்தியக்கூறு - 5%

4. Kung Fu Panda

ரொம்ப வருஷம் கழிச்சு ட்ரீம்வொர்க்ஸ் தனது பரம எதிரியான பி்க்ஸாரை பின்தள்ளியுள்ளது. எதிர்மறை விமர்சனங்கள் சில இருந்த போதிலும் பொதுவாக சிறந்த படமாக அங்கீகரிக்கப்பட்டது. 666 மில்லியன் வசூல்செய்து இந்த வருடத்தின் Top Grossing Animation Film ஆக பதிவானது.

விமர்சனம் படிக்க..

விருது வெல்வதற்கான சாத்தியக்கூறு - 14%

3. Rio

இந்த வருஷ அனிமேஷன்களில் என் பேர்சனல் பேவரிட் இந்தப் படம்தான். ப்ளூஸ்கை ஸ்டூடியோஸ் என்றாலே "பிக்சார், ட்ரீம்வொர்கஸுக்கு அடுத்தபடி"தான் என்ற மாதிரி எமக்குள் எழும் எண்ணங்களைத் தகர்த்து, தன்னையும் முண்ணனி அனிமேஷன் ஜாம்பவானாக பதிவு செய்து கொண்டுள்ளது. பெருத்த வரவேற்புக்கு மத்தியில் 485 மில்லியன் வசூல் செய்தது.

விமர்சனம் படிக்க..

விருது வெல்வதற்கான சாத்தியக்கூறு - 25%

2. Tintin - Secret of the Unicorn

ஸ்பீல்பேர்க், பீட்டர் ஜாக்சன், டின்டின் காமிக்ஸ் என பிரபலங்களை ஒன்றுதிரட்டியதால் ஏற்பட்ட உச்சபட்ச எதிர்பார்ப்பையும் வென்று டின்டின் ரசிகர்களுக்கு விருந்தளித்துள்ளது. தற்போது வரையிலும் 332 மில்லியனை வசூல் செய்துள்ளதால் முடிவில் அனிமேஷன் படங்களுக்குள்ளேயே வசூலில் சாதனை படைக்கலாம் என நம்பப்படுகிறது.

விமர்சனம் படிக்க..

விருது வெல்வதற்கான சாத்தியக்கூறு - 26%

1. Rango

முதன்முறையா ஒரு நிக்கலோடியன்- பாரமவுன்ட் காம்பினேஷன் படம் 2001ம் ஆண்டு ஆஸ்கர் நாமினேஷனில் இடம்பிடித்தது(Jimmy Neutron-Boy Genius). சரியாக 10 வருடங்கள் கழித்து இப்போ, இந்தப் படம் நாமினேட் செய்யப்படுவதற்கு மாத்திரம் அல்லாமல் விருது வெல்வதற்கும் அதிக சாத்தியக்கூறை கொண்டுள்ளது. 2011 முடிவதற்குள்ளேயே டீன் சாய்ஸ், பீபள் சாய்ஸ், ஹாலிவுட் பிலிம் பெஸ்டிவல் உள்ளிட்ட 10ற்கும் மேற்பட்ட விருதுகளை வென்று குவித்துள்ளது. என்ற போதிலும் இது திரட்டிய வசூலானது (245 மில்லியன்) மீதி 4 படங்களிலும் குறைவாக இருப்பது சிறிய மைனஸ்!
விமர்சனம் படிக்க..

விருது வெல்வதற்கான சாத்தியக்கூறு - 30%

பின்னூட்டமிடுபவர்கள் மறக்காமல் தங்களைப் பொறுத்த மட்டிலும் எந்தப் படம் ஜெயிப்பற்கு சாத்தியம் அதிகமாகவுள்ளதென்பதை தெரிவித்து விட்டுச் செல்லுங்கள்..

Sweeney Todd (2007)

2011-08-27T05:50:00.000-07:00

டிம் பர்ட்டன் - ஜானி டெப் கூட்டணியின் 6வது படம் தான் இந்த Sweeney Todd: Demon Barber of the Fleet Street. வித்தியாசமாவே படம் எடுக்கற ரெண்டு பேரோடயும் கூட்டணிப் படங்களிலேயே வித்தியாசமானது இந்தப்படம். காரணம் இது பக்கா Black-Horror Musical படம்!!

இந்தப் படத்தோட கதை முதன்முதலா 1973ல கிறிஸ்டோபர் பொன்ட் என்பவரால் நாடகமாக எழுதப்பட்டதாம். 1979ல ஸ்டீபன் சொன்டெயிம், ஹியூ வீலர் அப்படீங்கற ரெண்டு பேரும் இந்த நாடகம் மியூசிக்கலா இருந்தா ரொம்ப நல்லாயிருக்குமேன்னு எண்ணி ஸ்டீபன் பாட்டுக்களையும், ஹியூ வசனங்களையும் எழுதினராம்... சாதாரண நாடகத்தைவிட இந்த மியூசிக்கல் பிளே-க்கு பெருவாரியான வரவேற்பு கிடைச்சுதாம்..
(Uris தியேட்டர்ல முதன்முதலா வெளியிட்ட 1 மார்ச் 1979 திகதியிலேர்ந்து, மொத்தம் 557 தடவைகள் தொடர்ந்து அரங்கேற்றப்பட்டதுன்னா பார்த்துக்குங்களேன்!!!)

தன் பள்ளிப்பருவகாலங்களில் இந்தப் பிளேயை பலதடவை பார்த்து மகிழ்ந்த டிம் பர்டடன், தான் இயக்குனரான காலத்துலே இருந்து எப்படியாவது இத படமாக்கனும்னு நினைச்சு ட்ரை பண்ணிக்கிட்டிருந்தாராம். "சில்லறைக் காசுக்கு உட்கார்ந்து பாக்குற பிளேயை, செலவழிச்சு யாரும் சினிமாவா பார்க்க மாட்டாங்க"ன்னு நெனச்ச தயாரிப்பாளர்கள் கைவிரித்தனர். 2006ல்தான் ஒருவழியா "ட்ரீம்வொர்க்ஸ்" க்ரீன் சிக்னல் காட்டியிருக்கிறார்கள்!
தன்னோட ட்ரீம் ப்ரொஜெக்ட் என்பதால் ஒவ்வொரு கதாப்பாத்திரத்துக்கும் பார்த்துப் பார்த்து ("நான் கடவுள்" ரேஞ்சுக்கெல்லாம் கஷ்டப்படாமல்...) நடிகர்களை தேர்வு செய்திருக்கிறார் டிம் பர்ட்டன்... ஆனால் ஜானி டெப் மட்டும் வழக்கம் போல Straight Purchase!!

சரி இப்போ கதையை சுருக்கமா பார்ப்போம்,
லண்டனில் உள்ள ஒரு barberஆன பெஞ்சமின் பார்க்கருக்கு (ஜானி) லூசின்னு அழகான மனைவி இருந்தாள். அவளது அழகில் மயங்கிய அவ்வூர் நீதிபதியான டர்பின் (அலன் ரிக்மேன்) பெஞ்சமின் மீது பொய்க்குற்றம் சாட்டி அவனை அவுஸ்திரேலியாவில் சில காலம் கடும் வேலை வாங்க உத்தரவிடுகிறான்!!
15 வருடம் கழித்து "ஸ்வீனி டொட்" என்ற பெயரில், வேறு கெட்டப்புடன் பெஞ்சமின் லண்டனுக்குத் கப்பலில் திரும்பிக் கொண்டிருக்கிறான். அதே கப்பலில் வரும் அந்தோனி எனும் இளைஞனிடம் தான் பழிக்குப் பழி வாங்கவே திரும்புவதாகவும் கூறுகிறான். தனது கடை தற்போது நெலீ லவட் எனும் பெண்மணியின் pie shop ஆக இருப்பதைக் கண்டு, அவளை சந்தித்து தான் யாரென்ற உண்மையைக் கூறுகிறான். அவள் அவனது பழைய razor கருவிகளைத் திருப்பித் தரவே, அதே கடையின் மேல்மாடியில் தனது சலூனை திரும்ப ஆரம்பிக்கிறான் ஸ்வீனி!!

லவட்டிம் மேலும் பேசியதிலிருந்து, 'தனது மனைவி லூசி டர்பினால் கற்பழிக்கப்பட்டு சில நாட்கள் கழித்து தற்கொலை செய்து கொண்டதாகவும், பெஞ்சமினின் மகளான ஜொஹான்னா தற்போது டர்பினால் வளர்க்கப்படுவதாகவும்' அறிந்து கொள்கிறான்.. செய்தியைக் கேட்டு ஆத்திரமடையும் ஸ்வீனி 'தன் ரேசர் கத்தியால் தான் டர்பினுக்கு சாவு' என முடிவு கட்டுகிறான்!!
நெலீ லவட் செய்யும் pies "லண்டனிலேயே மிகக் கேவலமான pies" என வெறுத்தொதுக்கப்பட்டவை.. இதனாலேயே லவட்டுக்கு கஸ்டமரும் கிடையாது; நண்பர்களும் கிடையாது.. ஸ்வீனி டொட்டின் வருகையால் மகிழ்ச்சியடையும் லவட் அவன் மீது காதல் கொள்கிறாள்..

லண்டனில் வேலையின்றி சுற்றித்திரியும் அந்தோனி ஜொஹன்னாவப் பார்த்து காதலிக்கத் தொடங்குகிறான். விளைவாக டர்பினின் அல்லக்கையான பியாடில் என்பவனால் மிரட்டி அனுப்பப்படுகிறான்...

ஊர்மக்களின் முன்னிலையில் நடத்தப்படும் ஒரு பார்பரிங் போட்டியில் வெற்றியீட்டும் ஸ்வீனி பியாடிலின் கவனத்தை தன்பக்கம் ஈர்க்கிறான்! அன்றிலிருந்து ஸ்வீனியின் சலூனுக்கு வரும் கூட்டம் அதிகரிக்கிறது!! அந்த வரிசையில் எப்போது டர்பின் வருவானென காத்துக் கொண்டிருக்கறான் ஸ்வீனி!!!

ஸ்வீனி டொட்டால் டர்பனை கொல்ல முடிந்ததா? அந்தோனியும், ஜொஹான்னாவும் ஒன்று சேர்வார்களா என்பது மீதிக்கதை? என்டிங்-ல நல்ல ட்விஸ்ட்..

ஜானி டெப்பின் நடிப்பு, ஹெலனா கார்ட்டரின் (லவட்) நடிப்பு, படம் முழுதும் தொடரும் ஹாரர் கலர், பீதியையும் மறக்கச் செய்யும் காமெடி, கன்னா பின்னாவென பீறிட்டுத் தெறிக்கும் கிராபிக்ஸ் ரத்தம் என ப்ளஸ்களை அடுக்கிக் கொண்டே போகலாம். ஆனால் அவற்றுக்கே மணிமகுடமாகத் திகழ்வது பின்னணி இசையும் பாடல்களும்தான்...
படத்துல மொத்தம் 13 பாடல்கள்.. அதில் ஓப்பனிங்கில் வரும் "No Place Like London"பாட்டும், ஜானி டெப் கொலை பண்ணி்க்கிட்டே முகத்துல சாந்தத்தையும், ஆக்ரோஷத்தையும் கலந்து பாடும் "Johanna.." பாட்டும் சூப்பர்!! Finishing Touchல் டிம் பர்ட்டன் தெரிகிறார்..
மியூசிக்கல் படம்னா என்னன்னு வரைவிலக்கணமே எழுதுவார்கள் போலும்.. அவ்வளவு perfection!!

ரேட்டிங்ஸ்,
நடிப்பு = 18
இசை = 20
கதை+திரைக்கதை = 17
கலை+ஒளிப்பதிவு = 17
இயக்கம் = 17

மொத்தம் = 89% மிக நன்று

Edward Scissorhands (1990)

2011-08-23T22:45:00.000-07:00

ஹாலிவுட்டில் fairytale டைப் கதைகளுக்கே பிரசித்தமானவரும், இந்த காலகட்டத்தின் சிறந்த இயக்குனர்களுல் ஒருவருமாக திகழ்பவர்தான் டிம் பர்ட்டன்.. இவரும், நடிகர் ஜானி டெப்பும் "கே.எஸ் ரவிக்குமார்-கமலஹாசன்" மாதிரி!! ரெண்டு பேரும் சேர்ந்து பண்ண 7 படங்களில் "Ed Wood"ஐ தவிர மத்த 6-ம் சுப்பர் ஹிட்! இவங்களோட லேட்டஸ்ட் கூட்டணி "அலிஸ் இன் வொண்டர்லேன்ட்" போன வருஷம் வெளிவந்து வசூலை வாரிக்குவித்தது உங்களுக்கு தெரிந்திருக்கும்.

"நைட்மேர் ஒப் த எல்ம் ஸ்டரீட்"ல் அறிமுகமாகி, பின் அதைப்போன்ற வேறொரு வெற்றிப் படமின்றி திக்குமுக்காடிக்கொண்டிருந்த ஜானி டெப்புக்கு மைல்கல் படமொன்றை வழங்கி டாப் ஹீரோக்களுல் ஒருவராகவும், most versatile நடிகராகவும் மாற்றித் தந்தவர் டிம் பேர்ட்டன்தான்.. அந்த மைல்கல் படம்தான் எட்வர்ட் சிசர்ஹான்ட்ஸ்!!!

ஒரு சின்னப் பொண்ணு தனது பாட்டியிடம் "பனி எப்படி வருகிறது?" எனக் கேட்பதாகவும், அதற்குப் பதிலாக பாட்டி ஒரு கதை சொல்வதாகவும் படம் ஆரம்பிக்கிறது.
ஒரு ஊர் எல்லையில் இருக்கும் மலையொன்றிலுள்ள பங்களாவில், சயின்டிஸ்ட் ஒருவர் செயற்கை மனிதனை உருவாக்கிக் கொண்டிருந்தார்... எட்வர்ட் எனப்படும் அந்த செயற்கை மனிதனை (ஜானி டெப்) கிட்டத்தட்ட முடித்தாகி விட்டது. இன்னும் கைகளை மட்டும் பொருத்தவில்லை. ஆனால் இந்த சயின்டிஸ்ட் எதிர்பாராவிதமாக 'ஹார்ட் அட்டாக்' வந்து இறந்து போக, எட்வர்ட் கைகளுக்குப் பதிலாக கத்திரிக்கோல்களைக் கொண்ட மனிதனாக அந்த பங்களாவில் தனித்து வாழ்கிறான்.

பல வருடங்கள் கழித்து இந்த பங்களாவுக்கு வரும் ஒரு சேல்ஸ்வுமனான "பெக்", எட்வர்டைக் கண்டு அவன்மீது பரிதாபப்பட்டு, அவனை தனது வீட்டிற்கு அழைத்துக்கொண்டு போய் அங்கேயே வாழச்செய்கிறாள்.. எட்வர்ட் தன்னையறியாமலேயே பெக்கின் மகளான கிம்மை காதலிக்கத்தொடங்குகிறான். கிம்மின் பாய்ஃப்ரென்ட் ஜிம்மிற்கு எட்வர்டை அவ்வளவாக பிடிக்கவில்லை. இதற்கிடையே எட்வர்ட் தனது கத்திரிக்கோல்களைக்கொண்டு அயல்வீட்டுப் பெண்களுக்கு டிசைன் டிசைனாக முடி கத்தரித்துவிட்டு, அந்த ஊரில் மிகவும் பிரபலமாகிறான்!!

எட்வர்டின் கத்தரிக்கோல்களைக் கொண்டு எந்த வித பூட்டையும் இலகுவில் திறந்துவிடலாம் என்பதை அறியும் ஜிம், தான் van வாங்குவதற்கு தேவையான பணத்தை பெற்றோர் தர மறுத்ததால் கிம், எட்வர்ட்டின் உதவியுடன், தன் சொந்த விட்டிலேயே திருட முயல்கிறான்! அப்போது அலாரம் ஒலிக்கவே, கிம்மும் ஜிம்மும் எட்வர்டை விட்டு தப்பித்து ஓடுகிறார்கள். எட்வர்ட் தனியாக பொலிஸிடம் பிடிபடுகிறான்.. பொலிஸார் எவ்வளவு விசாரித்தபோதும் தனது காதலி கிம்மினதும், ஜிம்மினதும் பெயர்களை கூறாமல் மறைக்கிறான். இந்த சம்பவத்தால் கிம், எட்வர்ட் மீது பாசம் காட்டத் தொடங்குவதோடு ஜிம்மை வெறுத்து ஒதுக்குகிறாள். ஆனால் சுற்றுவட்டாரத்தில் எட்வர்ட்டின் புகழ் சரியத்தொடங்குகிறது.

கிறிஸ்துமஸிற்கு முதல்நாள் எட்வர்ட் அலங்காரம் செய்து கொண்டிருக்கும் போது தவறுதலாகப் பட்டு அவனது கத்தரிக்கோல், கிம்மின் கையில் காயமொன்றை ஏற்படுத்துகிறது. இதை அவதானிக்கும் ஜிம் இதுதான் சரியான தருணமென்பதை அறிந்து எட்வர்டை தாக்கத்தொடங்குகிறான். ஊர்மக்கள் அதைப்பார்த்து எட்வர்டை காட்டுமிராண்டியெனக்கூறி அவனைப் பிடிப்பதற்கு போலீசை அனுப்புகின்றனர். எட்வர்ட் தப்பித்து தான் முன்பு இருந்த பங்களாவிற்கே ஓடி ஒளிகிறான்! அங்கு சென்று எட்வர்டை சந்திக்கும் கிம் எட்வர்டினதைப் போன்ற கத்தரிக்கோல்-கையொன்றை எடுத்து வந்து மக்களிடம் காட்டி, எட்வர்ட் துப்பாக்கிச் சூட்டில் இறந்து விட்டதாகக் கூறி நம்ப வைக்கிறாள்!!

இப்பொழுது முன்னர் வந்த பாட்டி (வயதான கிம்) தனது பேத்தியிடம் "தான் எட்வர்டை பிறகு சந்திக்கவேயில்லையென்றும், எட்வர்ட் மலையுச்சியிலிருந்து பனிச் செதுக்கல்கள் வடிவமைப்பதால்தான் இங்கு பனிமழை பொழிவதாகவும்" கூறி படத்தை முடிக்கிறாள்.

இந்தப் படம் வெளிவந்த காலத்தில் எந்தளவு தாக்கத்தை மக்களிடையே ஏற்படுத்தியிருக்கும் என்பதை இப்போது யூ-ட்யூப் கமென்ட்களில் பார்க்கும் போதே தெரிகிறது. எல்லோரும் விம்மி விம்மி அழுததை நினைவு கூறுகிறார்கள்! ரோமியோ -ஜுலியட், ஜாக்-ரோஸ் போன்று எட்வர்ட்-கிம் ஜோடியும் காலத்தைக் கடந்து மக்கள் மனதில் இடம்பிடித்திருக்கின்றனர்.. இந்தக்காலத்து வியூவர்ஸுக்கு படத்தில் உறுத்தல்களை பார்க்கவே டைம் போகிறது. ஆனால் ஃபேரி டேல் கதையென்பதால் அதைத் தவிர்க்க வேண்டிய அவசியமும் உள்ளது. ஜானி டெப் ஒற்றை ஆளாக நின்று படத்துக்கு வலுவூட்டுகிறார்!!
படத்தின் இசை கச்சிதமாக பொருந்துகிறது. இதற்குப் பின் வந்த பல சோக முடிவுகளைக் கொண்ட காதல் படங்களுக்கு இந்தப்படம் இன்ஸ்பிரேஷனாக அமைந்திருக்கும் என்பதை உறுதிபடக் கூறலாம்! கிறிஸ்துமஸ் சீசனில் பொழுது போக்குக்காக பார்க்கவும், ஜானி டெப்பின் இளமைப் பருவ பெர்ஃபாமன்ஸை கண்டு களிக்கவும் உகந்த படம்...

ரேட்டிங்ஸ்,
நடிப்பு = 17
இசை = 18
கதை+திரைக்கதை = 16
கலை+ஒளிப்பதிவு = 16
இயக்கம் = 17

மொத்தம் = 84% மிக நன்று

Adjustment Bureau (2011)

2011-08-20T21:29:00.000-07:00

காலையில் எழுந்திருச்சி, அவசர அவசரமா ஓடி பஸ்ஸை புடிச்சு வேலைக்கு கிளம்பறது முதல், கம்ப்யூட்டரை ஆன் பண்ணி "என்னடா எழுதலாம்?"னு யோசிச்சு, கிறுக்கி, பதிவை பப்ளிஷ் பண்ணுற வரைக்கும் எல்லாமே நம்ம விருப்பம் படித்தான் நடக்குது.. நாமதான் முடிவை எடுக்கிறோம்... அல்லது நாம முடிவெடு்க்கறதா நினைச்சுகிட்டிருக்கோமா?
நிஜமாவே "விதி"ன்னு ஒண்ணு இருந்து, நம்மை வாழ்க்கையை யாரோ ஒருத்தர், ஏதோவொரு மூலையில் கூலா உட்கார்ந்துகிட்டு டிசைன் பண்ணிக்கொண்டிருந்தால்?? இந்த டவுட்டுக்கெல்லாம் ஒரு தியரியை உருவாக்கி, அதை காதல் கதையொன்றின் மூலம் வெளிப்படுத்தும் படம் தான் "அட்ஜஸ்ட்மென்ட் ப்யூரோ"!

2006ல் யூ.எஸ் செனட் பதவிக்காக போட்டியிடும் காங்கிரஸ்காரரான டேவிட் நொரிஸ் (மாட் டேமன்)-ற்கு மக்களிடையே ஆதரவு இருந்தபோதும், துரதிருஷ்டவசமாக தோற்றுப் போகிறார்.. தன்னுடைய அடுத்த மேடைப்பேச்சில் "மக்களிடம் என்ன காரணம் கூறுவது?" என்பதை ஒத்திகை பர்த்துக் கொண்டிருக்கும்போது, எலீஸ் என்ற பெண்ணை சந்திக்கிறார். இருவரும் பேசிக்கொண்டதிலிருந்து ஒருவரையொருவர் பிடித்துப் போகவே முத்தமும் பகிர்ந்து கொள்கின்றனர்..
அந்தப் பெண்ணின் சந்திப்பால் உற்சாகமடையும் டேவிட், மேடைப்பேச்சில் வெளுத்து வாங்கி, மக்களிடத்தே பெரும் பாராட்டுக்களை பெறுகிறார். 2010ல் நடக்கவிருக்கும் செனட் தேர்தலுக்கு இப்பொழுதே பலம் வாய்ந்த போட்டியாளராக மீடியாக்களால் கணிக்கப்படுகிறார்.

இந்த விதியைக் கன்ட்ரோல் பண்ணும் ஆட்களை உள்ளடக்கிய குழுவுக்கு பெயர்தான் "அட்ஜஸ்ட்மென்ட் ப்யுரோ". வெளியுலகிற்கு சாதாரண மனிதர்களைப் போலவே இவர்கள் இருப்பார்கள். இவர்களுக்கு ஒரு பெரிய தலைவர் உண்டு. அவர்தான் "பிளானை" உருவாக்கி புத்தகமொன்றில் எழுதி ஏனைய உறுப்பினர்களுக்கு அனுப்பி வைப்பார். ஆனால் அவர் யாரென்பதை வெளியில் சொல்ல மாட்டார்கள். டேவிட் நொரிஸின் விதியை டீல் பண்ணும் உறுப்பினர் "தொம்ஸன்". இவருக்கு 4,5 உதவியாளர்கள்..
இவர்கள் எல்லோரும் கறுப்பு நிறத்தொப்பியொன்றை அணிந்துகொண்டிருப்பார்கள். இந்த தொப்பியை அணிந்து கொள்வதால் அவர்களுக்கு குறிப்பிட்ட சில ஷார்ட்-கட்களை உபயோகிக்க முடியும். அதாவது ரெஸ்டாரன்ட் ஒன்றின் கதவைத் திறந்துகொண்டு பெரிய ஸ்டேடியத்துக்குள் நுழைய முடியும்!!

இவர்கள் மனிதர்களது விருப்பங்களில் குறுக்கிடவேண்டாமேயென்று எண்ணி, ரோம ஆட்சிக்காலகட்டத்தில் ஒரு தடவை மக்களுக்கு சுயமாக முடிவெடுக்க சான்ஸ் வழங்கினார்களாம். ஆனால் இருண்ட யுகம் தொடங்கி மக்கள் மிக்க அவதிப்பட்டனராம். இரண்டாவது தடவை அதேபோல் சான்ஸ் கொடுத்தபோதுதான் உலகப்போர்கள் ஏற்பட்டு உலகம் பெரும் அழிவைச் சந்தித்ததாம். ஆகவே மக்களின் நன்மை கருதியே தாங்கள் தொடர்ந்தும் விதியைச் செயற்படுத்துவதாகச் சொல்கின்றனர்!!

இந்த ப்யுரோ உறுப்பினர்களில் சிலர் டேவிடைப் பிடித்துக் கொண்டு "அவன் எலிஸை மீண்டும் சந்தித்துக் கொள்ளக் கூடாதென்றும், தங்களைப் பற்றி வெளியே வாய் திறந்தாள் அவன் பைத்தியமாக்கப்படுவான்" என்றும் எச்சாரித்து அனுப்புகின்றனர். ஆனால் இந்த மிரட்டல்கள் டேவிடுக்கு, எலிஸை மீண்டும் பார்க்க வேண்டுமென்ற ஆசையைத்தான் தூண்டி விடுகின்றன..
அவன் மீளவும் எலிஸை சந்திக்கும் நடவடக்கைகளில் இறங்கவே, தொம்ஸன் குறுக்கிட்டு பிளானைப் பற்றி மேலும் விளக்குகிறார். அதாவது அவர்கள் சந்தித்துக் கொண்டால் டேவிடின் யு.எஸ் ஜனாதிபதியாக வேண்டிய எதிர்காலமும், எலிஸின் பெரிய பலே டான்சராக வேண்டிய எதிர்காலமும் பாதிக்கப்படுமெனக் கூறுகிறார்.

மேலும் சிறு சாம்பிளுக்காக தொம்சன், எலிஸ் டான்ஸ் ஆடும்போது கீழே விழுந்து காலில் அடிபடும்படி செய்கிறான். ப்ளானின் சீரியஸ்னஸை அறியும் டேவிட் நிதானமாக சிந்திக்கிறான்... தான் விலகியிருப்பதே எலிஸுக்கும் நன்மையென்பதால் ஆஸ்பத்திரியில் அவளைப் பிரிய மனமில்லாமல், தனியே விட்டுச் செல்கிறான்!!
இந்தக் காதல் ஜோடி மீளவும் சந்தித்துக் கொண்டதா? இவர்களால் விதியை மாற்ற முடிந்ததா என்பதே மீதிக்கதை..

படம் அப்பப்போது சறுக்கி சறுக்கி எழுவதால் பார்க்கும்போது ஈடுபாடு கொஞ்சம் குறையலாம்.. மற்றப்படி தேர்தல் காட்சிகளும், ப்யூரோ காட்சிகளும் விறுவிறுப்பானவை. "விதி"ங்கற ரொம்பவே சிக்கலான மேட்டரை வைத்து விளையாடியிருப்பதால் சில லாஜிக் ஓட்டைகள் இருப்பதாக எழும் சந்தேகங்களை தவிர்க்க முடியவில்லை!
ஆனா ஒண்ணு.. இனிமேல் கறுப்புத்தொப்பி அணிந்து கொண்டு வெளியில் உலவுபவர்களைப் பார்த்தாலே கொஞ்சம் ஜாக்கிரதையாக இருக்க வேண்டும்!

ரேட்டிங்ஸ்,
நடிப்பு = 16
இசை = 15
கதை+திரைக்கதை = 16
கலை+ஒளிப்பதிவு = 17
இயக்கம் = 17

மொத்தம் = 81% சூப்பர்

Rango (2011)

2011-08-19T00:52:00.000-07:00

ஒரு செல்லப்பிராணி பச்சோந்தி தனது எஜமானருடன் காரில் சென்று கொண்டிருக்கிறது. எதேச்சையாக கரர் சற்று திரும்பும்போது ஏற்படும் அசைவால், பச்சோந்தி இருந்த கண்ணாடிப் பெட்டி தூக்கியெறியப்பட்டுபெயரே தெரியாத பாலைவனத்தில் தனியாளாக மாட்டிக் கொள்கிறது.. தாகம் உயிரை எடுக்கத் தொடங்குகிறது. சுற்று முற்றிலும் தண்ணியே காணோம்.. பருந்திடமும், எலிகளிடமும் தப்பித்து ஒரு நாள் இரவை தனிமையில் கழித்துக்கொள்கிறது..

மறுநாள் எங்கிருந்தோ வந்த பீன்ஸ் எனும் பெண் ஓணானை சந்திக்கிறது. அதனுடன் பேச்சுக் கொடுத்துக்கொண்டே, பாலைவனத்தின் மத்தியிலுள்ள Dirt எனும் பாலைவன விலங்குகளுக்கான ஊரைச் சென்றடைகிறது..

"டர்ட்" கிராமவாசிகளும் தண்ணிப் பிரச்சனையால் அவதிப்பட்டு வருகின்றனர். அங்கங்கு கிடைக்கும் நீரைச் சேமித்து வங்கி போல் பாதுகாத்து வருகின்றனர். இந்த ஊருக்கு 2 பொதுவான வில்லன்கள்.. முதலாவது ஒரு பாம்பு, இரண்டாவது பருந்து! (எனினும் பருந்தின் நடமாட்டம் அதிகமாக இருப்பதால், பாம்பு இங்கு இப்பொழுது வருவதில்லையாம்..)

ஊருக்குள் நுழைந்தவுடன், முதல்வேலையாக தண்ணி தேடி பாருக்குச் செல்கிறது. முதலில் தன்னைக் கேலியாக பார்த்த அங்குள்ள விலங்குகளிடம், "தனது பெயர் ரங்கோ எனவும், தான் பல வீரசாகசங்களை புரிந்ததாகவும்" பீலா விடுகிறது. அந்த மிருகங்களோ "இரும்புக் கோட்டை முரட்டு சிங்கம்" படம் பார்த்த மாதிரியே ரங்கோவால் ஈர்க்கப்பட்டு நிற்கின்றனர்.

பின்னர் பருந்து பறந்து வருவதைக்கண்டு எல்லா விலங்குகளும் தத்தம் வீடுகளில் ஓடி ஒளிந்து கொள்கின்றன. ரங்கோ மட்டும் முட்டாள் தனமாக ரோட்டில் வந்து நிற்கவே, பருந்தின் கண்ணில் அகப்படுகிறது. நீண்ட துரத்தல்களுக்குப்பின், எதேச்சையாக விழும் பழைய தண்ணீர்த்தொட்டியின் அடியில் மாட்டி பருந்து உயிரை விடுகிறது. இதற்கும் ரங்கோதான் காரணமெனஎண்ணும் மக்கள் அவனை புகழ்ந்து தள்ளுகின்றனர். அவ்வூர் மேயரால் "ஷெரீப்" பதவி ரங்கோவுக்கு அளிக்கப்படுகிறது. ஊரின் நீர்ப் பிரச்சனையைத் தீர்க்க வேண்டிய பொறுப்பும் ரங்கோவின் கைகளில் வந்து சேர்கிறது!!!
மீதிக்கதை தான் படம்.. படத்தின் வில்லன் யாரென்பதில் சின்னதா ஒரு ட்விஸ்ட்.

படம் முழுக்க பாலைவனத்தை காட்டுவதும், வறண்டு போன சருமத்தோடு விலங்குகளை உருவாக்குவதும் பெரிய சவால். ஆனாலும் Nickelodeon ஊதித் தள்ளியிருக்கிறார்கள். தாகத்தின் கொடுமையைக் காட்டும் காட்சிகளை ரொம்பவும் சிறப்பாக செய்திருக்கிறார்கள. அதிலும் ரங்கோ ஊர்மக்கள் முன்னிலையில் 'நீரைப் பாதுகாக்க வேண்டியதன் தேவை' பற்றி வீரஉரை பேசிவிட்டு, மடமடவென தண்ணீரை அள்ளிக் குடிக்கும் காட்சி ரசனையின் உச்சம்!! படத்தின் தொடக்கம் முதல் இறுதி வரை, கதையைச் சொல்லுவதற்காக அடிக்கடி வந்து போகும் 3 பருந்துகள் கிளாசிக் கெளபாய் கதைகளை நினைவூட்டுகின்றன...

தன் தகுதிக்கும் மீறிப் பெருமை பேசி, அலட்சியமாக நடிக்கும் "ரங்கோ" பாத்திரத்துக்கு குரல்கொடுக்க ஜானி டெப்பை தேர்வு செய்தது செம பொருத்தம்!! மக்களால் துரத்தப்பட்டு சோர்ந்து போயிருக்கும் ரங்கோ ஆவியொன்றை சந்திக்கும் காட்சியும், பின்னால் ஒலிக்கும் பாடலும் படத்தின் ஹைலைட்.. வழமையாக பார்த்து வரும் பி்க்சார், ட்ரீம் வொர்க்ஸ் படங்கள் போலில்லாமல், மெதுவாக நகரும் காட்சிகளும், close-to-feel அனிமேஷனும் படத்தை தனியொரு லெவலுக்கே எடுத்துச் செல்கின்றன..

ரேட்டிங்ஸ்,
பாத்திரங்கள்- 18
அனிமேஷன்-17
பின்னணித் தரவுகள்- 17
கதை+திரைக்கதை- 16
இயக்கம்-16

மொத்தம்- 84% சூப்பர்

Source Code (2011) - 2

2011-08-13T08:02:00.000-07:00

8 நிமிடங்கள் முடிய, ஸ்டீவன்ஸ் இறந்து நிஜ உலகத்திற்குத் திரும்புகிறான். ஆனால் அருகில் கிறிஸ்டினா இல்லை.. எப்படி? குண்டு வெடிக்கும் போது அவர்கள் இருவரும் ரயிலை விட்டு வெகு தூரத்தில் இருந்தார்களே! என சிந்தித்துக் கொண்டிருக்கும் போதே குட்வின் விளக்குகிறாள்..

" சோர்ஸ் கோடில் நீ பார்க்கும் நிகழ்வுகள், மனிதர்கள் எல்லாம் எப்போதோ முடிந்து விட்டவை.. நீ என்னதான் முயற்சி செய்தாலும்அவர்கள் உயிருடன் திரும்ப மாட்டார்கள்.
எங்களுக்கு நேரம் வேறு இல்லை. இரண்டாவது பாம் வைத்து முடிப்பதற்குள் நீ வைத்தவனை மாத்திரம் அடையாளம் கண்டு வந்து சொல்லு.." என்கிறாள்.
ஸ்டீவன்ஸ் தனது தந்தையுடன் ஒரு தடவை தொலைபேசியில் பேசலாமா என கேட்கிறான்.. ஆனால் நிஜ உலகில் தான் அவன் இறந்து விட்டானே எனக் கூறி மறுக்கிறாள்..

அடுத்தடுத்த மிஷன்களில் அதிரடியாக செயற்பட்டு ஒருவழியாக குற்றவாளி யாரென்பதை குட்வினுக்கு அடையாளம் காண்பிக்கிறான். அங்கிருந்து பொலீஸுக்கு தகவலனுப்பி 2வது குண்டை வைக்க கிளம்பிக் கொண்டிருந்த தீவிரவாதியை மடக்கிப் பிடிக்கிறார்கள்!! சோர்ஸ் கோட் முறையின் ஆரம்ப முயற்சியே அமோக வெற்றியளித்துள்ளது!! டாக்டர். ரட்லெஜ்ஜுக்கு பாராட்டுக்கள் குவிந்த வண்ணமுள்ளன...

ஸ்டீவன்ஸ் நிதானித்து சிந்திக்கின்றான்.
ஸ்டீவன்ஸை பொறுத்தவரை இதுவரை சோர்ஸ் கோட்தான் நிஜ உலகம்.. அங்குதான் அவனால் சுதந்திரமாக நடக்கவும், சுவாசிக்கவும், காதலிக்கவும் முடிந்தது.. நிஜ உலகில் அவன் ஒரு வெற்று பொம்மை.. அவனை வைத்து காரியம் முடிந்தவுடன், எல்லா மெமரியையும் அழித்து வேறு சோர்ஸ் கோட் பயணத்திற்கு அனுப்பி விடுவார்கள்...

ஸ்டீவன்ஸ் குட்வினிடம், "தன்னை இறுதியாக ஒருமுறை சோர்ஸ் கோடிற்குள் அனுப்புமாறும், சோர்ஸ் கோடில் இருக்கும் போதே, 8 நிமிடங்கள் முடியும் முன்னரே.. பரிசோதனைகூடத்தில் அவனுக்கு வழங்கப்பட்டிருந்த செயற்கை உணர்வூட்டல் செயற்பாட்டை துண்டிக்குமாறு கேட்டுக் கொள்கிறான்.

சோர்ஸ் கோடுக்குச் செல்லும் ஸ்டீவன்ஸ் முதலில் குண்டை கண்டுபிடித்து செயலிழக்கச் செய்கிறான். பின் க்றிஸ்டினாவின் தொலைபேசியைக் கொண்டு தந்தைக்கு போன்கால் செய்கிறார். தான் ஸ்டீவன்ஸ் உடனிருந்த நண்பன் என தன்னை அறிமுகப்படுத்திக் கொண்டு, தந்தையுடன் மனம்விட்டுப் பேசுகிறான்.. க்றிஸ்டீனாவையும் கூட்டிக் கொண்டு ரயிலிலிருந்து வெளியேறிச் செல்கிறான்.
நிஜ உலகில் குட்வின் ண்டீவன்ஸின் செயற்கை உணர்வூட்டலை துண்டிக்கிறாள்.. விளைவு??

ஸ்டீவன்ஸின் மனது, சீன் வென்டரஸின் உடலில் நிலைகொள்கிறது.. உலகிற்கு சமாந்தரமான இன்னோர் மெய்நிகர் உலகில் அவன் கிறிஸ்டீனாவுடன் சேர்ந்து, அவன் தேடிய நிம்மதியான வாழ்க்கையை வாழ்கிறான்.
ஸ்டீவன்ஸின் உடல் ஆய்வுகூடத்தில் கத்திரமாக இருக்கிறது. மீள உணர்வூட்டப்படும் போது அது இன்னுமோர் சோர்ஸ் கோட் மிஷனுக்கு பயன்படுத்தப்படலாம்..

படம் என்னமோ இத்துடன் முடிந்துவிடும்.. ஆனால் எழும் லாஜிக் கேள்விகள் தான் குடைச்சல் கொடுக்கின்றன. எந்தவித சந்தேகமுமின்றி உங்களுக்கு படத்தை விளங்கிக்கொள்ள முடிந்திருந்தால் நீங்கள் சயின்ஸ் பிக்ஷனை கரைத்துக் குடித்த ஆசாமியாகத்தான் இருக்க முடியும்.
படத்தில் விறுவிறுப்புக்கு குறைவே இருக்காது.. டைரக்டர் படத்தை இயக்கிய Duncan Jones தான். தாராளமாக இவரிடமிருந்து தரமான சயின்ஸ் படங்களை எதிர்பார்க்கலாம். நேரமிருந்தால் கண்டிப்பாக இந்தப் படத்தை பாருங்கள்!!

ரேட்டிங்ஸ்,
நடிப்பு = 15
இசை = 16
கதை+திரைக்கதை = 18
கலை+ஒளிப்பதிவு = 15
இயக்கம் = 16

மொத்தம் = 80% மிக நன்று

Source Code (2011)- 1

2011-07-30T00:06:00.000-07:00

தூங்கிக்கிட்டிருக்கீங்க.. திடீர்னு முழிச்சுப் பார்த்தா "எப்படி வந்தோம்"னே தெரியாம ஒரு இடத்துல இருக்கீங்க! கண்ணாடில போய் பார்த்தா அது நீங்களே இல்லை!!...
இப்படி ஒரு அனுபவம் உங்களுக்கு கிடைத்திருக்காவிட்டால், "அப்பாடா.. உங்களை யாரும் சோர்ஸ் கோடுக்குள்ள அனுப்பல!!"

சோர்ஸ் கோட் அப்படிங்கறது சமாந்தர மெய்நிகர் (parallel reality) உலகம்.. அதாவது உங்கள் உயிரை இறந்த ஒருவரின் உடலுக்குள் அனுப்பி அவராக வாழ வைப்பது.. அதுக்கு ரெண்டு நிபந்தனைகள்-
1. உங்களால் இறந்தவரின் கடைசி எட்டு நிமிடங்களை மட்டுமே அனுபவிக்க முடியும். (அதுக்காக டி.வி பார்க்குற மாதிரியெல்லாம் இருக்காது. நீங்கள் அந்த நிமிடங்களை வாழ வேண்டும், நீங்கள் சுயமாக முடிவுகளையும் எடுக்கலாம்!)
2. சோர்ஸ் கோடிற்குள் அனுப்பப் படுவதற்கு நீங்களும் இறந்திருக்க வேண்டும் !!!

இங்க தான் கன்பியூஷன் தொடங்குகிறது. இறந்த ஒருவரின் (a) உடலை வைத்து, அவரது நினைவுகள், உணர்வுகள் என்பவற்றை சேமித்து அவரைப் போன்ற ஒரு மெய்நிகர் விம்பத்தை தோற்றுவிக்கிறார்கள். பின்னர் அந்த மெய் நிகர் விம்பத்தை சோர்ஸ் கோட் செயன்முறையூடாக இன்னொரு இறந்தவரின் (b) உடலுக்குள் புகுத்தி அவரது இறுதிக்கட்ட நினைவுகளில் வாழச் செய்கிறார்கள்..

சரி வெறுமனே 8 நிமிடங்கள் இன்னொருவராக வாழ்ந்துவிட்டுப் போவதால் என்ன பயன் இருக்கிறது??.. அதற்காகத்தானே படத்தோட கதை இருக்கிறது!!

சிக்காகோ நோக்கிப் புறப்படும் புகையிரதமொன்று தீவிரவாதிகளால் குண்டு வைத்துத் தகர்க்கப் படுகிறது.. குண்டை வைத்த தீவிரவாதிகளில் ஒருவன் அந்தப் புகையிரதத்தை கவனித்துக் கொண்டிருந்திருக்கிறான். அவன் யாரென்பதை a கண்டுபிடித்துக் கூறினால், அதை வைத்து அவனது ஏனைய தாக்குதல்களிலிருந்து நாட்டை காப்பாற்றலாம்!!

aயின் பெயர் கோல்டர் ஸ்டீவன்ஸ். தேசிய ராணுவ ஹெலிகாப்டர் சாரதிகளில் ஒருவன். ஆப்கானிஸ்தானில் நடந்த போரில் துரதிர்ஷ்டவசமாக மரணமடைந்திருக்கிறான்.
bயின் பெயர் சீன் வென்ட்ரஸ். ஒரு ஆசிரியர். புகையிரதத்தில் அவருக்கு எதிரே அமர்ந்திருந்த பெண் க்றிஸ்டினா.

சோர்ஸ் கோடை கண்டுபிடித்த டொக்டர்.ரட்லெஜ், மற்றும் அவரது உதவியாளராக வரும்பெண் குட்வின் இருவரும் சேர்ந்து ஆய்வுகூடத்தில் ஸ்டீவன்ஸின் சமீபத்தைய நினைவுகளை (போரில் இறத்தல், சோர்ஸ் கோடுக்கு அனுப்பப்படல் போன்றவை) அழித்து சோர்ஸ் கோடிற்குள் அனுப்புகிறார்கள்.

புகையிரதத்தில் 1வது மிஷனுக்காக அனுப்பப்படும் ஸ்டீவன்ஸிற்கு ஒரே குழப்பம்... ஆப்கானிஸ்தானுக்கு ஹெலிகொப்டரில் பயனித்துக் கொண்டிருந்த நான் எப்படி இந்த புகையிரதத்தில் வந்தேன்? முன்னாலிருக்கும் பெண் (க்றிஸ்டினா) யார்? என்னைத் தெரிந்தது போல் சகஜமாக கதைக்கிறாளே??.. குழப்பங்களுக்கு மத்தியில் 1வது மிஷன் தோல்வியில் முடிந்து, ஆய்வுகூடத்திற்கு திரும்புகிறான்..
அங்கு குட்வின் "அவன் ஏன் அனுப்பப்படுகிறான்" என்பதையும் "எவ்வளவு குறைந்த மிஷன்களில் வேலையை முடிக்கிறானோ, அவ்வளவு சீக்கிரம் அடுத்த தாக்குதலை நிறுத்தலாம்" என்பதையும் நன்கு விளக்கி 2வது தடவையாக சோர்ஸ் கோடுக்குள் அனுப்புகிறார்.

சோர்ஸ் கோடைப் பொறுத்த வரையிலும் சின்ன தியரி ஒன்றுண்டு..
சோர்ஸ் கோடில் இருப்பவர்கள் எல்லோரும் குண்டுவெடிப்பில் இறந்தவர்களென்பதால் ஒவ்வொரு மிஷனிலும் அவர்களது நினைவுகள் பழையதிலிருந்தே தொடங்கும்..
ஆனால் சோர்ஸ் கோடுக்குள் அனுப்பப்படுபவருக்கு (ஸ்டீவன்ஸ்) நிஜ உலகிலும், சமாந்தர மெய்நிகர் உலகில் நடக்கும் விடயங்கள் யாவும் மூளையில் சேமிக்கப்பட்டுக் கொண்டிருக்கும். காரணம் ஸ்டீவன்ஸ் இறந்திருந்தாலும், அவரது முளை ஆய்வு கூடத்தில் செயற்கையாக செயற்பட வைக்கப்படுகிறது!!

தொடர்ந்து அனுப்பப்படும் ஸ்டீவன்ஸ் கிறிஸ்டினா மேல் இனந்தெரியாத அன்பை வளர்த்துக் கொள்கிறான்.. அதனால் ஒரு மிஷனில் அவளை ரயிலிலிருந்து வெளியே கொண்டுசென்று குண்டு வெடிப்பிலிருந்து காப்பாற்றுமளவிற்கும் துணிகிறான்..
அவனுக்கு தரப்பட்ட எட்டு நிமிடங்கள் முடிகின்றன.....

(குழப்பங்கள் தொடரும்!!)

Mars needs Moms (2011)

2011-07-16T23:40:00.000-07:00

செவ்வாய்க் கிரகத்தில் புதிதாக பிறக்கும் குழந்தைகளை கவனித்துக் கொள்வதற்காக ரோபோ-அம்மாக்கள் உருவாக்கப்படுகின்றன. அவற்றை பயிற்றுவிப்பதற்காக பூமியிலுள்ள ஏதாவது கண்டிப்பான அம்மாவை கடத்திக் கொண்டு வர வேண்டும் என செவ்வாய் கிரகத்தின் வில்லி + தலைவியாக உள்ள சூப்பர்வைசர் தீவிரமாக தேடுகிறாள்...

ஆவி ரஜினியை கூட்டிக் கொண்டுவந்து "உனக்கு எந்த உடம்பு வேணும்?"னு கேட்டது போல, இங்கேயும் "கீ" அப்படீங்கற ஏலியன் ஹை-டெக்-திரையில் சூப்பர்வைசரிடம் ஒவ்வொரு அம்மாவாக காட்டிக் கொண்டே வருகிறாள். இறுதியில் கண்டிப்பான ஒரு அம்மாவை செலெக்ட் செய்கிறார்கள்..

இந்த கீ இருக்காளே, செவ்வாயிலேயே புரட்சிகரமான ஏலியன் அவள்தான்.. எப்போதோ பூமியைப் பற்றிப் பார்த்த வீடியோவை வைத்துக் கொண்டு, பூமியைப் போல செவ்வாயையும் கலர்புல்லாக மாற்ற வேண்டும் என்ற எண்ணத்துடன், முக்கியமான கட்டங்களின் மீது ரகசியமாக வண்ணங்களைத் தீட்டி மினி-புரட்சி நடத்துகிறாள்..

இதற்கிடையே பூமியில் சுட்டித்தனமான 9 வயது பையனாக வருகிறான் ஹீரோ "மைலோ". அவனது அப்பா வணிக விஷயமாக வெளியூர் போயிருக்கிறார். மைலோவின் அம்மாவோ (செலெக்ட் பண்ண அதே அம்மாதான்!) அவனை "இத செய், இத செய்யாதே!!"ன்னு கண்டிஷன் போட்டே வெறுப்பேற்றுகிறார். இதனாலேயே இருவருக்கும் வாக்குவாதம் ஏற்படுகிறது. ஒரு கட்டத்தில், "இப்படி ஒரு அம்மா கிடைக்காமல் இருந்திருந்தால், என் வாழ்க்கையே நல்லா இருந்திருக்கும்!"னு ஏதோ ஆவேசத்துல மைலோ பேசி விடுகிறான்.

அன்று இரவு முழுக்க மைலோவுக்கு தூக்கமேயில்லை.. தவறை உணர்ந்து அம்மாவிடம் மன்னிப்பு கேட்க செல்கிறான். அங்கே ஒரு விண்கலத்தில் அம்மாவை யாரோ கடத்திக் கொண்டு செல்வதைப் பார்த்து, ஓடிப் போய் அதில் பற்றிக் கொண்டு அவனும் செவ்வாய் போய் இறங்குகிறான்!!

அம்மாவிடமிருந்து தாய்மைப் பண்புகளை எடுப்பதற்காக தன் அம்மாவை கொன்று விடுவார்கள் என்பதையும் அங்கு சென்று அறிகிறான். அம்மவைக் காப்பாற்ற 3 பேரின் உதவியை நாடுகிறான்.. 1வது - க்றிப்ளர் (மைலோவைப் போன்ற சூழ்நிலையிலேயே செவ்வாய்க்கு சிறுவனாக வந்து பல ஆண்டுகளாக அங்கு வாழ்ந்து வரும் ஆசாமி), 2வது "பேக்கர்" எனப்படும் கிறிப்ளரின் செல்ல பயோனிக்-நாய்க்குட்டி, 3வது கீ!
சூப்பர்வைசரையும், அவளது கட்டளையின் கீழ் இயங்கும் ஆயிரக்கணக்கான ஏலியன்களையும் தாண்டிப் போய் அம்மாவைக் காப்பாற்ற மைலோவுக்கு இருப்பது வெறும் 5 மணித்தியாலங்கள் மட்டுமே!!!

டிஸ்னி பிக்சர்ஸோட இந்த வருஷத்து பந்தயக் குதிரை இந்தப் படம்தான்.. ஆனால் படம் ரிலீசாக முதல்நாள் வரைக்கும் நெறய பேருக்கு இப்படி ஒரு படம் வருவதாகவே தெரியாது.. 2010 இறுதியில் வழக்கமாக வெளியிடப்பட்ட "அடுத்த வருடத்திற்கான எதிர்பார்ப்புக்குரிய படங்கள்"- லிஸ்டுலயும் இந்தப்படம் பெரும்பாலும் இருக்கவில்லை.. காரணம் டிஸ்னி விளம்பரப்படுத்தல்ல கவனம் செலுத்தாமை..
விளைவு??... ஒன்று, இரண்டல்ல.. 111 மில்லியன் நட்டம்!!! இந்த ஆண்டுக்கான மிகப்பெரிய கமர்ஷியல் ப்ளொப் இதுவாத்தான் இருக்கனும்..

அதுக்காக படம் "படு மட்டம்"னும் சொல்லிவிட முடியாது. காரணம் கண்ணை ஈர்த்து வைத்திருக்கும் அனிமேஷன். பெரிய வீடியோ கேம்களில், கதை சொல்லும் காட்சிகளின் போதிருக்குமே.. அப்படிப்பட்ட தரத்துல ஒரு அனிமேஷன்!!
படத்துல பூமியில் நடக்கும் காட்சிகளில் அமைப்பும், அசைவும் நேர்த்தியாக பொருந்துகிறது. செவ்வாய்க்கிரகத்திற்கு கூட்டிக்கிட்டு போனதன் பின் புவியீர்ப்பு விசை குறைந்து போனதாக சித்தரிக்கும் போதுதான் உறுத்தல் தொடங்குகிறது..

இதற்கிடையே கதாப்பாத்திரங்கள் வேறு சிற்சில இடங்களில் ஓவர் ரியாக்ட் செய்வது போலுள்ளது.. பார்த்துக் கொண்டிருக்கும் போதே நமக்கு டிஸ்னிக்கும் பிக்சாருக்கும் உள்ள வித்தியாசம் தெள்ளத் தெளிவாகிறது.
படத்தின் கடைசி 30 நிமிடங்களில் அம்மா சென்டிமென்ட் வெள்ளமாக வழிந்தோடுகிறது.. ஆனால் மீதிக் கதையை யூகிப்பதும் இலகுவாகிக் கொண்டே செல்கிறது..

படத்தில் வரும் ஜோர்ஜ் ரிப்ளரின் (சுருக்கி "கிறிப்ளர்"..) ப்ளாஷ்பேக் கதையில் காட்டிய ஆர்வத்தைக் கூட ஒட்டுமொத்தப் படத்தின் கதையில் காட்டவில்லை!! சுவாரஷ்யம் அப்பப்போ வந்து போவதால், படம் மனதுடன் ஒட்ட மறுக்கிறது!!

பாத்திரங்கள்- 17
அனிமேஷன்-14
பின்னணித் தரவுகள்- 11
கதை+திரைக்கதை- 08
இயக்கம்-10

மொத்தம்- 60% நன்று

Rio (2011)

2011-06-04T22:16:00.000-07:00

என்னடா Kung fu Panda 2 எழுத வேண்டிய நேரத்துல "ரியோ" பத்தி எழுதுறானேன்னு யோசிக்கிறீங்களா.. நான் இன்னும் குங்பூ பன்டா 2 பார்க்கவில்லை.. இருந்தாலும் கும்பலோட கோவிந்தாவா இந்தப் பதிவையும் கலந்து விட்டுட்டம்னா யாருக்கும் எது புதுசு? எது பழசுன்னு தெரியாதில்லையா?? அதுதான்..

உலகத்துலயே ரொம்பவும் ஹேப்பியான சிட்டி எது தெரியுமா?? அட.. ரியோடி-ஜெனீரா தாங்க! இத நான் சொல்லல...(சொன்னா மட்டும் ஏத்துக்கவா போறீங்க?) "Forbes" சஞ்சிகை சொல்லுது..
காரணம் அங்கே இருக்க மக்களுக்கு எப்பவுமே ஆட்டம் பாட்டம் தான்!! கொண்டாடுறதுக்கு சின்னதா ஒரு மேட்டர் கிடைச்சா போதும் ஊரே களைகட்டுமாம்..
நம்பலைன்னா இந்த வீடியோவ பாருங்க... இது இந்த வருஷத்துக்கான கார்னிவலில் நடந்த கொண்டாட்டம்!!!

நம்ம படத்தோட கதையும் அங்க தான் நடக்குது.. சின்ன வயசுலயிருந்தே பறக்க கத்துக்காம விட்ட ஒரு நீலவண்ணக்கிளி தான் ஹீரோ.. பேரு ப்ளூ!! அது பாட்டுக்கு தன்னை எடுத்து வளர்த்த லின்டாவுடன் சேர்ந்து சொகுசு வாழ்க்கை வாழ்கிறது!!
காலையில் எழுந்திருக்கறது.. நாள் பூரா லின்டாவுடன் சேர்ந்து லைப்ரரியை கவனிச்சுக்கறது... மாலையில ஜன்னலோரமா காலைநீட்டி, உட்கார்ந்து டீ குடிக்கிறது.. ராத்திரியில எப்படிடா பறக்கலாம்-ங்கறதுக்கு சயின்டிபிக் புத்தகங்களை திறந்து வைச்சுகிட்டு ஆராய்ச்சி பண்றது.. ராஜா மாதிரி வாழ்க்கை!!

திடீர்னு ஒரு நாள் பிரேசில்ல இருந்து டூலியோ-ங்கற பறவை ஆராய்ச்சியாளர் ஒருத்தர் வந்து, ப்ளூவோட இனம் ரொம்ப அரிதாகி விட்டது. தன்னிடம் ஒரு பெண்பறவை இருப்பதாகவும், அதனுடன் ப்ளூவை இனம்பெருக விட்டுத்தான் இனத்தையே அழிவுலருந்து காப்பாற்றலாம்னும் கெஞ்சிக் கேட்கிறான். முதல்ல மறுத்தாலும், பிறகு ஒருவாறாக ஒத்துக் கொண்டு ப்ளூவையும் கூட்டிட்டு ரியோ-டி-ஜெனீராவுக்ககு கிளம்புகிறார்கள்..

அங்கே ப்ளூவும் "ஜுவல்" அப்படீங்கற பெண் நீலவண்ணக்கிளியும் ஒரே கூண்டுக்குள்... ஜுவலுக்கோ சுதந்திரமாக இருக்க விருப்பம்-ங்கறதால தொடர்ந்து அங்கேயிருந்து தப்பிக்க தொடர்ந்து பல முயற்சிகளை மேற்கொள்கிறது.. ஆனால ப்ளூவுக்கோ கூண்டுக்குள் இருந்தாதான் பாதுகாப்பே!!
வெளியில இருந்துகிட்டு டூலியோ இரண்டு பறவைகளுக்ககுள்ளும் கிளுகிளுப்பை உண்டுபண்ண மேற்கொள்ளும் நடவடிக்கைகளும், அதுக்கு ரியோ அப்பாவியாய் முழிக்கும் ரியாக்ஷன்களும் செம காமடி!! இரண்டுக்கும் கடைசிவரை ஒத்துப்போகவேயில்லை.. ப்ளூ தனக்கு பறக்க முடியாதுங்கறதை ஜுவலிடமிருந்து மறைக்கிறது..

அன்றிரவு அதே பறவைகள் காப்பகத்துல இருக்கும் நைஜல்-ங்கற cockatooவோட (சரியான தமிழ்வடிவம் என்னன்னு தெரியல..) உதவியுடன் "மார்செல்" என்பவனின் தலைமியிலான கடத்தற்காரர் குழு கடத்திச் சென்றுவிடுகிறது. ஆனால் அங்கிருந்து ப்ளூவும், ஜுவலும் ஒரு வழியாக தப்பித்து விடுகின்றன.
இது தெரிந்த மார்செல் ரென்டு கிளிகளையும் தேடிப்பிடிக்கும் பொறுப்பை நைஜலிடம் ஒப்படைக்கின்றான்..

அதே நேரம் மார்செலிடம் வேலை பார்த்து, பின்னர் ஏமாற்றப்பட்டு திரும்பும் "பெர்னான்டோ" எனும் சிறுவன் லின்டாதான் ப்ளூவுக்கு சொந்தக்காரர் என்று தெரிந்ததும், அவளுக்கு உதவி செய்ய முன்வருகின்றான்.. பறக்க முடியாத ப்ளூவும், சுதந்திரத்தை விரும்பும் ஜுவலும் நைஜலிடமிருந்து தப்பித்தார்களா?? ப்ளு லின்டாவுடன் போய்ச் சேர்ந்தானா என்பது மீதிக்கதை!!

அனிமேஷன் படங்களுக்கு முழு செட்டிங்கா ரியோ -டி-ஜெனீராவை எடுப்பது இதுதான் முதல்முறை என்பதால் காட்சிகள் ஒவ்வொன்றும் ஈர்க்கிறது.. படத்தோட ஆரம்ப பாடல் மெகா கலர்புல்.. ஏனைய பாடல்களும் நிச்சயம் ரசிக்க வைக்கும்!!

டைரக்டர் Carlos Saldanha-உம் இதே ஊரு தானாம். பிறந்த மண்ணுக்கு பெருமை சேர்க்கறதுன்னா என்னான்னு எல்லாரும் இந்த படத்தை பார்த்து தெரிஞ்சுக்குங்கோ!!
படம் முழுக்க சிரிக்க வைக்க ஏராளமான காமெடி சீன்கள்.. உண்மையை சொல்லப்போனா படத்துல "ஜுவல், நைஜல், மார்செல்".. இந்த மூணு பேரத் தவிர மீதி எல்லாமே காமெடிப்பீஸுகள்தான்!!!

படத்துல என்னை மிகவும் கவர்ந்த கேரக்டர் அந்த "பெர்னான்டோ" பையன்தான்!! அவன் கண்களை ஒருதடவை கவனிச்சுப் பாருங்க.. ஏக்கம், தவிப்பு எல்லாதே தத்ருபமா தெரியுது.. கடைசி சீன்ல லின்டா, டூலியோவோட பெர்னான்டோவும் சேரும் சீன்.. சோ ஸ்வீட்!!
"ஐஸ் ஏஜ்"க்கு அப்புறம் ப்ளூஸ்கை ஸ்டூடியோஸ் ரொம்பவும் மெனக்கெட்டு நேர்த்தியான படத்தை கொடுத்திருக்காங்க.. இந்த வருஸத்துக்கான ஒஸ்காருல கண்டிப்பா பிக்ஸாரோட "Cars-2"க்கு இது ஒரு போட்டிதான்!!

பாத்திரங்கள்- 18
அனிமேஷன்-17
பின்னணித் தரவுகள்- 18
கதை+திரைக்கதை- 16
இயக்கம்-15

மொத்தம்- 84% சூப்பர்!!

Love (2011)

2011-05-25T09:23:00.000-07:00

இது ஜெனிஃபர் லோபஸோட 7வது ஸ்டூடியோ ஆல்பம்.. எனக்கு ஜெனிபர் லோபஸை சுத்தமாக பிடிக்காது.. காரணம் "அமெரிக்கன் ஐடல்"ல அவ போடுற கூத்து இருக்கே.. சுத்தமா பிடிக்கல!

இந்த ஆல்பத்த 2009ல ஆரம்பிச்சு, 2010ல முடிக்கறதா சொல்லி... 2011 ஏப்ரல் 8ல வெளியிட்டிருக்காங்க..

சரி அத விடுவோம்.. ஜெனிபரோட அத்தனை ஆல்பத்துலயும் இதுதான் ரொம்ப பெர்சனலானதுன்னு ஒரு பேட்டியில வேற சொல்லியிருக்காங்க.. காரணம் அவங்களோட ரெட்டைக் குழந்தைகளான Emme, Max பிறக்கவிருந்த போது பாடிய ஆல்பம் இது! (அப்புறம் எப்படி குழந்தைகள் தப்பிச்சுது??)
அத தவிர வேற அப்படி என்னதான் இதுல இருக்கு??

11 பாடல்கள்... 5 போனஸ் பாடல்கள்.. பிரபல ராப்பர் பிட்புல்லோட சேர்ந்து பாடிய On the Floor-உம், அதோட ரீமிக்ஸ் வேர்ஷனும் இருக்கு.. லேடி காகா 2 பாட்டு எழுதியிருக்காங்க.. மிச்சத்த நீங்களே கேட்டு தெரிஞ்சுக்கோங்க!

ஒரே ஒரு அறிவுறுத்தல்.. கீழே பட்டியல் படுத்தப்பட்டவற்றை தவிர்த்து, இந்த ஆல்பத்தோட ஏனைய பாடலகளை கேட்பதன் மூலம், உங்கள் வாழ்க்கையின் 4,5 பொன்னான நிமிடங்களை வீணடித்துக் கொள்ள வேண்டாம்!!

இப்ப டாப் 5க்கு போலாம்...

5. Take Care
"simple. but sweet"னு சொல்லுவாங்கள்ல.. அந்த டைப் தான் இது! போனஸ் ட்ராக்கா வந்த இது கொஞ்சம் hip hop கலந்தா மாதிரி இருக்கும், கண்டிப்பா புடிக்கும்!!

Download

4. Papi
ஜெனிபர் லோபஸின் லத்தீன் ரசிகர்களுக்காகவே பிரத்தியேகமாக வடிவமைக்கப்பட்டது.. ரொம்ப டீசன்டான, திரும்பவும் கேட்கத் தூண்டும் ஒரு பாட்டு..

Download

3. Hypnotico
இந்த ஆல்பத்துல மொத்தம் ரெண்டு காகா&ரெட்-வன் காம்பினேஷன் இருக்கு.. ரெண்டுமே சூப்பர் ஹிட்.. அதுல முதலாவது இது!!.. கேட்கும் போதே உங்களையும் மீறிப் பாட வைக்கும் பாட்டுக்களில் ஒன்று..

Download

2. Invading My mind
இதுதான் அந்த ரெண்டாவது காகா & ரெட்-வன் காம்பினேஷன்.. இதுல எத முன்னுக்கு போடுறது-ங்கறதுல பெரிய கன்பியூஷன்.. இதனால ரெண்டுத்தோடயும் வரிகளை எடுத்து பார்த்தேன்.. இதுல கொஞ்சமாவது அர்த்தம் இருக்கு!!!
"Isn't it invading your mind?"

Download

1. On the Floor
இந்தப் பாட்டை நீங்க இன்னும் கேட்கலைன்னா லோபஸோட சாபம் உங்களை சும்மா விடாது!! ஆல்பத்தோட ஓப்பனிங் ஸாங்-கான இது கிட்டத்தட்ட ஜெனிபரின் கேரியர்ல ஒரு மைற்கல்.. இன்னும் UK டாப்-டென்னுல இருக்குன்னா பார்த்துக்கோங்களேன்!! இப்பதான் எட்டு வருஷத்துக்கு அப்புறம் ஜெனிபரால இந்த டாப்-டென் அந்தஸ்தையே பிடிக்க முடிந்தது..

Download

Create a playlist at MixPod.com

WWE (2010)

2011-05-25T09:21:00.000-07:00

முதலாவது மியூசிக் முயற்சிங்கறதால எனக்கு மிகவும் பரிச்சயமான ஆல்பமொன்றிலிருந்து ஆரம்பிக்கின்றேன்.
உலகத்தின் முதல்தர ரெஸ்லிங் (மல்யுத்த) நிறுவனமான World Wrestling Entertainment ஒவ்வொரு வருடமும் வீரர்களின் பின்னணி இசையைத் தொகுத்து வெளியிடும். இதுல எதுவும் ஸ்பெஷாலிட்டின்னு இல்லைதான். ஆனாலும் உங்களுக்கு அடித்து துவைக்கும் கோபமான / ரொம்பவே ஸ்டைலான பாடல்கள் தான் வேண்டுமென்றால் தாராளமாக இவற்றை நாடலாம்..

என் ஐ-பாடில் 25% ற்கும் மேலான இடத்தை இவ்வகைப் பாடல்கள் தான் நிரப்புகின்றன.. பல பாடல்கள் வெறும் இசையை (வரிகளற்ற) மட்டுமே கொண்டிருக்கின்றன. ஆனளால் நான் இங்கு வரிகள் கொண்ட பாடல்களை மட்டுமே பட்டியல் படுத்துகிறேன்.

Honorable Mentions

Here Comes the Money - இந்தப் பாட்டை நீங்க இப்ப கிட்டத்துல வந்த சீ.டிக்கள்ல தேடினா கிடைக்காது.. காரணம் இதுக்கு சொந்தக்காரர் இப்ப விளையாட வருவதில்லை. ஆனாலும் இது ஒரு செம ஹிட் பாடல். "காசை வைச்சு எதையும் வாங்கலாம்"னு நினைப்பவர்களுக்கெல்லாம் கனகச்சிதமாக பொருந்தக் கூடியது. என்னோட ஆல் டைம் பேவரிட் ரெஸ்லிங் பாடலும் இதுதான்.

Download

The Game - இதுவும் நல்ல அருமையான, ஆனால் ரொம்பவே "வில்லத்தனமான பாட்டு". Triple H அப்படிங்கறவரோட பின்னணியில் ஒலிக்கும் இது அவருக்காகவே எழுதப்பட்டது போல இருக்கும்.

Download

இப்போ டாப் 5

5. Broken Dreams

ரெஸ்லிங் பாட்டுக்கள் எல்லாமே வாய் கிழிய கத்துறதும், தடபட -ன்னு ட்ரம் வாசிக்கிறதும் தான்னு நினைச்சீங்கன்னா உங்க கருத்தை மாத்திக்குங்க.. ஏன்னா இது மென்மையான, ஆனால் ஆழமான வரிகளையுடைய பாடல். இதை எழுதின Shaman's Harvest க்ரூப்போட "ட்ராகன்ப்ளை" பாட்டு ரொம்பவே பிரபல்யமானது.

Download

4. Ain't no Grave

ரெஸ்லிங் தெரியாத பலருக்கும் கூட Undertaker-ஐப் பத்தி தெரிஞ்சிருக்கும். இவரோட பின்னணி இசைகள் எப்போதும் மரணத்தோட சம்பந்தப் பட்ட வரிகளையோ அல்லது ஒலிகளையோ கொண்டிருக்கும். இதுவும் அப்படித்தான். இந்தப் பாட்டை முதல்ல கேட்கும் போது எனக்கு சுத்தமாக பிடிக்கவில்லை.. பாட்டின் "ஸ்லோ டோன்" Undertakerக்கு செட்டாகாதமாதிரி தோன்றியது. பிறகு தொடர்ந்து கேட்டபோது, என்னையும் மீறி பாட்டு என்னை ஈர்க்கத்தொடங்கிவிட்டது.
மறைந்த பாடகர் Johnny Cashன் நினைவாக அவர் பாடிய இப் பாடல் போன வருஷம் அவரது குடும்பத்தாரால் வெளியிடப்பட்டது.

Download

3. I Came to Play

டாப் 3 பாட்டுமே ஹை-பிட்ச் பாட்டுக்கள்.. அமெரிக்காவின் hard-rock வகையைச் சார்ந்த Downstait குழுவினரால் வெளியிடப் பட்ட பாடலின் எடிட் பண்ணிய வேர்ஷன் தான் இது! கேளுங்கள்.. கண்டிப்பாக பிடிக்கும்!!

Download

2. Just Close Your Eyes

என்னோட பேவரிட் ரெஸ்லிங் வீரர் Christian உடைய பின்னணிப் பாடல் இது. முதலில் கவனிக்கப் படாமல் இருந்து பின்னர் இணையவழி ரசிகர்களால் பெரிதும் கேட்கப்பட்ட பாடல் இது. மாறுபட்ட இதன் வரிகள் உங்களை மீண்டும் மீண்டும் கேட்கத் தூண்டும்..

Download

1. Voices

Perfect... இதைத் தவிர இந்தப் பாடலை வர்ணிக்க வேறு வார்த்தைகளே இல்லை! எப்படித்தான் Randy Ortonக்கு மட்டும் நல்ல நல்ல பாட்டுக்களா சிக்குதோ தெரியல்லை.. இவரோ பழைய பின்னணிப் பாடலான "Burn In my Light" சூப்பர்.. ரெஸ்லிங் பாடல்களுக்கு பெயர போன Rev-Theory க்ரூப்பால் பாடப்பட்டதாலோ என்னவோ, இந்தப் பாடல் அதையும் தூக்கி சாப்பிடும் அளவுக்கு பிரமாதமாக இருக்கிறது.
கேட்டுத்தான் பாருங்களேன்.....

Download

கீழே இருக்கும் மினி-பாடில் குறிப்பிடப்பட்ட 7 பாடல்களும் போடப்பட்டுள்ளன.. மறக்காமல் கேட்டுவிட்டுச் செல்லுங்கள்!!

Create a playlist at MixPod.com

Little Big Soldier (2010)

2011-05-23T05:36:00.000-07:00

ஜாக்கி சான்... உண்மையான உலக நாயகன்.. சொந்த நாட்டு சிலம்பக் கலையே தெரியாதவன்கூட, தேடித் தேடிப்போய் கராத்தே, குங்ஃபூன்னு கத்துக்க முக்கியமான காரணகர்த்தா!! 25 - 30 வயசுல கூட டூப் போட்டு சண்டை பிடிக்கிற ஹீரோக்களுக்கு மத்தியில 60 வயசுலயும் ரிஸ்க் எடுத்து கலக்குற அதிரடி ராஜா!! குறும்புத்தனமான அசைவுகளாலும், "ஈ.."ன்னு இளிக்கிற "பச்சப்புள்ள" சிரிப்பாலயும், குழந்தை முதல் கிழவன் வரை சுண்டியிழுக்கும் "நம்ம வீட்டு பிள்ளை!".. வேறென்னத்த சொல்ல ஜாக்கியைப் பற்றி??

இந்த ஜாக்கிக்கு இந்த வருஷம் ரொம்பவே ஸ்பெஷலான ஒரு வருஷம்... காரணம் இவரு செஞ்சுரி அடிக்கும் படமான 1911 இந்த வருஷ இறுதியில் வெளியாகிறது.. அதற்கு முதல் வெளிவந்த, அதாவது அவரோட 99வது படம் தான் இந்த லிட்டில் பிக் சோல்ஜர்!

17ம்-18ம் நூற்றாண்டளவில் சரமாரியான தாக்குதல்களுக்கு உள்ளாகி, பெருக்கெடுதோடிய ரத்த வெள்ளத்துக்கும், வறட்சிக்கும் இடையே சீனா தத்தளித்துக் கொண்டிருந்த காலகட்டத்தில் தான் கதை நகர்கிறது... சீனா முழுதினதும் ஆட்சியைப் பிடித்துக் கொள்ள மாநிலத் தலைவர்கள் உக்கிரமாக தாக்குதல் நடத்தினரே தவிர, இதனால் தங்கள் மக்களுக்கு ஏற்பட நேர்ந்த அவல நிலையைப் பற்றி சற்றும் சிந்திக்காது கண்மூடித்தனமாக செயற்பட்ட காலமிது!!

அப்போதைய சீனாவிலிருந்த படைவீரர்களெல்லாம் கிட்டத்தட்ட அடிமைகள் மாதிரி.. அவர்களது வாழ்நாள் முழுதும் ராணுவ சேவையிலேயே கழிக்க வேண்டும்.. சொந்த ஊரைப் பற்றியோ, குடும்பத்தை பற்றியோ நினைத்தும் பார்க்க முடியாது. மீறித் தப்பித்துச் சென்று, பிடிபட்டாலோ சாவடி தான்!! உயிர் தப்பாது!!

லியாங், வேய் என்பன எப்போதும் முரண்பட்டுக் கொண்டேயிருக்கும் இரண்டு அண்டை மாநிலங்கள். லியாங் மாநிலத்தின் அடிமட்ட போர்வீரனாக வரும் ஜாக்கி தான் ஹீரோ.. இளமைக்காலம் முழுதையும் போருக்கு தொலைத்து தனது 40களில் வாழும் துரதிருஷ்டசாலி... இவனுக்கு பெரிதாக சண்டை தெரியாது. ஆனால் இறந்து விட்டதைப் போல நடிப்பதில் படு கில்லாடி!! உடலில் செங்குத்தாக குத்தக்கூடிய சிறிய போலி அம்பை போட்டுக் கொண்டு ஏதோ வீர மரணம் அடைந்ததைப் போல படுத்துவிடுவான்..

அப்படித்தான் கடைசியாக நடந்த மாபெரும் போரிலும், சின்ன வெட்டுக் காயமுமின்றித் தப்பித்து விடுகிறான். சுற்று முற்றிலும் ஆயிரக்கணக்கான இறந்த உடல்கள்.. கூடிய விரைவில் அந்தப் போரின் முடிவில் இன்னுமொருவனும் உயிருடன் இருப்பதைக் கண்டுபிடிக்கிறான்... அவன் வேய் படைத் தளபதி.. லீ ஹொம் வாங்! ஆனால் தாக்குதலுக்கு இலக்காகி நடக்கக்கூட முடியாத நிலையில்!!

ஜாக்கி முகத்தில் சந்தோஷத் தாண்டவம்!! இந்த வேய் படைத் தளபதியை மட்டும் தனது மன்னனிடம் சென்று ஒப்படைத்தால் போதும்... அடிமை வாழக்கையிலிருந்து விடுதலை பெற்று, முழு சுதந்திரத்துடன் சொந்த ஊருக்குச சென்று, தனது மீதி வாழ்க்கைக் காலத்தையாவது நிம்மதியாக கழிக்கலாம் என்ற எண்ணத்துடன் லீயைக் கட்டிப் போட்டு லியாங்கிற்கு தமது பயணத்தை இருவரும் தொடங்குகின்றனர்.

இதற்கிடையே லீயின் இளைய சகோதரன், தனது சகோதரனைக் கொன்று பதவியைப் பறிக்கும் நோக்குடன் அவனை தீவிரமாக தேடியலைகிறான். ஜாக்கியால் லீயை பத்திரமாக சமர்ப்பிக்க முடிந்ததா?? அவன் விரும்பிய வாழ்க்கை அவனுக்கு கிடைத்ததா?? என்பதே மீதிக்கதை...

லீயை "லிட்டில் சோல்ஜராகவும்" ஜாக்கியை "பிக் சோல்ஜராகவும்" கொண்டு கதை நகர்கிறது.

இந்த லீயிருக்கானே.. சின்ன வயசு தான்னாலும், பெரிய தன்மானக்காரன்... படைவீரர்களைப் பற்றி இகழ்ந்து பேசியதற்காக தன்னைக் காப்பாற்றியவனைக் கூட வெட்டிக் கொன்றுவிடுகிறான்.. லியாங் அரசனிடம் மாட்டுவதைவிட சாவே மேல் என எண்ணி பல தடவை தற்கொலைக்கும் முயற்சிக்கிறான்...

வழக்கமான ஜாக்கி படங்களை விட இதில் ஆக்ஷனும், சிரிப்பும் குறைவாகவே இருக்கிறது.. ஜாக்கி தனது கோமாளித்தனத்தால் படம் முழுதும் எம்மை ஈர்க்கிறார். படம் முழுதும் ஒரே "டஸ்க்" செட்டிங் என்பதை அடிக்கடி உணர்வீர்கள்.. மரம் இருக்கும், நீர் இருக்கும்.. ஆனால் கலர் இல்லை. திடீரென்று ஜாக்கியின் கனவில் பச்சைப் பசேலாக வந்தவுடன், நிஜமாகவே எங்களுக்கும் ஜாக்கியின் சொந்த ஊருக்கு போய்விட வேண்டும் போலிருக்கும்!!!

இந்த கதையை 20 வருஷத்துக்கு முன்னாடி ஜாக்கி, தன்னை "லிட்டில் சோல்ஜராக" நினைத்துதான் எழுதினாராம். ஏதோ தடங்கல்களால் பல வருடங்கள் கழித்து, இதைப் படமாக்கும் வாய்ப்பு வரவே "பிக் சோல்ஜராக" நடிக்க ஒப்புக்கொண்டிருக்கிறார்.. ஆனாலும் லிட்டில் சோல்ஜர் யாரென்பதில் சிக்கல். ஜாக்கிக்கு "டானியல் வூ" வை நடிக்க வைக்க ஆசை.. ஆனால் ஜாக்கியின் மனைவிக்கோ தங்கள் மகன் "ஜெய்சீ சான்"-ஐ நடிக்க வைக்க ஆசை. பின்னர் இரண்டும் மிஸ்ஸாகி லீஹொமை நடிக்க வைத்திருக்கின்றனராம்!!

ரேட்டிங்ஸ்,

நடிப்பு = 17
இசை = 15
கதை+திரைக்கதை = 16
கலை+ஒளிப்பதிவு = 14
இயக்கம் = 16

மொத்தம் = 78% மிக நன்று

Alpha and Omega (2010)

2011-05-15T21:09:00.000-07:00

லேடி அன்ட் த ட்ராம்ப் பதிவிற்கு அடுத்ததாக இதை எழுதுவதால் இரண்டு படங்களையும் ஒப்பிடுகிறேன் என்று மட்டும் எண்ணி விட வேண்டாம்.. இந்தப் படத்தின் கால்தூசிக்கு கூட இது வருமா என்பது சந்தேகமே.. இந்தப் படம் கிட்டத் தட்ட போன வருஷத்தில் வந்த ஒரு அனிமேஷன் குப்பை!

கனடாவிலுள்ள "ஜஸ்பர்" நேஷனல் பார்க்கிலுள்ள கேட், ஹம்ப்ரே எனும் இரண்டு ஓநாய்கள் தான் கதையின் காதல் ஜோடிகள். கேட் ஓநாய் சாதியிலேயே (இங்கேயுமா!!) உயர்ந்த அல்பா சாதித் தலைவனின் மகள். ஆனால் ஹம்ப்ரே தாழ்ந்த "ஒமேகா" இனத்தை சேர்ந்தவன்.
அல்பா ஓநாய்களுக்குள்ளேயே இரண்டு பிரிவு உண்டு. ஒன்று கிழக்கு பிரதேசத்தை சேர்ந்தவர்கள். மற்றையவர்கள் மேற்கு..

மேற்கு அல்பா தலைவனான வின்ஸ்டன் தனது மகளான கேட்டை, கிழக்கு அல்பா தலைவனான டோனியின் மகன் கார்த்-இற்கு கட்டி வைத்து இரண்டு பிரிவையும் ஒருங்கிணைக்க முயற்சிகள் எடுக்கிறார்! (கிட்டத்தட்ட) நிச்சயதார்த்த இரவன்று கேட்டும், கார்த்தும் சந்திக்கிறார்கள். கார்த், கேட் போலவே நன்று பயிற்சியளிக்கப்பட்டவனாய் இருக்கிறான். இருந்தாலும் ஒரு சின்ன குறை... கார்த்தின் ஊளையை சகிக்கவே முடியாது. (அவன் ஊளையிடும்போது அவனுக்கு மேலாகப் பறக்கும் குருவிகள் கூட விழுந்து இறக்கும் என்றால் பார்த்துக்கொள்ளுங்கள்!!)

ஒரு ஓநாய் தன்னுடைய துணை ஓநாயைக் கண்டுபிடிப்பதே ஊளையிடுவதில் தானாம்.. கார்த்தின் ஊளையை பொறுக்க முடியாமல் தப்பித்துச் செல்லும் போதுதான் கேட் ஹம்ப்ரேயை சந்திக்கிறாள்!! இருவரும் வெட்டியாக பேசிக் கொண்டிருக்கும் போதே எங்கிருந்தோ வந்த இரண்டு மனிதர்கள் இவர்களுக்கு மயக்க ஊசி போட்டு, தூக்கிக் கொண்டு போய் "சவ்டூத் தேசிய மீளுருவாக்கல் காட்டில்" விட்டுவிடுகின்றனர்.

அந்தக் காட்டில் இருக்கும் ஒரு வாத்திடம் போய் கேட்டதிலிருந்து, ஓநாய்களை இனம் பெருக்குவதற்காவே அவர்களை அங்கு கொண்டு வந்திருப்பதாக அறிகின்றனர்!!! ஹம்ப்ரே முகத்தில் மகிழ்ச்சி தாண்டவமாடுகிறது... சுத்தி இருக்கற ஏரியாவுலயே அவர்களைத் தவிர வேறு ஓநாய்களே இல்லையாச்சே!! இருந்தாலும் கேட்டின் முடிவின் படி இருவரும் தப்பித்து சொந்தக் காட்டுக்கு செல்ல தீர்மானிக்கிறர்... போய்ச்சேரும் வழியில் இவர்களுக்குள எப்படி காதல் உருவாகிறது என்பது தான் மீதிப் படம்..

அழகா ஓநய்களை வடிவமைத்துவிட்டு, அசைவூட்டம் கொடுப்பதில் ரியாலிட்டியைக் கெடுத்திருக்கிறார்கள். அதுவும் ஆரம்ப சீன்களில் அடிக்கடி zoom in செய்து out செய்வது வெறுப்பேற்றுகிறது. ரொம்பவே "சினிமாத்தனமான" கதையும், வசனங்களும் சலிப்படைய வைக்கின்றன. 10 விநாடிகளுக்கு 1 தடவை என்ற வீதத்தில் அடிக்கடி ஜோக் போடுகிறார்கள். சில சிரிக்க வைக்கின்றன... ஏனையவை.. அறுவை!!!

பணக்கார பொண்ணு... வெட்டி பையன்... வலுக்கட்டாய திருமணம்... விரும்பி வரும் ஹீரோவை கண்டுகொள்ளாமல் இருக்கும் ஹீரோயின்.. உயிரைக் காப்பாற்ற போற சீன்ல காதல் வருவது... யப்பா!! அந்த ஓநாய்களை மட்டும் எடுத்துட்டுட்டா.. பக்கா தமிழ் சினிமா!!

ஒரு தடவை "அல்பா அன்ட் ஒமேகா" ட்ரெயிலரையும், பின்னர் இந்த எடிட் பண்ணிய ட்ரெயிலரையும் பாருங்க..

தாங்கல... எதையும், எதையும் காம்பேர் பண்றதுன்னு ஒரு அறிவு வேணாம்!! சரி விடுங்க.. மில்லியன்களை கொட்டி இப்படி ஒரு உதவாத படத்தை 3டி-ல எடுக்கறதுக்கு, பழையபடி நேர்த்தியா கொஞ்ச 2டி படங்கள் எடுத்தாலே பரவாயில்லைன்னு எண்ணத் தோன்றுகிறது...

என்ன இருந்தாலும் அனிமேஷன்-ங்கற வார்த்தைக்காவது சிறிது கூட்டித்தான் போட வேண்டியிருக்கிறது. (rotten tomatoes கொடுத்ததே 15%.. நாம ரொம்ப அள்ளிக் கொடுக்கறமோ??)

பாத்திரங்கள்- 13
அனிமேஷன்-9
பின்னணித் தரவுகள்- 10
கதை+திரைக்கதை- 9
இயக்கம்-8

மொத்தம்- 49% பார்க்கலாம்..

Lady and the Tramp (1955)

2011-05-08T06:56:00.000-07:00

நாம இப்ப பார்க்கிற ஹை-டெக் 3D அனிமேட்டட் படத்துக்கெல்லாம் முன்னோடியா, அனிமேஷன் படங்களுக்குன்னு ஒரு அடித்தளத்தை நிறுவினது டிஸ்னி தான்... டிஸ்னிக்கு போட்டியா படம் எடுக்கவே பயந்துக்கிட்டிருந்த காலம் போய், பிக்ஸாரா பார்த்து படம் எடுத்தா தான் உண்டு-ங்கற நிலைமைக்கும் தள்ளப்பட்டிச்சு..

ஆனாலும் இன்னைக்கு வரைக்கும் வந்த 2D படங்கள்லயே பெஸ்ட் எதுன்னு கேட்டா தாராளமா டிஸ்னியை கைகாட்டலாம். லயன்கிங், ஸ்நோ வைட், ஜங்கிள் புக், பியூட்டி அன்ட் த பீஸ்ட், அலாவுதீன்-னு வசூலை வாரிக் குவித்த டிஸ்னியோட golden era வின் ஆரம்ப காலத்துல தான் பெரிதும் எதிர்பார்க்கப்பட்ட ஒரு கார்ட்டுன் காதல் காவியம் வெளியானது!!!

வெறும் 4 மில்லியன் செலவுல உருவாக்கி 90 மில்லியனை 1950-களிலேயே வசூலித்த பெருமை இதற்கு உண்டு. இந்த படம் எடுத்த 1950-60 காலத்துல இதுக்கு கிட்ட வந்தது பென்-ஹர் மட்டும் தானாம்... ஆனா அதோட தயாரிப்புச் செலவு 15 மில்லியன்!!!
அப்படி என்ன விசேஷம் படத்துல?? நாய்களுக்கு நடுவுல நடக்குற காதல்தானே..ன்னு அலட்சியப் படுத்த முடியாது. படத்துல ஹீரோ, ஹீரோயினைத்தவிர ஏனைய பாத்திரங்களுக்கும் மதிப்பளித்து, வித்தியாசம் காட்டி, ரேக்டர் டெவலப்மென்ட் (படத்தோட ஆரம்பத்துல பார்க்குற பாத்திரம் கடைசி வரை அப்படியே இருக்க கூடாது..) எல்லாம் பண்ணுறது டிஸ்னியோட அந்தக்காலத்து ட்ரேட்மார்க்.. இந்த காலத்துல அப்படி உழைக்கறது பிக்ஸார் மட்டும்தான்! (ட்ரீம்வொர்க்ஸ்-கிட்ட அவ்வளவு சின்சியாரிட்டி இல்லை..)

அந்தக் காலத்து அனிமேஷனைப் பார்த்துக் கொண்டிருக்கும் போதே ஏன் இப்ப 2D-ஐ இவ்வளவு கேவலப்படுத்திட்டாங்கன்னு தோணுது.. ரொம்ப பிரைட்டா இல்லாம எல்லாமே மைல்ட் வர்ணங்கள்... படத்தோட நம்மள ஒன்றிக்க வைக்குது.

படம் முழுக்க வெவ்வேறு வகை நாய்கள் வருவது மேலும் சிறப்பு.. கொக்கர் ஸ்பானியல் பப்பியாக வரும் ஹீரோயின் "லேடி"யைப் பார்த்தவுடன் தோன்றாத அழகு, போகப்போக வெளிப்படுகிறது.. அதுக்கு பக்கத்து வீட்டுக்காரர்களாக வரும் "ஜொக்"உம் (ஸ்கொட்டிஷ் டெரியர்), "ட்ரஸ்டி"யும் (ப்ளட்ஹெளன்ட்) ஹீரோவை மட்டந்தட்டுவதும், ஹீரோயினுக்கு அட்வைஸ் செய்வதுமாக வந்து பின்னர் கதையின் திருப்பத்துக்கே காரணமாக அமையும்போது நிமிர்ந்து பார்க்க வைக்கின்றனர்!
அதிலும் குறிப்பாக அந்த "ட்ரஸ்டி" முன்பு பேசும் காட்சிகளெல்லாம் சலிப்பாக இருக்கும். அவ்வளவு இழுத்து..... இழுத்து... பேசும். ஆனால்பிறகு ஹீரோ "ட்ராம்ப்"ற்காக தனது காலை இழக்கும் சீனில்... ச்சோ ஸ்வீட்!!

படம் முழுக்க ஏராளமான சீன்கள், கதை முடிந்த பிறகும் அசைபோட வைக்கின்றன..
ட்ராம்ப், லேடியின் முகத்தில் மாட்டியிருந்த பட்டியை அறுப்பதற்காக, பீவரிடம் லேடியைப்பற்றி 'விளம்பரத்தனமாக' புகழ்ந்து பேசுவது செம சுவாரஸ்யமான சீன்..

ரென்டு பேரும் ரெஸ்டோரண்டுக்கு வெளியே இருந்து ராஜ மரியாதையுடன் (கூடவே மியூசிக் வேறு!!) டின்னர் சாப்பிடும் சீன் உலகப் புகழ்பெற்ற அனிமேஷன் சீன்களில் ஒன்று!

லேடி, ட்ராம்ப் தேடிவரும் போது முகத்தை திருப்பிவைத்துக் கொள்வதும், போனபின்பு திரும்பி வரமாட்டானா என ஏங்கிப் பார்ப்பதும், எலியைப் பிடிப்பதற்காக ரென்டு பேரும் கோபத்தை விட்டு சேர்ந்து செயற்படுவதும்..... எப்படித்தான் டிஸ்னி சமாளித்தார்களோ தெரியவில்லை... அவ்வளவு யதார்த்தம்!!

பொதுவாக அனிமேஷன் படங்கள் எல்லாமே ஒரு மகிழ்ச்சியான இறுதிக் கட்டத்துடன்தான் முடியும்.. ஆனால் இந்தப் படம் முடியும் போது நிஜமாகவே மனத்தில் ஒரு பூரிப்பு எழுகிறது.. எத்தனை தடவை நீங்கள் படம் பார்த்திருந்தாலும் முடியும் போது "மீண்டும் ஒரு தடவை பார்க்கத்தான் போகிறேன்!!" என்று உங்களுக்கு நீங்களே ஒரு சபதம் போட்டுக்கொள்வீர்கள்!!!

காலத்தால் அழியாத காதல் ஜோடிகள் பற்றி ஏதாவது லிஸ்டு போடுறதா இருந்தா டொப்-டென்னுல இவங்களை சேர்த்துக்கனும்... இது எழுதப்படாத விதி!!

ஆமா 55 வருஷம் ஆனதுக்கப்புறம் நான் ஏன் இந்தப் படத்தைப் பத்தி ஒரு பதிவை எழுதனும்?? காரணம் இருக்கு.. சமீபத்தில் இதே போல விலங்குகளின் காதலை மையமாக கொண்டு எடுத்த அனிமேஷன் படம் பார்த்தேன். அதைப் பார்த்தபின்பு ஏற்பட்ட கடுப்பாலேயோ என்னவோ இதைப் பார்க்கச் சொல்லி மனது உறுத்தியது... அந்தப் படம் பத்தி அடுத்த பதிவுல சொல்றேன்!

எழுதிட்டோம்.. இதுக்கும் போட்டுருவோமே,

பாத்திரங்கள்- 19
அனிமேஷன்- 19
பின்னணித் தரவுகள்- 18
கதை+திரைக்கதை- 18
இயக்கம்- 19

மொத்தம்- 93% அசத்தல்!

The King's Speech (2010)

2011-05-03T02:24:00.000-07:00

"சிறந்த படம்" உள்ளடங்கலாக, 4 ஒஸ்கார் வாங்கற அளவுக்கு ஒரு கதை சொல்லுங்களேன்??
என்னது "அமெரிக்கா உலகத்தை அழிவுல இருந்து காப்பாத்துதா?"... வேணாம்.வேணாம்.. நாம இந்த படத்தோட கதைக்கே போவோம்!!

பிரித்தானியாவைக் கடியாண்டு வரும் 5ம் ஜோர்ஜ் மன்னனுக்கு 2 மகன்கள். முதலாவது மகன் பெயர் டேவிட். அவர் வேல்ஸின் இளவரசனாக இருக்கிறார். 2வது மகன் பெயர் அல்பேர்ட்(சுருக்கி "பேர்ட்டி"). அவர் யோர்க் பிரதேசத்தின் டியூக் ஆக இருக்கிறார். தந்தைக்கு, தனக்கு பிறகு மூத்த மகன் டேவிட் அரசனாவதைக் காட்டிலும் இளைய மகன் அரசனாக வேண்டுமென்பதே விருப்பம். ஆனால் அதில் ஒரு சின்ன சிக்கல்..... பேர்டிக்கு திக்கித் திக்கித்தான் பேச வரும்!!

படத்தின் ஆரம்ப சீன் இதுதான். பிரிட்டிஷ் அரச கண்காட்சி "வெம்ப்ளி" ஸ்டேடியத்தில் நடக்கிறது. அதன் இறுதியுரையை அல்பேர்ட் பேச வேண்டும். அல்பேர்ட் 75,000 மக்கள் கூடியிருந்த ஸ்டேடியத்தின் முன்னால் வந்திருந்து வாயைத்திறக்கிறார்.. வார்த்தைகள் வரவேயில்லை. கேட்டுக்கொண்டிருக்கும் மக்களுக்குள் ஒரு சஞ்சலம் நிலவுவதைப் புரிந்து கொள்கிறார். முடியமையாலும், அவமானத்தாலும் முகம் சிவக்கிறது... வாய் தடுமாறுகிறது..

இந்த நிகழ்வுக்குப் பிறகு அல்பேர்ட் பேச்சுக்கான சிகிச்சைகள் சில எடுத்துக் கொள்கிறான். எதுவும் பயனளிக்கவில்லை. அல்பேர்டின் மனைவி எலிஸபெத் (ஆமா.. இந்த நடிகையை எங்கேயோ பார்த்த மாதிரி இருக்கே!) லண்டனிலிருக்கும் அவுஸ்திரேலிய ஸ்பீச் தெரபிஸ்டு, லியனல் லோக்-ஐ சந்தித்து சிகிச்சைக்கு ஏற்பாடு செய்கிறாள்.
ஆனால் லோக், அல்பேர்ட்-ஐ சாதாரண பேஷண்டு போல்தான் நடத்துகிறார். சிகிச்சைகள் மாளிகையில் நடத்தப்படவில்லை.. லோக்கினுடைய சிறிய வீட்டில் நடக்கிறது. "டியூக் ஒஃவ் யோர்க்" என்றுகூட பார்க்காமல் பேர்ட்டி என்றுதான் கூப்பிடுகிறார்.

முதல் பேச்சுப் பயிற்சியின்போது, பேர்டியை காதில் ஹெட்போன் அணியச்செய்து பாட்டுக் கேட்டுக்கொன்டே, ஷேக்ஸ்பியரின் "ஹம்லெட்" கதையிலுள்ள ஒரு பந்தியை வாசிக்கச் செய்கிறார். அவர் வாசிப்பதை லோக் கிராமபோன் மூலமாக ரெக்கார்ட் செய்கிறார். பேர்டிக்கு தான் திக்கித்திக்கியே வாசிப்பது போன்ற உணர்வு ஏற்படுகிறது. அத்துடன் லோக்கின் பயிற்சி முறை வேறு தனக்கு சுத்தமாக பிடிக்காததால் கோபத்துடன் வெளியேறுகிறார். போகும்போது லோக், பதிவு செய்த சீடியை கையில் கொடுத்தனுப்புகிறார்.

மறுநாள் 5ம் ஜோர்ஜ் மன்னர் (இந்த முகம் கூட ரொம்ப ஃபேமிலியரா இருக்கே!) அரசமாளிகையில் மக்களுக்கு வானொலி மூலமாக கிறிஸ்துமஸ் தின வாழ்த்துச் செய்தியை வாசிக்கிறார். வாசித்து முடிந்ததும் அல்பேர்ட்டிடம் ஒளி,ஒலிபரப்புக்களின் முக்கியத்தை கூறுகிறார். "டேவிட் நாட்டுக்கு அரசனானனால், அரச குடும்பத்துக்கும், நாட்டுக்கும் பெரிய களங்கத்தை ஏற்படுத்துவான். அவனுக்கு பதில் மன்னனாக நீ வருவதற்கு இப்போதே ஆயத்தமாகு!!" எனக்கூறி தான் வாசித்த அதே வாழ்த்துச் செய்தியை வாசிக்கச் சொல்கிறார். மறுபடியும் முயற்சி தோல்வியடைகிறது...

அன்றிரவு அல்பேர்ட் லோக் கொடுத்த சீடியை ப்ளே செய்து பார்க்கிறான்.... என்ன ஆச்சரியம்! அவன் தடுமாறாமல் "ஹம்லெட்" கதையை சீராக வாசித்திருக்கிறான். பிறகென்ன மறுநாளிலிருந்து தவறாமல் லோக்-இன் பேச்சுப் பயிற்சிகளுக்கு போகிறான்... கூடிய சீக்கிரமே அல்பேர்ட்டிற்கு லோக் மீது நம்பிக்கை ஏற்படுகிறது. தான் சிறுவயதில் சந்திக்க நேர்ந்த துன்பங்களை நினைவுகூருகிறான்.

அவன் இயற்கையில் இடது கைப்பழக்கம் உள்ளவனாக இருந்ததாகவும், அப்பா அவனை தண்டித்தே வலது கைக்கு மாற்றியதாகவும், தனது முழங்கால்கள் முட்டுவதை தவிர்க்க தாங்கிக்கொண்ட வேதனையான சிகிச்சைகள் பற்றியும், தன்னை பராமரித்த nanny, அண்ணனுக்கு மட்டும் அதிக பாசத்தை காட்டி, தனக்கு ஒழுங்காக உணவு கூட கொடுக்காததையும், தம்பி ஜோன் 1919ல் சிறுவயதிலேயே மரணமடைந்தது தன்னை எவ்வளவு பாதித்ததெனவும் லோக்கிடம் மனம்விட்டுப் பேசுகிறான்.

படத்தின் இறுதியில் அல்பேர்ட், "6ம் ஜோர்ஜ்" என்ற பெயரில் மன்னாகிறான் (எப்படி ஆகிறான் என்பதற்காவது நீங்க படத்தை பார்த்தாகனும்). 2ம் உலகப்போர் காலகட்டத்தின் போது, அல்பேர்டின் மேடைப் பேச்சுக்களிலெல்லாம் லோக் உடனிருந்ததாகவும், லோக்கின் சேவைகளைப் பாராட்டி அவர் 1944ல் அரச விக்டோரியன் ஆணைக்குழுவின் கமான்டராக நியமிக்கப்பட்டதாகவும் பட இறுதியில் உண்மைத் தகவல்கள் சொல்லப்படுகின்றன.
அல்பேர்ட்டாக நடித்திருக்கும் கொலின் ஃபேர்த் உண்மையிலேயே ஒரு நடிப்பு பல்கலைக்கழகம்... வசனங்கள் புரியாத காட்சிகளிலும் கூட அவரது நடிப்பு பேசுகிறது!!! இயக்குனர் அபரிமிதமாக உழைத்திருப்பது தெள்ளத்தெளிவாக தெரிகிறது... ஒவ்வொரு காட்சியும் கன கச்சிதம்!!

ஹாரி பாட்டர் படங்களைப் பார்ப்பவர்களா நீங்கள்?.. அப்போ உங்களுக்கு இந்த ரென்டு பேரையும் கண்டிப்பா தெரிந்திருக்கும்..

எலிஸபெத் ராணியாக நடித்திருப்பது பெலாட்ரிக்ஸ் லெஸ்ட்ரேஞ்!! நிஜப் பெயர் ஹெலனா பொன்ஹம் கார்ட்டர்.

5ம் ஜோர்ஜ் மன்னனாக நடித்திருப்பது அல்பஸ் டம்பிள்டோர்!! நிஜப்பெயர் மைக்கல் கேம்பொன்.

ஆமா.. எல்லோரும் அல்பேர்ட்டோட பேரனின் திருமணத்தை போன மாசம் பார்த்துட்டீங்கள்ல??

Despicable Me (2010)

2011-04-29T06:52:00.000-07:00

இந்த அனிமேட்டட் யுகத்துல "பிக்ஸார், ட்ரீம்வொர்க்ஸ், ப்ளூஸ்கை" ஆகிய ஜாம்பவான்களின் பங்களிப்பு கொஞ்சமும் இல்லாம ஒரு அனிமேஷன் படம் வெளியாகி, சக்கைப்போடு போட்டிச்சுன்னா கண்டிப்பா அது "ஒன்ஸ்-இன்-எ-லைஃப்டைம்", "காணத்தவறாதீர்கள்!" கேட்டகரிக்குள் வரும் ஒரு படமாத்தான் இருக்கும்!! அப்படியொரு படம்தான் போன வருஷம் வந்த.. "டெஸ்பிகபல் மீ".

இத வாசிக்கறவங்கள்ல பாதிப்பேராவது கண்டிப்பா படம் பாத்திருப்பீங்க, இல்லன்னா மறக்காம பாருங்க...!!

'க்ரூ' அப்படீங்கறவரு ஒரு மெகா-வில்லன். இவருக்கு ஆயிரக்கணக்கான மினியோன்கள் (மஞ்சள் கலர்ல இருக்கும் சிறிய வேலைக்காரர்கள்) அடிமைகளா இருக்கு. இவரும், இவரோட அஸிஸ்டன்ட் 'நெவாரியோ'வும் சேர்ந்து நினைச்சும் கூட பார்க்க முடியாத கொள்ளைகளை திட்டமிட்டு செயற்படுத்துகிறார்கள். இவங்களுக்கு போட்டியா இன்னொரு வில்லனான 'வெக்டர்' கிரேட் பிடமிட்டையே கடத்திவிடுகிறான். இதனால் அவமானமடையும் க்ரூ, இதுவரைக்கும் யாருமே செய்யமுடியாத சாதிக்கனும்னு நினைச்சு நிலவைக் கடத்த திட்டமிடுகிறான்.

ஆனா இந்த திட்டம் ரொம்ப காஸ்ட்லி-ங்கறதால 'தீய நடவடிக்கைகளுக்கு உதவும்' வங்கில கடன் வாங்க போறான். வங்கி முகாமையாளரோ, "நிலவை சிறிதாக்கி கடத்துவதற்கு தேவையான கதிர் வீச்சியை நீ திருடிக்கிட்டு வந்தாதான், உன்னை நம்பி பணம் தரலாம்..."னு திருப்பி அனுப்புகிறார். க்ரூ பக்காவா பிளான் பண்ணி கதிர்வீச்சியையும் திருடிவிடுகிறான். சில வினாடிகளில் அங்கு வந்து சேரும் வெக்டர், க்ரூவிடமிருந்த கதிர்வீச்சியை திருடிக்கொண்டு தன்னுடைய ஆய்வகத்துக்கு போய்விடுகிறான்.
கோபத்துடன் கதிர்வீச்சியை திரும்பப்பெற போகும் க்ருவுக்கு அதிர்ச்சி.. அவனால் வெக்டரின் ஆய்வுகூடத்துக்கு உள்ளே நுழையவே முடியவில்லை.. அவ்வளவு பாதுகாப்பு!!

ஒருநாள் அனாதையில்லத்திலிருந்து வந்த 3 சிறுமிகள் (மார்கோ, எடித், ஆக்னஸ்) சுலபமாக ஆய்வகத்துக்குள் நுழைந்து, வெக்டரிடம் குக்கீஸ் விற்றுச் செல்வதை மறைந்திருந்து அவதானிக்கிறான் க்ரூ.. கதிர்வீச்சியை திருடுவதற்கு மூன்று சிறுமிகளையும் பகடைக்காயாக பயன்படுத்த எண்ணி, அவர்கள் மூவரையும் தத்தெடுக்கிறான். மூன்றுபேருக்கும் ஒரு அப்பா கிடைச்சுட்டாரேன்னு சந்தோஷம்... ஆனா அவங்க நினைச்ச மாதிரி அப்பாவோ, அவரோட வீடோ இல்லைங்கறது தெரிஞ்சதும் ஏமாற்றமடைகிறார்கள்.

க்ரூ நினைச்ச மாதிரி அவங்கள வைச்சு திருட முடியாம போகுது. இதுக்கு தடையா இருக்கது 3 காரணிகள்-
1. மூன்று சிறுமிகளோடயும் விளையாட்டுத்தனம்
2. அவங்களுக்கு பலே டான்ஸ் க்ளாஸுக்கு அடிக்கடி போக வேண்டியிருந்தமை
3. க்ரூவுக்கு அவங்களுக்கு அப்பாவா இருப்பதில் சுத்தமும் விருப்பமில்லை..

என்றாலும் நாளாக, நாளாக மார்கோ, எடித், ஆக்னஸுடன் பழகும் க்ரூவின் வில்லத்தனம் குறைந்து பாசம் அதிகரிக்கிறது....
அவர்களுக்கு கதை வாசித்து விடுகிறான், விருப்பமானவற்றை வாங்கிக்கொடுக்கிறான், அவர்களுடன் விளையாடுகிறான். இப்படியாக 3 சிறுமிகளையும் தன் பிள்ளைகள் போலவே பார்த்துக்கொள்கிறான்.

மறுபடி திட்டத்தில் முழுக்கவனத்தையும் செலுத்தி, திரும்பி வங்கிக்கு செல்லும் க்ரூவுக்கு பணம் தர மறுக்கிறார் வங்கி மேனேஜர். கவலையோடு உட்கார்ந்திருந்த க்ரூவிடம் உண்டியலை நீட்டுகிறார்கள் மூன்று சிறுமிகளும்... புது உற்சாகம் பிறக்கவே சொந்த செலவில் திட்டத்தை செயற்படுத்த முடிவெடுக்கிறான் க்ரூ..

அவனது திட்டம் வெற்றியளித்ததா.. நிலவை கடத்துவானா?ங்கறத படம் சொல்லும்.. யூகிக்க கூடிய க்ளைமேக்ஸ்தான்.. பிக்ஸார், ட்ரீம்வொர்க்ஸ் அளவு கதாப்பாத்திரங்கள் "கிராபிக்கலா" இல்லைன்னாலும் "அனிமேட்டப்பட்ட" விதம் அருமை! படத் தலைப்பும், கேப்ஷனும் (superbad. superdad) செம பொருத்தம்!!

படம் யுனிவேர்சல் பிக்சர்ஸ் மற்றும் இல்லுமினேஷன் என்டர்டெயின்மன்ட்-இன் கூட்டுத் தயாரிப்பு. ஆனால் கிராபிக்ஸ் காட்சிகளை எடுத்தது "மாக் கஃப்" எனும் பிரெஞ்சுக் கம்பனி... (உங்ககிட்ட இருந்து இன்னும் நிறைய படம் எதிர்பார்க்கறோம் பாஸ்!!)

ரேட்டிங்ஸ்,

பாத்திரங்கள்- 16
அனிமேஷன்- 18
பின்னணித் தரவுகள்- 16
கதை+திரைக்கதை- 19
இயக்கம்- 17

மொத்தம்- 86% சூப்பர்!

The Orphanage (2007)

2011-04-20T22:01:00.000-07:00

நான் உங்களுக்கு சொந்தமான சில பொருட்களை எடுத்து ஒளிச்சு வைச்சுருவேன். நீங்க அத கண்டுபிடிக்கனும். முதலாவதாக கண்டுபிடிக்கற பொருளில் அடுத்த பொருளுக்கான க்ளூ இருக்கும். எல்லா பொருட்களையும் கண்டுபிடிச்சிட்டீங்கன்னா உங்களுக்கு ஒரு வரம் கிடைக்கும். நல்ல விளையாட்டுதான்.... ஆனா அதுல யாரோ ஒருத்தருடைய உயிரைப் பணயம் வைச்சா??

இதுதான் நான் பார்க்கிற முதலாவது ஸ்பானிஷ் படம். இதுவே எனக்கு ஸ்பானிஷ் படங்கள் மேல நல்ல நம்பிக்கையை ஏற்படுத்தியிருக்கு..

லாரா எனும் ஒரு சிறுமி அனாதை இல்லத்தில் வளர்ந்து 8 வயதில் ஒரு தம்பதியினரால் தத்தெடுக்கப்படுகிறாள். அவள் கார்லொஸ் என்பவரையும் திருமணம் செய்து கொள்கிறாள். இருவரும் சீமோன் எனும் ஒரு குழந்தையை தத்தெடுக்கின்றனர். 7 வயது மட்டுமே ஆகும் சீமோனுக்கு HIV+... ஸோ மிகவும் கண்கானிப்புடன் குழந்தையை வளர்க்கினறனர். லாராவின் கனவு அவள் வளர்ந்த, தற்போது கைவிடப்பட்டுள்ள நிலையில் உள்ள அநாதை இல்லத்தை வாங்கி, அதை ஊனமுற்ற குழந்தைகள் பராமரிப்பு நிலையமாக மாற்ற வேண்டுமென்பதுதான்....

லாராவின் விருப்பம் போலவே, அவர்கள் அங்கு சென்று குடியேறுகின்றனர்... இன்னமும் ஊனமுற்றோர் காப்பகமாக மாற்றவில்லை... அங்கு சீமோன் கற்பனையில் அவ்வீட்டில் சில குழந்தைகள் இருப்பதாகவும், அவர்களுடன் தான் சந்தோஷமாக விளையாடுவதாகவும் பெற்றோரிடம் கூறுகின்றான். "சீமோன் தெரிந்து கொண்டே நடிக்கிறானா?" என்ற சந்தேகம் லாராவுக்கும் கார்லோஸுக்கும்.

சீமோன் தனது கற்பனை நண்பர்களை பேப்பரில் வரைந்து அம்மாவிடம் அறிமுகப்படுத்துகிறான். அதில் தோமஸ் என்ற பையன் மட்டும் சாக்கினால் செய்த முகமூடியை அணிந்து கொண்டு நிற்கிறான்.

ஒருநாள் பெனீன்யா எனும் சமூக சேவகி அனாதை இல்லத்துக்கு வந்து, லாராவை சந்தித்து, தன்னிடம் சீமோனின் மருத்துவ கோப்புகள் உள்ளதாகவும், அதில் சீமோனுக்கு HIV இருப்பது தெரிய வந்துள்ளதாகவும் கூறுகிறாள். லாரா ஃபைலை வாங்கிக்கொண்டு பெனீன்யாவை துரத்துகிறாள். அன்று இரவு பெனீன்யா அவர்களது வீட்டின் பின்னாலுள்ள ஷெட்-இல் ஒளிந்திருப்பதை லாரா கண்டுபிடிக்கிறாள். பெனீன்யா எதுவும் பேசாமல் தப்பி ஓடிவிடுகிறாள்.

மறுநாள் சீமோன், தனது நண்பர்கள் சில பொருட்களை ஒளித்து வைத்திருப்பதாக கூறி அம்மாவுடன் சேர்ந்து "மேலே கூறப்பட்ட" விளையாட்டை விளையாடுகிறான். இறுதி பொருளாக சீமோனின் மருத்துவ கோப்பு வரவே, லாரா கோபமடைந்து, "நீயே ஒளிச்சு வைச்சுட்டு விளையாடுறியா??" எனத் திட்டிவிடுகிறாள். பதிலுக்கு சீமோன் கோபத்துடன், "நீ என் அம்மாவே இல்லை. நான் இன்னும் கொஞ்ச நாள்ல செத்துடுவேன்.. எல்லாத்தையும் என் பிரென்ட்ஸ் எங்கிட்ட சொல்லிட்டாங்க.." என கத்துகிறான்.

ஒருநாள் அனாதை இல்லத்தில் பார்ட்டி வைக்கிறார்கள். அதன்போது லாராவுக்கும் சீமோனுக்கும் வாக்குவாதம் வரவே சீமோன் கோபித்துக்கொண்டு போய்விடுகிறான். அவனைத் தேடி லாரா போகும் போது, சாக்கு முகமூடியணிந்த தோமஸ் பையன் நிஜமாகவே வந்து லாராவை பாத்ரூமில் வைத்துப் பூட்டி விடுகிறான். லாரா சமாளித்துக்கொண்டு தப்பி வரும்போது, சீமோனைக் காணோம்... முழு அனாதை இல்லத்திலும் தேடிப்பார்த்தும்.... பிரயோஜனம் இல்லை!!!
போலீஸ் சைக்கோலஜிஸ்ட் பெனீன்யாதான் சீமோனைக் கடத்திச் சென்று வைத்திருக்கலாம் என ஊகிக்கிறார். அன்று இரவு லாராவுக்கு சுவரில் யாரோ தட்டுவது போலக் கேட்கிறது.

ஆறு மாதத்திற்குப் பிறகு வேறு ஊரிற்கு காரில் சென்று கொண்டிருக்கும் போது லாரா, பெனீன்யா குழந்தையொன்றைத் தள்ளிச் செல்வதை பார்க்கிறாள். அவளைக் கூப்பிடப்போகும் போது பஸ்ஸில் அடிபட்டு பெனீன்யா சாகிறாள். அவள் தள்ளிச் சென்றது......... சாக்கு முகமூடியணிந்த ஒரு பொம்மை!!!
உஷாராகி பெனீன்யாவின் வீட்டை துருவும் போலீஸ், பெனீன்யா அந்த அனாதை இல்லத்தில் தான் முதலில் வேலை பார்த்ததாகவும், அவளது மகன் தோமஸின் முகம் சிதைவடைந்திருந்ததால் ஒரு சாக்கு முகமூடி அணிந்திருந்தான் எனவும் கண்டுபிடிக்கின்றனர். எனினும் பல வருடங்களுக்கு முன்பே அவன் இறந்து போயிருக்கிறான். அவனுடன் இருந்த சிறுவர்கள் அவனது முகமூடியை கடற்கரைக்கு அண்மையிலுள்ள குகையில் ஒளித்துவைக்கவே, அதை தேடிச் சென்ற தோமஸ் கடலலைககளால் அள்ளப்பட்டு இறந்துள்ளான்....

பெனீன்யா, தன் மகனைக் கொன்ற சிறுவர்களை உயிரோடு எரித்து அந்த சாம்பலை அனாதையில்லத்துக்கு பின்னாலுள்ள ஷெட்-இல் ஒளித்து வைத்திருந்தாள் என்பதையும் "மேலே கூறிய" விளையாட்டு மூலம் லாரா கண்டுபிடித்துக் கொள்கிறாள்.

சீமோன் காணாமல் போய் 9 மாதம் ஆனதால் கார்லோஸ் அவ்வீட்டை விட்டுச்செல்ல முடிவடுக்கிறார். ஆனால் லாரா அதற்கு உடன்படவில்லை. அவள் சீமோன் அவ்வீட்டில் தான் ஒளித்து வைக்கப்பட்டிருப்பதாக நம்புகிறாள். கார்லோஸிடம் 2 நாள் அவகாசம் வாங்கிக் கொண்டு அவ்வீட்டில் தனியாக வசிக்கிறாள்.
அவளால் சீமோனை கண்டுபிடிக்க முடிந்ததா? தோமஸ் ஆவியின் நோக்கம் தான் என்ன? என்பது மீதிக்கதை.. படம் தியேட்டரில் பார்த்திருக்கவேண்டிய அளவு உச்சகட்ட விறுவிறுப்பு!! துறுதுறுவென்று இருக்கும் சீமோனின் முகத்தை பாதிப்படத்துக்கு மேல் பார்க்கமுடியாது போனது மட்டும் சின்ன ஏமாற்றம்...

சமீபத்தில் வாங்கிய ஹாரர்/த்ரில்லர் படங்களில்இது மட்டும்தான் உருப்படியாக இருந்தது.. யாருக்காவது நல்ல படம் கொஞ்சம் தெரிஞ்சா சொல்லிட்டு போங்க...

ரேட்டிங்ஸ்,

நடிப்பு = 17
இசை = 15
கதை + திரைக்கதை = 18
கலை = ஒளிப்பதிவு = 18
இயக்கம் = 17

மொத்தம் = 85 சூப்பர்

Angels & Demons (2009)- 2

2010-10-23T21:42:00.000-07:00

நியூக்ளியர் ஆராய்ச்சி மன்றத்தில் குப்பி திருடப்பட்ட வேளை, ரோமில் அப்போதைய பாப்பரசர் இறந்து போகிறார்.. வத்திக்கான் மக்கள் சோகத்தில் ஆழ்கின்றனர். அடுத்த பாப்பரசரை தேர்வு செய்வதற்கான கூட்டத்தை நடத்தியாக வேண்டும்.

சாதாரணமாக பாப்பரசரை தேர்வு செய்ய சிஸ்டைன் தேவாலயத்தில் நடக்கும் விஷேட வைபவத்தின் போது திருச்சபை அங்கத்தவர்கள் வாக்களிக்க வேண்டும்.
அதிகூடிய வாக்குகளைப் பெறுபவர் பாப்பரசராக தேர்ந்தெடுக்கப்படுவர். புதிய பாப்பரசர் தேர்ந்தெடுக்கப்பட்டதும் ஓட்டுச் சீட்டுகளில் ஒருவகை அமிலத்தைக் கலந்து எரித்துவிடுவர். அப்போது வெண்ணிற புகை வெளியேறும். அப்புகையைக் கண்டதும் கூடி நிற்கும் மக்கள் புதிய பாப்பரசர் தேர்ந்தெடுக்கப்பட்டதாக அறிந்து கொள்வர்.

(2005லிருந்து மணிகளை ஒலித்து கூட்டத்திற்கு தெரிவிக்கும் வழக்கம் கையாளப்படுகிறது..)
ஆனால் அதுவரை யாராவது வத்திக்கானின் தலைமைப் பொறுப்பில் தற்காலிகமாக இருத்தப்பட வேண்டும்.

இங்கேயும் அவ்வாறே தற்காலிக பொறுப்பை இளம் பாதிரியார் கமேர்லேங்கோ ஏற்றுக்கொள்கிறார். ஆனால் யாரும் எதிர்பாராத விதமாக "பிரிஃபெடி" எனப்படும் பாப்பரசராக அதிக சாத்தியமுள்ள நான்கு பேர் கடத்தப்படுகிறார்கள். சிறிது நேரம் கழித்து திருச்சபைக்கு கிடைக்கும் கேசட்டில் "பிரிஃபெடியை கடத்தியது இல்லுமினாட்டி என்றும், பிரிஃபெடி ஒவ்வொரு மணித்தியாலத்துக்கு ஒருவர் என்ற வீதத்தில் கொலை செய்யப்படுவார்கள் என்றும், நள்ளிரவில் வத்திக்கான் நகரமே அழிந்து விடும்" என்றும் மிரட்டல் செய்தியொன்று விடுவிக்கப்படுகிறது.. அதனைத் தொடர்ந்து அன்டிமேட்டரை திருடியதும் இல்லுமினாட்டி தான் என்று அறிகின்றனர்.

இந்த கேஸில் தமக்கு உதவி புரிவதற்காக ஹார்வார்ட் பல்கலைக்கழகத்தில் சமய சம்பந்தமான குறியீடுகளை ஆராய்ச்சி செய்து வரும் பேராசிரியர் லாங்டனையும், நியூக்ளியர் ஆராய்ச்சி மன்றத்திலிருந்து விட்டோரியாவையும் வத்திக்கான் போலீஸ் அழைக்கின்றது. இல்லுமினாட்டி செய்தியைக் கேட்கும் லாங்டன், நான்கு கார்டினல்களும் விஞ்ஞானத்தின் நான்கு முக்கிய தூண்களின் பலிபீடங்களில் கொல்லப்படுவார்கள் என்பதை ஊகிக்கிறார். விஞ்ஞானத்தின் நான்கு தூண்கள் "பூமி, காற்று, நெருப்பு, நீர்" என்பது அவருக்குத் தெரியும். ஆனால் அவற்றுக்கான பலிபீடங்கள் எவையெவை என்பது தான் யாருக்கும் தெரியாது.

இருந்தாலும், இதில் இல்லுமினாட்டி சம்பந்தப்பட்டிருக்கிறது. இல்லுமினாட்டியின் ஆரம்பகர்த்தா கலிலியோ கலிலி.. எனவே அவரிடமிருந்து தான் க்ளூக்களைப் பெற வேண்டுமென லாங்டன் நினைக்கிறார். லாங்டன் முன்பு தனது ஆராய்ச்சிகளுக்காக கலிலியின் "டியாக்ரம்மா" புத்தகத்தின் நகலொன்றை பெற்றுத்தருமாறு எத்தனையோ முறை வத்திக்கானுக்கு வேண்டுகோள்களை விடுத்திருந்தும், அவை நிராகரிக்கப்பட்டிருந்தன. ஆனால் இம்முறை விசாரணைக்காக அவர் அதை பார்க்க அனுமதிக்கப்படுகிறார்.

பக்கங்களைப் புரட்டி ஆராய்ச்சி செய்கின்றனர். ஒரு பக்கத்தின் மார்ஜினில் எண்ணெயால் ஏதோ எழுதப்பட்டிருக்கிறது. புத்தகம் லத்தீன் மொழிக்குரியது என்ற போதிலும், அந்த வரி ஆங்கிலத்தில் எழுதப்பட்டுள்ளது.
அதில் "From Santi's earthly tomb with demon?s hole, 'cross Rome the mystic elements unfold.
The path of light is laid, the sacred test, let Angels guide you on your lofty quest."
என எழுதப்பட்டிருக்கிறது. அதாவது விஞ்ஞானத்தின் தூண்கள் "தீப அலங்காரப் பாதை"யின் வழியில் இருக்கின்றன. அப்பாதை சான்டியின் சாத்தான் துளையிட்ட கல்லறையில் தொடங்கி தேவதைகளின் வழிகாட்டலில் செல்லும் எனப் பொருள் தரும்.

சான்டி எனப்படுவது ரபேல் எனப்பட்ட சிற்பக் கலைஞரின் இறுதிப் பெயர். அவரது கல்லறை இருப்பது பன்தியனில். பன்தியன் கட்டடத்தின் கூரை வட்டவடிவாக வெட்டியெடுக்கப்பட்டிருக்கும். அப்போ அதுதான் சாத்தானின் துளை!! உடனே லாங்டன், வேட்ரா, இன்ஸ்பெக்டர் ஜெனரல் ஏர்னஸ்டோ ஓலிவெட்டி மற்றும் வத்திக்கான் பிரெஞ்ச் காவற்படையின் லெப்டினண்ட் வேலண்டி ஆகியோர் புறப்பட்டு 8 மணிக்கு சில நிமிடங்கள் முன்னராக அங்கு வந்து சேர்கின்றனர். ஆனால் அங்கு யாரும் இருக்கவில்லை.

தவறாக வந்து விட்டோமோ என யோசிக்கும் போதுதான், ஒருவேளை சான்டியின் கல்லறையைக் குறிக்காமல், சான்டியால் செதுக்கப்பட்ட கல்லறையொன்றைக் குறித்திருக்கலாம் என்ற எண்ணம் லாங்டனின் மனதில் வருகிறது. அந்த கல்லறையிருப்பது சான்டா மரியா டெல் போபோலோ தேவாலயத்தில்... அங்கு விரைந்து சென்று பார்க்கும் போது, முதலாவது கார்டினல் எப்னல் கொல்லப்பட்டிருந்தார். அவரது நெஞ்சில் "பூமி" என்ற சின்னம் பதிக்கப்பட்டிருந்ததோடு, உடல் எலிகளால் கடிக்கப்பட்டிருந்தது....

முதலாவது கார்டினலைத் தான் காப்பாற்ற முடியவில்லை.. மற்வர்களையாவது???

Angels & Demons (2009)-1

2010-10-10T04:22:00.000-07:00

இந்தப் பதிவில் குறிப்பிடப்பட்ட படத்தையும் விடயங்களையும் சீரியஸாக எடுத்துக் கொண்டால் அதற்கு நான் பொறுப்பில்லை. எல்லாம் கற்பனையே....

டாவின்சி கோட், ஏஞ்சல்ஸ் அன்ட் டெமன்ஸ் படங்களுக்கு கிடைத்த அபரிமிதமான எதிர்ப்புக்களையும், வந்த சர்ச்சைகளையும் பார்த்துட்டுக் கூட இத போடலைன்னா எப்படி??

கிறிஸ்தவ சமயத்தின் மூடப்பட்ட ரகசியங்களை (பொய்யோ.. உண்மையோ.. யாருக்குத்தெரியும்?) கரைம் த்ரில்லர் பாணியில் சொல்ல வந்த முதல் படம் த டாவின்சி கோட் என்பதை நீங்கள் நன்கு அறிவீர்கள். அதன் அடுத்தகட்டமாக வரும் கதைதான் இது. இரண்டுமே டான் பிரெளன் எழுதிய நாவல்களைத் தழுவி எடுக்கப்பட்டவை.. படம் பார்த்த/பார்க்கும் கிறிஸ்தவ நண்பர்கள் கதையை ஆராய்வதை விட்டுவிட்டு படத்தில் வரலாற்றின் முடிச்சுக்கள் அவிழும் விதத்தை மட்டும் பார்க்கலாமே என்பது எனது வேண்டுகோள்!!

படம் நிறைய பேர் பார்த்திருப்பீர்கள்.. படத்தின் கதை அழகாக தமிழ் விக்கிபீடியாவில் சொல்லப் பட்டுள்ளது..

17ம் நூற்றாண்டு... பூமிதான் சூரியனைச்சுற்றி வருகிறது என்ற கருத்தை கலிலியோ கலிலி முன்வைத்தார்... ஆனால் கத்தோலிக்க சமயத்தின் பிரகாரம் பூமிதான் பிரபஞ்சத்தின் மையம். அதைச்சுற்றித் தான் எல்லா கிரகங்களும் (சூரியன் உட்பட) சுற்றுகின்றன... விட்டால் இவன் சமயத்தையே பிழை கூறுவான்.. இவனது கொள்கைகள் தவறானவை என கத்தோலிக்க திருச்சபை பிரகடனப்படுத்தியதோடு அவருக்கு தண்டனையும் வழங்கியது.

சில வருடங்கள் கழித்து... கத்தோலிக்க திருச்சபைதான் நாட்டின் அதிகாரங்களைக் கொண்டிருந்தது. அரசனே பாப்பாண்டவருக்கு கீழ்தான்!! இதனால் ஜனநாயக மக்கள் முறைமை தோன்றுவதற்கான சாத்தியப்படுகள் இல்லாதிருந்தது.. மக்களுக்கு உரிமைகள் குறைவு.. திருச்சபையையும் யாரும் எதிர்க்க முடியாது.. அவர்கள் வைத்தது தான் சட்டம்!! எத்தனை நாட்களுக்குத் தான் மக்கள் பொறுத்திருப்பார்கள்???

விளைவு........?? கிறிஸ்துவ மதத்தின் பெயரால் கத்தோலிக்க திருச்சபை கொண்டிருந்த மூட நம்பிக்கைகளையும், அதிகாரத்தையும் எதிர்த்து ஒரு குழு உருவானது...The Illuminati !! இவர்களது நோக்கம்- ரோமன் கத்தோலிக்கத்தையும், பவாரியா ராஜ்ஜியத்தையும் தூக்கியெறிந்து அதற்குப் பதிலாக ஜனநாயக ஆட்சியைப் பரப்புதல்..
உலகம் அனைத்தும் ஒரே நாடு என்ற new world order கொள்கையை அவர்கள் கொண்டிருந்தனர்.
கத்தோலிக்க மதத்தின் மூட நம்பிக்கைகளை விஞ்ஞானத்தின் உதவிகொண்டு தகர்த்தெறிந்தனர்.

படத்தின்படி இந்த இல்லுமினாட்டியின் ஆரம்பகர்த்தா கலிலியோ கலிலி.. சிற்பக்கலைஞர் பெர்னினி அதன் முக்கியமான உறுப்பினர்களுல் ஒருவர்..

(ஆனால் உண்மையில் இல்லுமினாட்டி உருவானது 1776ல்... கலிலியோ இறந்தது 1642ல்... எங்கேயோ இடிக்கிறதே.. நமக்கேன் அது??)

1668ல் இல்லுமினாட்டியின் குடைச்சல் தாங்காமல் திருச்சபையினர் அவர்கள் மீது போர் தொடுத்தனர். இந் நிகழ்வு la purga என அழைக்கப்படுகிறது. இல்லுமினாட்டியின் உறுப்பினர்களைக் கைது செய்து அவர்களது நெஞ்சில் சிலுவை வடிவமாக சூடு வைத்து அனுப்பினர்... இத்தோடு அவர்கள் ஒழிந்தார்கள் என்ற நிம்மதி திருச்சபைக்கு..

ஆனால்... அவர்கள் தீர்ந்து போகவில்லை.. தலைமறைவாகினர். பரம்பரை பரம்பரையாக தலைமுறைகளைத் தாண்டி வாழ்ந்து வருகின்றனர். தங்களுக்கு நிகழ்ந்த கொடூரத்திற்கு பதிலடி கொடுக்க தருணம் பார்த்துக் காத்திருக்கின்றனர்..

நிகழ்காலத்திற்கு வருவோம்.. ஐரோப்பியன் நியூக்கிளியர் ஆராய்ச்சி மையத்தில் இதுவரை இருந்ததிலேயே மிக அதிக அன்டிமேட்டர் துகள்களைக் கொண்ட 3 குப்பிகளை பாதுகாத்து வைக்கின்றனர். 3 குப்பிகளும் வைக்கப்பட்ட இடத்திற்கு பாதிரியார் சில்வானோ, டாக்டர் விட்டோரியா ஆகியோருக்கு மட்டுமே அனுமதி உண்டு. அதுவும் பாதுகாப்புக்காக retina- scan machine பொருத்தியிருக்கின்றன. ஒரு நாள் யாரோ ஒருவன் பாதிரியார் சில்வானோவைக் கொன்று, அவரது கண்ணை வெட்டியெடுத்து, அதைப்பயன்படுத்தி ரெடினரா ஸ்கானரை ஏமாற்றி குப்பியை திருடிக் கொண்டு போய் விடுகிறான்.

அந்தக் குப்பியில் இருக்கும் அன்டிமேட்டரின் காந்தக் கொள்கைப் புலம் செயலிழந்தால் பாரிய சக்தியை உருவாக்கும். அந்த சக்தி வெளிப்படுமானால் ஒரு நகரையே அழித்துவிடுமாம்..

இலுமினாட்டிக்கு நேர்ந்தது என்ன? அன்டிமேட்டர் யாரால் திருடப்பட்டது? ஏன்?

The Departed (2006)

2010-10-03T09:25:00.000-07:00

லியனார்டோ டிகாப்ரியோ+மாட் டேமன் இணையும் பக்கா அதிரடி+திரில்லர் ஸ்டோரி, மார்ட்டின் ஸ்கோர்சீஸுக்கே உரிய பாணியில்... இதைத் தவிர வேறென்ன வேணும்??

3 வருஷத்துக்கு முதல்ல படம் பார்த்தப்போ நானும் இப்படித்தான் நினைச்சேன்.. ஆனா படத்தோட திரைக்கதை அமைப்பு இருக்கே.. அது இன்னும் ஒருபடி மேல உயர்த்தி வைச்சிருக்கு!! சமீபத்தில் தான் மீண்டும் படம் பார்க்க கிடைத்தது. அப்போது இருந்த விறுவிறுப்பு கொஞ்சமும் குறையவில்லை! குறிப்பா சொல்லனும்னா படத்தை இன்னும் ரசிக்க முடிஞ்சுது!! அதான் அதுக்கு ஒரு பதிவை போடலாம்னு எழுதுறேன்..

ஏதாவது ஒரு குழுவில் இருப்பவர், எதிர்க்குழுவில் நுழைஞ்சு அவங்களுக்குள் ஒருத்தவாவே நடிச்சு, வேவு பார்த்து?, எதிர்க்குழுவின் பிளானையெல்லாம் முறியடிக்க தன் குழுவுக்கு உதவினால் அவரை "கறுப்பு ஆடு" என்று சொல்லுவோமில்லையா?? அப்படிப்பட்ட இரண்டு கறுப்பு ஆடுகளைச்சுற்றித் தான் கதை போகுது!!

அயர்லாந்து மாஃபியா குழுவின் தலைவர் பிராங் காஸ்டெல்லோ, ஸ்டேட் பொலிஸாக நடித்து வேவு பார்க்க தனக்கு ஒரு ஆள் தேவைப்பட்டதால் சுலிவானை(மாட் டேமன்) அனுப்புகிறார். அதே நேரம் குற்றவாளிகளால் நிறைந்து இருக்கும் ஒரு குடும்பத்திலிருந்து வரும் நல்லவராய் காஸ்டிகனும் (டிகாப்ரியோ) ஸ்டேட் பொலிஸில் சேர விண்ணப்பிக்கிறார்.. சுலிவானுக்கு விஷேட விசாரணைக்குழுவில் இடம் கிடைக்கும் அதே வேளையில், காஸ்டிகன் உயர் அதிகாரிகளான கேப்டன் குயினனாலும், சார்ஜன்ட் டிக்னமாலும் உளவு முகவராக்கப்படுகிறான். இந்த விஷயம் ரொம்ப ரகசியமாக இருக்க வேண்டுமென்பதால் காஸ்டிகனை பொய் கேஸில் போட்டு சிறைக்கு அனுப்புகின்றனர். காஸ்டிகன் போலீஸ்தான் என்ற விஷயம் டிக்னமுக்கும் குயினனுக்கு மட்டும்தான் தெரியும்..

சிறையிலிருந்து வெளியில் வரும் காஸ்டிகன் கொஞ்சம் கொஞ்சமாக காஸ்டெல்லோவின் மாஃபியாவில் இடம்பிடிக்கிறான் (குயினைனின் உத்தரவுப்படி). இருவரும் (காஸ்டிகன், சுலிவான்) தாங்கள் சேர்ந்த இடங்களில் நன்மதிப்பை பெறுவதோடு தங்களது உண்மையான க்ரூப்புக்கும் அவ்வப்போது தகவல்களைக் கூறி அவர்களை ஆபத்துக்களின் போது காப்பாற்றுகிறார்கள். "பல நாள் திருடன் ஒரு நாள் அகப்படுவான்" என்பது போல இரு தரப்பினதும் பிளான்கள் சொதப்ப.. இரு தரப்பிலும் கறுப்பு ஆடுகள் இருப்பது வெளிச்சத்துக்கு வருகின்றது. மாஃபியாவிலிருக்கும் கறுப்பு ஆட்டை சுலிவானும், பொலீஸில் இருக்கும் கறுப்பு ஆட்டை காஸ்டிகனும் தேட ஆரம்பிக்க விறுவிறுப்பு அதிகரிக்கிறது..

இதற்கிடையே ரெண்டு பேரும் ஒருத்தரையொருத்தர் பார்க்காமலிருந்தும், சொல்லி வைத்தாற் போல ஒரே பெண்ணைக் காதலிக்கிறார்கள்..(காதல் தேசம்??) மாபியாவிலிருக்கும் கறுப்பாட்டை கண்டுபிடிக்க சுலிவான் காஸ்டெல்லோவிடம் குழுவிலிருக்கும் ஆட்களின் பெயர், விபரங்களைத் தரச் சொல்லிக் கேட்கிறான். சுலிவானை தியேட்டரில் சென்று சந்திக்கும் போது காஸ்டெல்லோவுக்குத் தெரியாமல் காஸ்டிகன் அவனைப் பின் தொடர்கிறான். எவ்வளவுதான் முயன்றும் காஸ்டிகனால் சுலிவானைப் பார்க்க முடியாமல் போய் விடுகிறது.

காஸ்டிகன் மாஃபியாவில் காஸ்டெல்லோவின் நம்பிக்கைக்கு பாத்திரமாக வளரும் அதேவேளை சுலிவானுக்கு மாஃபியா கேஸை விசாரிக்கும் பொறுப்பு அளிக்கப்படுகிறது. குயினைன் காஸ்டிகனை ரகசியமாக சந்திக்கச் செல்லும் போது, சுலிவான் தனது அதிகாரத்தை பயன்படுத்தி போலீஸையே குயினைனை பின் தொடர ஏவுவதோடு, மாஃபியாவிடம் கறுப்பாட்டை பிடிக்கச் சொல்கிறான். மாஃபியா குயினைன் இருக்குமிடத்தை தேடி வரும் சேதியை அறியும் காஸ்டிகன் தப்பிக்கிறான். கறுப்பாட்டைப் பிடிக்க அதிரடியாக உள்ளே நுழையும் மாஃபியா கும்பல் குயினைன் மட்டும் இருப்பதைக் கண்டு விரக்தியால் அவரைக் கொலை செய்கிறது!!!

சுலிவானின் நடவடிக்கையால் தான் குயினைன் கொலை செய்யப்பட்டிருக்கிறார் என எண்ணும் டிக்னம் அவனைத் தாறுமாறாக தாக்கியதால் டிஸ்மிஸ் செய்யப்படுகிறார்.. தான் நல்லவன் எனத் தெரிந்தவர்களில் ஒருவர் இறந்து விட்டார், மற்றையவர் டிஸ்மிஸ், புதுதாக ஒரு அதிகாரி (வேறு யாருமல்ல சுலிவானே தான்!!), தான் யாரென்ற உண்மை தெரிஞ்சால் கண்டதுண்டமாக வெட்டிப் போடும் மாஃபியா கும்பலுக்கு நடுவில் மாட்டிக் கொள்கிறார் காஸ்டிகன்...(கொஞ்சமாக பில்லா சாயல் வருகிறதா??)

குயினைனின் டயரியிலிருந்து காஸ்டெல்லோ காசுக்காக தனக்குக் கீழ் வேலை செய்பவர்களையே காட்டிக் கொடுத்து விடுவான் என்ற உண்மையை அறிகிறான் சுலிவான்!! எங்கே தனது குட்டும் வெளிப்பட்டு விடுமோ என்ற அச்சத்தில் காஸ்டெல்லோ வசமாகச் சிக்கும் ஒரு தருணத்தில் அவனைத் தீர்த்துக் கட்டி விடுகிறான். ரெண்டு சைடு பெரிய தலைகளும் (குயினைன், காஸ்டெல்லோ) குளோஸ்!! இனி கவனிக்க வேண்டியது தனது க்ரூப்பிலேயே இருந்த மற்ற கறுப்பாடைத் தான்... சுலிவானும், காஸ்டிகனும் one-on-one மோதும் சிச்சுவேஷன் வருகிறது..
எப்படி? என்ன நடக்கும்? காதல் கதைக்கு என்ன ஆச்சு?? இதெல்லாம் நீங்கதான் படத்தில் பார்க்கனும்..

கடைசி 5 நிமிடங்களில் தடபடவென (இது ஏன் என்று படம் பார்த்தவர்களுக்கு தெரியும்..) திரைக்கதை நகரும் விதம் முற்றிலும் எதிர்பாராதது !
நல்லவர்களுக்காக போராடும் காஸ்டிகன் மேலதிகாரிகளாலேயே அவமானப்படுத்தப்படுவதும் கெட்டவங்களுக்காக போராடும் சுலிவானுக்கு ராஜ மரியாதை கிடைப்பதும் நிஜத்தின் வேதனையான பிரதிபலிப்பு... மாட் டேமனை நெகடிவ் ரோலில் ஏற்க முடியாது போகலாம் என்பதை அறிந்தே டைரெக்டர் அதற்காக மெனக்கெட்டிருக்கிறார்..

சுலிவான், காஸ்டிகன் பாத்திரங்களில் ஏதாவது ஒற்றுமை பார்ப்பீர்களோ இல்லையோ எக்கச்சக்கமான வேற்றுமைகள் பார்ப்பீர்கள். அவற்றுள் சில பட்டியல் படுத்தப்பட்டுள்ளது-

சுலிவான்
* வரும் காட்சிகளில் அனேகம் நல்ல லைட்டிங் போட்டிருப்பார்கள்.
* சுலிவான், குயினைன் என்ற பெயர்கள் "உ" உச்சரிப்பில் தொடங்கி "ன்"ல் முடிகிறது.
* போனில் கதைக்கும் காட்சிகள் அதிகம். (சோம்பேறித்தனம்??)
* டைம் பாஸாக ஹீரோயினை சந்திக்கிறான்.
* நல்ல குடும்பம், தீய நடவடிக்கைகள்.
* லட்சியத்துக்காக போராடவில்லை. (வழக்கறிஞர் ஆதல்)

காஸ்டிகன்
* வரும் காட்சிகள் பெரும்பாலும் dim லைட்டிங்.
* காஸ்டிகன், காஸ்டெல்லோ எனும் பெயர்கள் "காஸ்ட்" என தொடங்குகின்றன.
* சண்டைக் காட்சிகள் அதிகம். (சுறுசுறுப்பு)
* மன உளைச்சலில் இருந்த சமயத்தில் ஹீரோயினை சந்திக்கிறான்.
* தீய குடும்பம், நல்ல நடவடிக்கைகள்.
* லட்சியத்துக்காகத் தானே இவ்வளவு போராட்டமும். (ஸ்டேட் பொலீஸ் ஆதல்)

ரேட்டிங்ஸ்,
நடிப்பு = 18
இசை = 18
கதை+திரைக்கதை = 18
கலை+ஒளிப்பதிவு = 16
இயக்கம் = 19

மொத்தம் = 89% சூப்பர்

Shutter Island (2010)-2

2010-09-28T04:15:00.000-07:00

அட.. டிகாப்ரியோ படத்துக்கு நான் தொடர்பதிவு எழுதறது இது ரென்டாவது முறை!! கவலைப்படாதீங்க இந்த படத்தை ரென்டு பதிவோடயே முடிச்சுக்கறேன்...

ஆன்ட்ருவா? டெடியா? என்ற இந்த மில்லியன் டாலர் கேள்விக்கு விடை ஆன்ட்ருதான்!!
ஆஷ்கிளிஃப் ஒரு கொடூரமான மருத்துவமனை என்ற பேச்சுக்கெல்லாம் இடமில்லை.. மொத்தத்துல தானும் குழம்பினதோட, பார்க்கற நம்மளையும் குழப்பிவிட்டிருக்காரு ஹீரோ ஆன்ட்ரு..

நீங்க ஷட்டர் ஐலன்டை இரன்டாவது முறையா பார்க்கப்போறீங்கன்னா...இந்த முறை டிகாப்ரியோ ஒரு பைத்தியம் தான் என்ற கருத்தை மனதில் நிறுத்திக் கொண்டு பாருங்கள்.. அப்பத்தான் கதை புரியும்...

ஆஷ்கிளிஃப் ஒரு நல்ல மருத்துவமனை. இங்கு வேலை செய்யும் டாக்டர்களில் காவ்லியும் சீஹானும் தான் மனநோயாளிகளை உளவியல் ரீதியா குணப்படுத்தும் முறையில் விருப்பம் உள்ளவங்க... டாக்டர் நேஹ்ரிங்குக்கும் வார்டனுக்கும் அந்த முறை சுத்தமாவே பிடிக்காது. போதைப்படுத்துவதாலும், அடித்துதைப்பதாலும் மட்டுமே நோயாளிகளைக் குணப்படுத்த முடியும் என எண்ணுபவர்கள் அவர்கள்!!

ஆன்ட்ருவின் ரியல் ஸ்டோரி

ஆன்ட்ரு லாடிஸ் ஒரு மார்ஷல். அவனது மனைவியான டொலரஸ் சிறிது மனநிலை சரியில்லாதவர். ஆன்ட்ரு 2ம் உலகப்போரில் தான் பங்கேற்றபோது ஏற்பட்ட கசப்பான அனுபவங்களால் மன உளைச்சலுக்கு உள்ளாகிறான். அவனது மனைவி ஒருநாள் அவர்களது 3 பிள்ளைகளையும் தவறுதலாக நீரில் மூழ்கடித்து கொல்கிறாள். இதனால் விரக்தியடையும் ஆன்ட்ரு (அவள் தெரிந்தே செய்திருக்கமாட்டாள் என்பதை மறந்து) அவளைக் கொலை செய்கிறான்.

குற்ற உணர்வால் பாதிக்கப்படும் ஆன்ட்ரூவின் ஆழ்மனதால் அவனுக்கே தெரியாமல் ஆன்ட்ரூ இன்னொருவனாக உணர்கிறான் (change of personna). அதாவது தான் இன்னும் பெடரல் மார்ஷல் எனவும், தனது பெயர் டெடி எனவும் எண்ணுகிறான். மேலும் ஷட்டர் ஐலன்ட் பற்றி புதுவிதமான எண்ணங்களை உருவாக்கி, இல்லாத ஒரு பேஷன்டை (ராச்சேல் சொலான்டோ) தேடுவதாக எண்ணல் என தனது கற்பனைகளை வளர்த்துக் கொண்டே செல்கிறான்...

இதில் என்ன விசித்திரமென்றால் andrew laeddis என்ற தனது பெரில் உள்ள எழுத்துக்களைக் கொண்டே edward daniels என்ற பெயரையும்
dolores chanal என்ற மனைவியின் பெயரிலுள்ள எழுத்துக்களைக் கொண்டு rachel solando என்ற பெரையும் உருவாக்கியிருக்கிறது அவனுடைய ஆழ் மனது!! (இது தான் குறிப்பில் எழுதப்பட்டிருந்த rule of 4.. நான்கு விதமான பெயர்கள்!!)

இது படத்தில் வராது.. ஆனால் கதையில் வரும்,
" ஆன்ட்ருவும், நொய்சும் சிறையில் நண்பர்களாக இருந்திருக்கிறார்கள்.. அப்பொழுதும் தான் டெடி என்ற நினைப்பில் இருந்திருக்கிறான் ஆன்ட்ரு. நொய்ஸ் தான் ஷட்டர் ஐலன்ட் ஒரு கொடூரமான மருத்துவமனை எனும் எண்ணத்தை டெடியின் மனதில் விதைத்தான்.. ஒருநாள் நொய்ஸ் டெடியை அவனது உண்மைப் பெயரான லாடிஸ் என அழைக்க மனரீதியாக கோபமடையும் டெடி அவனைத் தாக்குகிறான். விஷயமறிந்த வார்டன் டெடியை மூளையைத் திருகும் வைத்தியம் பார்க்க கொண்டு செல்கிறார். அவரைத் தடுக்கும் காவ்லி தனக்கு டெடியை மனரீதியாக குணப்படுத்த ஒரேயொரு கடைசிச் சந்தர்ப்பம் தருமாறு வேண்டுகிறார். வார்டனும் சம்மதிக்கிறார்....."

காவ்லியின் பிளான்

கிட்டத்தட்ட படத்தில் பெரும்பகுதி காவ்லியின் பிளானின்படியே பயணிக்கிறது. எட்வர்ட் டெடி என்ற ஆன்ட்ருவின் கற்பனை உலகத்திலிருந்து அவனை மீட்டெடுத்து உண்மையை அவனுக்கு புரியவைக்கவே இப்படியொரு திட்டம்.. காவ்லியின் டீமால் உருவாக்கப்பட்ட அந்த துருப்புச்சீட்டு மிக முக்கியமானது. அதில் வரும் law of 4 ஆனது 2 உண்மையான பாத்திரங்களைக் கொண்டே மேலும் 2 கற்பனைப் பாத்திரங்கள் உருவாக்கப்பட்டன என்பதை ஆன்ட்ருவுக்கு புரியவைக்க உதவுகிறது.
மற்றையது patient no 67.. உண்மையில் ஆன்ட்ரு(டிகாப்ரியோ) தான் 67வது பேஷன்ட். எனவே டெடி நான்தான் ஆன்ட்ரு என ஏற்றுக்கொள்ளும் வரை அந்த 67வது பேஷன்ட் கிடைக்கமாட்டான்..(ரென்டு பேரும்தான் ஒரே ஆள் ஆச்சே..)

இறுதிக் காட்சி

இறுதிக்காட்சியில் ஆன்ட்ருவும், சீஹானும்(ஆன்டருவின் கற்பனை உலகின் "சக்") பேசும் போது, ஆன்ட்ரு டாக்டர் காவ்லியும், வார்டனும் தன்னையே கூர்ந்து கவனிப்பதை அவதானிக்கிறான். நான்தான் ஆன்ட்ரு என ஒத்துக் கொண்டிருந்தாலும் குற்ற உணர்வு அவனை விடவில்லை. குற்றவாளியான ஆன்ட்ருவாக இருப்பதா.. அல்லது நல்லவனான ஆனால் நிஜத்தில் இல்லாத எட்வார்டாக வாழ்வதா.. எனும் யோசனையில் தவிக்கிறான். இதனால்தான் அவன் டாக்டர் சீஹானிடம் "மிருகமாக வாழ்வதா? அல்லது மனிதனாக சாவதா மேல்?" எனக் கேட்கிறான்.

ஆன்ட்ரு மனநிலை சரியில்லாதவன் தான் என நிரூபிக்கும் சான்றுகள்-

* தீவில் உள்ள பொலிஸ்காரர்கள் டெடியையும், சக்கையும் வரவேற்கும் போது டெடியின் துப்பாக்கியை வாங்கிக் கொள்கிறார்கள். உண்மையில் ஒரு மார்ஷலுக்கு எங்கு வேண்டுமானாலும் துப்பாக்கியைக் கொண்டுசெல்லும் அதிகாரமுண்டு. ஆனால் டெடிதான் மனநோயாளியென அவர்களுக்கு அறிவிக்கப்பட்டுள்ளது. அவனால் எதுவித அசம்பாவிதமும் ஏற்படாமலிருக்க வாங்கிக் கொள்கின்றனர்.
அதே போல் சக்கிடம் கேட்கும் போது, சக் துப்பாக்கியை எடுக்கத் தெரியாமல் திணறி லெதர் உறையுடன் சேர்த்து எடுத்துக் கொடுக்கிறார். (துப்பாக்கியை எடுக்கக் கூட தெரியாமல் உதவி மார்ஷல் இருப்பார்?? சக்தான் உண்மையில் வைத்தியராயிற்றே..)

* அவ்வாறே படம் முழுதும் டெடியை நாய்க்குட்டி போல சுற்றிச் சுற்றி கண்காணிக்கும் பொலிசார், ராச்சேலைத் தேடுவதில் அக்கறை காட்டிக் கொள்ளவில்லை.

* படத்தின் ஆரம்ப சீன்களில் நிலத்தைக் கூட்டும் ஒரு மனநோயாளிப் பெண் டெடியைப் பார்த்து கையசைக்கிறாள்.. ஸோ.. அவளுக்கு டெடியை ஏற்கெனவே தெரியும்..(நோயாளியாக) !!

* டெடி மனநிலை பாதிக்கப்பட் பெண்ணை விசாரிக்கும் போது அவள் டாக்டர் சீஹான் பற்றி புகழ்கிறாள்... அப்பொழுது அவள் சக்கை வித்தியாசமான ஒரு பார்வை பார்ப்பாள். (அவள் பேசுவதே அவரைப்பற்றித் தானே!!)
இந்த நாடகத்தின் படி யாருமே டெடியை நோயாளியாகப் பார்க்கமாட்டார்கள்.(பேஷன்டுக்கு ராஜ மரியாதைதான்) ஆகவே டெடி இலகுவாக அங்கிருந்து தப்பிக்க சந்தர்ப்பம் உண்டு. இதைத் தெரிந்து கொண்ட அவள் டெடியைத் தப்பித்து ஓடுமாறு சீட்டில் எழுதிக் கொடுக்கிறாள்..

* டெடி, டாக்டர் நேஹ்ரிங்கிடம் 67வது நோயாளி பற்றி staff meetingல் சொல்லும் போது., அவர் எரிச்சலடைகிறார். (டாக்டர் காவ்லி ஒரு நோயாளியை இவ்வளவு சுதந்திரமாக நடமாட விட்டிருப்பதால்..)

நீரும் நெருப்பும்

படத்தில் ஆன்ட்ருவின் கற்பனை உலகத்துக்கு அடையாளமாக நெருப்பு பயன்படுத்தப்பட்டுள்ளது. வார்ட் Cயில் தீக்குச்சி வைத்திருக்கும் போதும், நெருப்பு மூட்டிய குகையில் ராச்சேல் எனக்கூறும் பெண்ணுடன் உரையாடும் போதும், காரை வெடிக்க வைக்கும் போதும், மனைவியினதும் பிள்ளைகளினதும் உருவங்கள் பிரமைகளாகத் தோன்றும்!!!

அதே போல் நீர் நிஜத்தின் அடையாளமாகும். டொலரஸ் பிள்ளைகளை நீரில் மூழ்கடித்துக் கொன்றாள்.. நீர் படத்தில் வரும் இடங்களில் டெடி சற்று மன உளைச்சலுக்கு உள்ளாகிறான்/ உடம்பு சுகமில்லாததைப்போல் உணர்கிறான்..

இது தாங்க படத்தை நீங்கள் வியூவில் பார்க்கும் போது கவனிக்க வேண்டியவை.. இந்த மாதிரியான படத்தை ஒரு தடவை பார்த்தால் போதுமா என்ன? (நானும் இன்னொரு தடவை பார்க்லாம் என்றிருக்கிறேன்..)

இவ்வளவு கஷ்டமான படத்தை திரைப்படமாக கொண்டு வந்த படக்குழுவினருக்கு என்ன சொல்லிப் பாராட்டினாலும் அது தீராது..

ரேட்டிங்ஸ்,

நடிப்பு = 17
இசை = 16
கதை+திரைக்கதை = 18
கலை+ஒளிப்பதிவு = 19
இயக்கம் = 16

மொத்தம் = 86% சூப்பர்

Shutter Island (2010)-1

2010-09-25T05:36:00.000-07:00

லியனார்டோ டிகாப்ரியோ நடித்த படங்களை பிடித்த வரிசையில் அடுக்கச் சொன்னால் டைட்டானிக், இன்செப்ஷனுக்குப் பிறகு இந்தப் படத்தைத் தான் தேர்ந்தெடுப்பேன். படம் ரிலீசான ஒரு மாதத்திலேயே படம் பார்த்துவிட்டேன். ஆனால் அப்போது என்னால் கதையை முழுதாக விளங்கிக் கொள்ளவில்லை. படத்தை இரண்டாவது தடவையாகப் பார்க்கும் போது தான் குழப்பம் தீர்ந்தது...

இப்படம் டென்னிஸ் லிஹேனால் எழுதப்பட்ட shutter island நாவலைத் தழுவி எடுக்கப்பட்ட, ஸ்கோர்சீஸ்-டிகாப்ரியோ கூட்டணியில் உருவாகும் 2வது படமாகும். இந்தப்படத்தை முதல்தடவை பார்க்கும் போது ஒருமாதிரியும், 2ம் தடவை பார்க்கும் போது வேறு மாதிரியும் தென்படும்... அதாவது ஒரே கல்லுல ரென்டு மாங்கா!!

குழப்புகிறதா?.... படத்தின் கதை ஒன்று தான். ஆனால் முதல் தடவையின் போது ஹீரோவின் பார்வையிலும் (கிட்டத்தட்ட 1st person view)
2வது தடவை ஹீரோ தவிர்ந்த ஏனைய பாத்திரங்களின் பார்வையிலும் (இது 3rd person view) படத்தை அனுபவிப்பீர்கள்..

கதையை முடிந்தளவு குழப்பாமலே சொல்ல முயற்சிக்கிறேன்..

1954ல் யு.எஸ்.மார்ஷலான எட்வார்ட் "டெடி" டானியலும், அவனுக்கு உதவியாக அனுப்பப்படும் "சக்" ஓலும் மனநிலை பாதிக்கப்பட்ட குற்றவாளிகளுக்கான "ஆஷ்கிளிஃப்" மருத்துவமனை அமைந்துள்ள தீவுக்கு காணாமல் ஒரு கேஸ் சம்பந்தமாகச் செல்கின்றனர். அந்தத் தீவில் சிகிச்சை பெற்றுவரும் மனநோயாளிகளில் ஒருவரான ராச்சேல் சொலான்டோ எனும் பெண் பூட்டப்பட்ட அறையிலிருந்து மாயமாக காணாமல் போயிருக்கிறாள். அவளைப்பற்றி விசாரிக்கவே டெடி அழைத்து வரப்பட்டிருக்கிறான்.

ஷட்டர் ஐலன்டில் சிகிச்சைப்பிரிவுகள் மூன்று விதமாக பிரிக்கப் பட்டுள்ளன. A பிரிவு ஆண்களுக்கானது. B பிரிவு பெண்களுக்கானது. C பிரிவு மிகக் கொடூரமான நோயாளிகளுக்கானது. மொத்தம் 66 நோயாளிகள் அங்கு இருக்கிறார்கள்.

அங்கு டாக்டர் காவ்லி என்பவரிடம் விசாரிக்கும் போது அவர், ராச்சேல் தனது மூன்று பிள்ளைகளையும் நீரில் மூழ்கடித்துக் கொன்றதால் இங்கு சேர்க்கப்பட்டிருந்தாள் எனக் கூறுகிறார்.
டெடி தனது விசாரணையின் முதற்கட்டமாக அவளது ரூமில் சென்று பார்க்கிறான். அங்கு "who is 67?" எழுதப்பட்ட துண்டொன்று கிடைக்கிறது
டெடி தீவிலுள்ள கலங்கரை விளக்கத்தைப் பார்த்து அங்கு தேடிப்பார்த்தீர்களா எனக் கேட்கும் போது மருத்துவமனை ஊழியர்கள் ஆமாம் என்று தலையசைக்கிறார்கள். பின் டெடி ஹாஸ்பிட்டலின் பதிவேடுகளைக் கேட்கும் போது அவர்கள் தர மறுக்கிறார்கள்.

வேறு துருப்புக்கள் கிடைக்காததால் டெடி மருத்துவமனையிலுள்ள தாதியர்களையும், நோயாளிகளையும் விசாரிக்கிறான். ராச்சேலுக்கு சிகிச்சையளித்துவந்த டாக்டர் சீஹான் அவள் தலைமறைவான பின் விடுமுறைக்காக வெளியே சென்றிருப்பதாக கூற டெடியின் எதிர்பார்ப்பு நிலைகுலைகிறது. நோயாளிகளை விசாரிக்கும் போது பெண்ணொருத்தி யாருக்கும் தெரியாமல் ரகசியமாக டெடியிடம் காகிதமொன்றில் எழுதிக் கொடுக்கிறாள். அதில் "ஓடு" என எழுதப்பட்டுள்ளது.

டெடியின் மனைவி டொலரஸ் சனல், ஆன்ட்ரூ லாடிஸ் என்பவன் பற்ற வைத்த நெருப்பால் 2 வருடங்களுக்கு முன் இறந்து போயிருக்கிறாள். இதனால் கைது செய்யப்பட்ட ஆன்ட்ரூ இதே தீவில் தான் சிகிச்சைக்கு வைக்கப்பட்டிருந்தான். ஆனால் திடீரென ஒருநாள் மாயமாய் மறைந்து போயிருக்கினாறான். டெடி ஷட்டர் ஐலன்ட் வந்த இரவன்று, அவன் உறங்கும் போது கனவில், அவனது மனைவி தோன்றி, "ராச்சேலும், ஆன்ட்ரூவும் எங்கும் செல்லவில்லை. இங்குதான் இருக்கிறார்கள்" என்கிறாள். இதனால் டெடி தனது வேட்டையை தீவிரமாக்குகிறான்!

இது வரை இது ஒரு துப்பறியும் கதை......

மறுநாள் டாக்டர் காவ்லி ராச்சேல் திரும்பக் கிடைத்துவிட்டாள் எனக் கூறி அவளை டெடியிடம் அழைத்து வருகிறார். ராச்சேலுக்கு டெடியைக் கண்டதும் 2ம் உலகப் போரில் இறந்ததுபோன தனது கணவனின் நினைவு வர டெடியை கட்டித் தழுவுகிறாள்.
இதற்கிடையே டெடி மனைவியினதும், 2ம் உலகப் போரினதும் நினைவுகளாலும், விம்பங்களாலும் அடிக்கடி அவதிப்படுகிறான். இதனால் காவ்லியிடமிருந்து அஸ்பிரின் மாத்திரைகளும் எடுத்துக் கொள்கிறான்.

ராச்சேல் திரும்பக் கிடைத்திருந்தாலும், ஆன்ட்ரூவைக் கண்டுபிடிக்கும் வரை ஓய்வதில்லை என தீர்மானிக்கும் அவன் யாருக்கும் தெரியாமல் சக்குடன், C வார்டுக்கு செல்கிறான். அங்கே நொய்ஸ் எனும் நோயாளி, இந்த விசாரணையெல்லாம் டெடியின் நன்மைக்காகத்தான் எனக் கூறுகிறான். இதனால் சற்றே குழம்பிப் போகிறான் டெடி. அங்கு தேடியும் ஆன்ட்ரு கிடைக்காததால் கலங்கரை விளக்கத்துக்குள் புக எண்ணுகிறான்.

ஐலண்டிலிருந்து யாருக்கும் தெரியாமல் அங்கு செல்வது கஷ்டம்.. பாறைகள் வழியே செல்ல டெடி எடுத்த முயற்சி தோல்வியில் முடிந்தது.
திரும்பி வந்து பார்க்கையில் சக் பாறை உச்சியிலிருந்து விழுந்து இறந்து கிடக்கிறான்!!!
டெடி பாறைகளின் அடிப்பகுதியின் இடையே சிறு குகையொன்றிருப்பதைப் பார்க்கிறான். அங்கே ஒரு பெண் அமர்ந்திருக்கிறாள். அவள், நான்தான் உண்மையான ராச்சேல் எனவும், "ஆஷ்கிளிஃப் மருத்துவமனை என்ற பெயரில் நோயாளிகளை வைத்து கொடூரமான பரிசோதனைகளை கலங்கரை விளக்கத்து அறையில் செய்கிறார்கள்" எனவும் கூறுகிறாள்.

இறுதியாக ஷட்டர் ஐலன்டின் மர்மங்களை கிழித்தெறியும் நோக்கில் டெடி கலங்கரை விளக்கத்துக்கு வந்து சேர்கிறான்.
அங்கே...

இது வரை இது ஒரு த்ரில்லர் கதை...

டாக்டர் காவ்லி டெடியைப் பார்த்து, "உனது பெயர் டெடி இல்லை.. உன்னுடன் சக் என்று யாரும் வரவில்லை.. நீதான் ஆன்ட்ரூ லாடிஸ்... மனநிலை சரியில்லாத உனது மனைவி தவறுதலாக உனது மூன்று பிள்ளைகளையும் கொன்று விட, நீ பதிலுக்கு அவளைக் கொன்றாய்.. அதனால் தான் உன்னை இங்கு நோயாளியாக சேர்த்தோம்... நீதான் 67வது நோயாளி... ராச்சேல் என்று யாருமே இருக்கவில்லை.. நீ உன்னை நீயே டெடி என்ற மார்ஷலாக நினைத்துக் கொண்டிருந்தாய்.. உன்னை வழிக்கு கொண்டுவரத்தான் இப்படியொரு நாடகத்தையே நடத்தினோம்..." எனக் கூறுகிறார்.
அப்போது அங்கே சக் வந்து, தான் டாக்டர் சீஹான் எனவும், தான்தான் ஆன்ட்ருவுக்கு (டெடி) சிகிச்சையளிப்பவர் எனவும் கூறுகிறார். டெடியும் நடந்ததெல்லாம் தனது கற்பனைதான் என ஒத்துக் கொள்கிறான்!!

இப்ப இது சைக்காலஜி கதை....

மற்றவர்கள் எல்லோரும் (சக் உட்பட) சொல்வதால்தான் டெடி ஒத்துக் கொள்கிறானா? அவனுக்கு கொடுக்கப்பட்ட அஸ்பிரின் மாத்திரையெல்லாம் போதை வஸ்துக்களா? ஆஷ்கிளிஃப் இப்படித்தான் மனநிலை நன்றாக உள்ளவர்களையும் பைத்தியமாக்கி வருகிறதா? அல்லது காவ்லி சொல்வது தான் உண்மையா? அப்படியானால் ஏன் இப்படியொரு நாடகம்?

இந்தக் கேள்விகளுக்கெல்லாம் புத்தகத்தை வாசிக்காமல் முதல் தடவை படம் பார்க்கும் போதே விடை தெரிந்திருந்தால் நீங்கள் அதிமேதாவி..
இல்லையென்றால்.. (அட என்ன மாதிரியே இருக்கீங்களே!!) 2வது தடவை 3rd person viewல் பார்த்துத் தான் புரிஞ்சுக்கனும்...
எப்படி புரிஞ்சுக்கறது?

அடுத்த பதிவில் தொடரும்..

Toy Story 3 (2010)

2010-09-21T20:28:00.000-07:00

படம் வந்து நாலு மாசம் ஆகுது... அப்படியா? சொல்லவே இல்லை...
டைம் கிடைக்கல, ஏனைய பதிவுகளில் பிஸி(இன்செப்ஷன் தான்..ஹி..ஹி..), வேற படங்கள் பார்த்துக் கொண்டிருந்தேன்..
இப்படி எவ்வளவு காரணம் சொன்னாலும் தப்பு தப்புதான்.. போன வாரம்தான் படம் பார்த்தேன்..

பல ஆண்டு இடைவெளிக்குப்பின் மீண்டும் டாய் ஸ்டோரி!! உலகத்திலேயே அதிக வசூல் செய்த அனிமேஷன் திரைப்படம்!!

ஓப்பனிங்கில இருந்து கடைசி சீன் வரை படம் படு கலக்கல்! எல்லாம் பிக்ஸாரின் கைவேலைதான்!!

ஆன்டிக்கு 18 வயசாச்சு.. காலேஜ் போகனும்.. இன்னுமா பொம்மைங்களோட விளையாடிகிட்டு இருப்பான்? காலேஜுக்கு கிளம்ப முதல் அம்மா அவனது அறையை அடுக்கச் சொல்கிறார். அவனும் தனது (அன்புக்குப் பாத்திரமான) வுடி பொம்மையை மட்டும் வெளியில் வைத்துக் கொண்டு ஏனைய பொம்மைகளை வீட்டுப் பரணில் வைப்பதற்காக அட்டைப் பெட்டியில் போட்டு வைக்கிறான். ஆனால் அந்த அட்டைப் பெட்டியுடன் ஆன்டியின் தங்கையின் பொம்மையான பார்பியும் தவறுதலாக குப்பைக்குள் போடப்படுகிறது.

மற்ற பொம்மைகளுக்கெல்லாம் அதிர்ச்சி!! ஆன்டிதான் குப்பைக்குள் போட்டிருக்கிறான். இனிமேல் அவனுக்கு விளையாட நாங்கள் தேவையில்லை..இனி எங்கள் எதிர்காலம் எங்கள் கையில்... என எண்ணி எல்லாப் பொம்மைகளும் "சன்னிவில்" எனப்படும் குழந்தைகள் காப்பகத்திற்கு செல்லும் ஏனைய பொம்மைகளோடு ஏறிக் கொள்கிறார்கள். வுடியும் அவர்களைப் பின் தொடர்ந்து வருகிறான்.

சன்னிவிலில் அவர்களைப் போலவே ஏராளமான பொம்மைகள்.. அவர்கள் ஆன்டியின் பொம்மைகளை அன்போடு (பலிக்கு கொண்டு வரும் கிடாவுக்கு கொடுப்பது போல்??) உபசரிக்கின்றன. குழந்தைகள் காப்பகமென்பதால் குழந்தைகள் அதிக நேரம் எங்களை வைத்து விளையாடுவார்கள்.. குழந்தைகளுக்கு வயசு ஏற..ஏற புதுப்புது குழந்தைகள் வருவார்கள் என ஆசைவார்த்தை காட்டுகிறார்கள் சன்னிவில் பொம்மைகள். வுடியோ "ஆன்டி வேண்டுமென்றே உங்களை குப்பையுள் தள்ள எண்ணவில்லை. உங்களை பரணில் வைக்கத் தான் தீர்மானித்தான். எல்லோரும் வாருங்கள்.. ஆன்டியிடமே திரும்பிச் செல்வோம்." என கெஞ்சுகிறான். ஆனால் மற்ற பொம்மைகள் ஒரேயடியாக மறுக்கின்றன.

விளைவு? வுடி தனியே விலகிச் செல்கிறான்...

சன்னிவில்லின் பொம்மைகளின் சுய ரூபம் தெரியும் போது ஆன்டியின் பொம்மைகள் அங்கிருந்து தப்பிக்க எடுக்கும் முயற்சிகள், அவர்களைக் காப்பாற்றும் வுடியின் போராட்டங்கள் கதையை கிளைமேக்ஸ் வரை விறுவிறுப்புக்கு பஞ்சமில்லாமல் நகர்த்துகின்றன.

நூற்றுக்கும் மேற்பட்ட பாத்திரங்கள்! காட்சிகள் ஒவ்வொன்றும் அருமை.. சாதுவாக காட்சியளிக்கும் டெடி பெயாரின் வில்லத்தனங்கள்- தமிழ் சினிமா வில்லன்கள் அதன் பக்கத்திலும் நிற்க முடியாது!
பஸ் லைட்இயரும், வுடியும் சேர்ந்து மிரட்டும் அதிரடி காட்சிகளெல்லாம் இன்னொரு ஜாக்கி-ஜெட்லி தான்!

ஆன்டி சிறுவயதில் தனது பொம்மைகளுடன் சேர்ந்து விளையாடுவது போன்ற புகைப்படம்.. செம டச்சிங்!!
ஆன்டி தனது பொம்மைகளை பொன்னியிடம் விட்டுச் செல்லும் காட்சி மறக்க முடியாதது, எத்தனை தடவை பார்த்தாலும் அலுக்காது.. அந்த 3 நிமிடக் காட்சியில் டாய் ஸ்டோரியின் முதலிரண்டு பாகங்களின் நினைவுகள் எம் மனதில் ப்ளாஷ்பேக்காய் வந்து நிழலாடும். (அப்ப டாய் ஸ்டோரி 4 எடுத்தால் அது பொன்னியுடன் தானா?)

படம் பார்த்தவுடன் எமக்கும் எமது பழைய பொம்மைகளையெல்லாம் ஒரு எட்டு பார்த்து வர வேண்டும் எனத் தோன்றும்.. ஊஹும்.. இருந்தால் தானே!!

இவை எல்லாவற்றையும் தாண்டி எம்மை வியக்க வைப்பது பிக்ஸாரின் கடின உழைப்புத் தான்! அப்பப்பா.. நினைத்தாலே வியர்த்துக் கொட்டுகிறது..
பரவாயில்லை சின்னதா ஒரு ப்ரீவியூ..

இந்த படத்தின் உழைப்புக்கு முழுமுதல் காரணம் இவர்கள் நால்வரும் தான்-

லீ அன்க்றிச் - இயக்குனர்.. சாதாரணமாக அதிரடி படங்கள் எடுத்துத் தள்ளுபவர்.. இந்த ஃபீல்டுலயும் வெளுத்து வாங்கியிருக்கிறார்.

டார்லா ஆன்டர்சன் - ப்ரொடியுசர்.. பக்ஸ் லைஃப், மொன்ஸ்டர்ஸ் இன்க், கார்ஸ் படங்களைத் தொடர்ந்து பிக்ஸாருடன் நான்காவது தடவையாக கைகோர்த்து வெற்றியை அள்ளியிருக்கிறார்.

பொபி பொடெஸ்டரா - அனிமேட்டிங் மேற்பார்வையாளர்.. கம்ப்யூட்டரிலுள்ள பல்கோணி உருவங்களுக்கு உயிர் கொடுத்து திரையில் நடமாடச் செய்வது இவர்தான்.

குய்டோ குவாரொனி - தொழில்நுட்ப மேற்பார்வை இயக்குனர்.. இவரைப் பொருத்தவரை இயக்குனரின் எல்லா வேண்டுகோளுக்கும் யெஸ் சொல்லி எல்லா அனிமேஷன் மைல்கற்களையும் தாண்டிவந்த முதல் படம் இது தானாம்.

பிக்ஸாரின் 5-Step Success..

1. ஸ்கெட்சிங்- படத்திற்காக மொத்தம் 49,516 ஸ்கெட்சஸ் வரையப்பட்டதாம். இவ்வொரு புதுக் காட்சிக்கும் பிள்ளையார் சுழி இவைதான்.

2. கலர் ஸ்கிரிப்ட்ஸ்- வரையப்பட்ட ஸ்கெட்சுக்கான முதல் வடிவமைப்பு இது. இந் நிலையில் ஒவ்வொரு ப்ரேமினதும் ஸ்டைல், ஒளியமைப்பு என்பன தீர்மானிக்கப் படும்.

3. ப்ராப்பர்டீஸ்- அனிமேஷன் உருவங்கள் முப்பரிமான(3D) வடிவமைப்பில் உருவாக்கப்படுகின்றன. இந்த நிலை முடிந்தால் மட்டுமே எந்தக் கோணத்தில் காமிராவை வைத்து எடுப்பது என தீர்மானிக்கலாம்.

4. தரவுகள்- இப்பொழுது ஒவ்வொரு பாத்திரத்திற்கும் தனிக்கவனம் செலுத்தி அதன் உருவத்தை நேர்த்தியான தரவுகளுடன் உருவாக்குவார்கள். இந்த நிலை முடிந்தால் பாத்திரங்களுக்கு அசைவுகளை கொடுக்கலாம்.

5. இறுதி- ஒளி, நிழல் எனள்பவற்றைக் கொடுத்து ப்ரேமை தத்ரூபமாக்குவார்கள். இனி ரென்டரிங்..
சாதாரணமாக ஒரு ப்ரேமை ரென்டர் செய்யவே 7 மணித்தியாலங்கள் தேவைப்படுமாம். அதுவும் இந்த மாதிரியான சிக்கலான(பாத்திரங்கள் அதிகமாக உள்ள) ப்ரேம்களுக்கு 11 மணித்தியாலங்கள் வரை தேவைப்படும்.

ரொம்ப நீளமாயிருச்சு.. ரென்டு பதிவா போட்டிருக்கலாம் தான்.. பரவாயில்லை (நான் என்ன பிக்ஸார் ரேஞ்சுக்கா கஷ்டப்பட்டேன்.. இதை எழுத?)

ரேட்டிங்ஸ் (அனிமேஷன் படம் என்பதால் கொஞ்சம் வித்தியாசமாக),

பாத்திரங்கள்- 20
அனிமேஷன்- 20
பின்னணித் தரவுகள்- 19
கதை+திரைக்கதை- 19
இயக்கம்- 19

மொத்தம்- 97% அசத்தல்!

Inception (2010)-4

2010-09-18T20:45:00.000-07:00

இன்செப்ஷனோட இறுதிக் காட்சி பற்றி உலகத்தின் எல்லா மூலை முடுக்குகளிலிருந்தும் பலவிதமான தியரிகள் சொல்லப்பட்டிருக்கின்றன. சிலபேர் காப் நிஜமான உலகத்துக்கு திரும்பி அவனது பிள்ளைகளை சந்தித்தாக சொல்கிறார்கள். சிலபேர் அதுவும் ஒரு கனவுதான் என்கிறார்கள். இன்னும் சிலபேர் படம் முழுதும் காப்போட கனவுதான் என்கிறார்கள்.

படத்தை உற்று நோக்கும் போது சாய்டோவும், காப்பும் லிம்போவிலிருந்து எழும்பிவரும் சீனைத் தொடர்ந்து வரும் எல்லாக் காட்சிகளுமே ரசிகர்களின் யூகத்துக்கும், சுய சிந்தனைக்கும் விடப்பட்டுள்ளன. குறிப்பாக அதற்குப் பின்னால் வரும் எல்லாக் காட்சிகளிலும் உரையாடல்களே இடம்பெறவில்லை. காப் தொடர்ந்தும் கனவு காண்கிறானா? க்ரூப் மெம்பர்களும், குடும்பமும் விம்பங்கள் தானா? அல்லது அவன் நிஜமாகவே வேலையை முடித்துக் கொடுத்துவிட்டு வீட்டிற்கு திரும்பியுள்ளானா? இந்தக் கேள்விகளெல்லாம் நோலனுக்குத் தான் வெளிச்சம். இருந்தாலும் ஒருசில ஆதாரங்களின் அடிப்படையில் அலசுவோம்.

* சாய்டோவால் ஒரேயொரு போன் காலைப் போட்டு காப்பின் பிரச்சனைகள் எல்லாவற்றையும் தீர்த்து வைக்க முடியுமா?

பணம் இருக்கும் கையில் தானே அதிகாரமும் இருக்கும். நம்மூரில் மட்டுமல்ல, வெளிநாட்டிலும் பணத்தைக் கொடுத்து சட்டங்களை வளைக்கலாம்.

* காப்பின் தந்தைக்கு காப் வருவது பற்றி முன்கூட்டியே அறிவிக்கப்பட்டதாக படத்தில் காட்டப்படவில்லையே.. ஆகையால் அவர் காப்பின் விம்பமாக இருக்கலாமே?

இருக்கலாம் தான். ஆனாலும் இது பிளான் பண்ணப்பட்ட ஒரு திட்டம். எனவே கண்டிப்பாக விமான நிலையத்தில் வந்திறங்கும் போது கூட்டிச் செல்வதற்காக தந்தை அழைத்திருக்கப் பட்டிருப்பார். அப்படி முன்கூட்டியே அழைத்திருக்காவிட்டாலும் விமானத்தில் போன் இருக்கிறது. அதனால் சுலபமாக கால் செய்து அழைத்திருக்கலாமே..

* படம் முழுக்க காப்பின் கனவாக இருக்கலாமே, நிஜ உலகம் இருந்தது என்பதற்கான திட்டவட்டமான ஆதாரங்கள் இல்லையே?

ஏன் இல்லை! படத்தில் சில தடவைகள் காப்பின் பம்பரம் சுற்றிவிட்ட பின் விழுந்ததே... அது மட்டுமல்லாது பழைய கனவு சீன்களில் காப் கையில் wedding band அணிந்திருப்பார். சில சீன்களில் band இருக்காது. அப்போ band இல்லாத சீன்களெல்லாம் கனவாக இருக்கவும் வாய்ப்புக்கள் உண்டு.

* காப் மாலின் டாட்டமை உபயோகப்படுத்துவதால் ஒருவேளை அவரது கணிப்புகள் பொய்யாக இருக்கலாம் அல்லவா?

அந்த டாட்டமை (பம்பரம்) உபயோகப்டுத்த தெரிந்தவர்கள் மாலும், காப்பும் தான். மால் இறந்து விட்டதால், டாட்டம் பற்றிய உண்மையான விபரங்கள் தெரிந்த காப்பும் அதைப் பயன்படுத்துகிறான். அவன் பயன்படுத்துவதால் டாட்டமின் செயல்திறன் ஒன்றும் கெட்டுப் போக போவதில்லை.

* காப் திரும்பி வரும் பொழுது அவனது குழந்தைகள், அவனது நினைவுகளில் இருந்த குழந்தைகள் அணிந்திருந்த அதே ஆடைகளைத் தானே அணிந்திருக்கிறார்கள். அப்படியானால் அவர்கள் காப்பின் விம்பங்கள் தானே?

அவர்கள் ஒரே ஆடைகளைத் தான் அணிந்திருக்கிறார்கள், ஆனால் அவர்களது செருப்புக்கள் வேறுபட்டுள்ளன. IMDB ஐ பார்த்தீர்களானால் அதில் 2 விதமாக குழந்தைகளுக்கான நடிகர்களைப் பிரித்து கூறியிருக்கிறார்கள். பிலிபியாவுக்கு 3 மற்றும் 5 வயது பிள்ளையாகவும், ஜேம்சுக்கு 20 மாத மற்றும் 3 வயது பிள்ளையாகவும் நடித்திருப்தாக குறிப்பிட்டுள்ளார்கள்.

* கடைசி சீனில் காப் சுற்றி விட்ட பம்பரம் சுற்றிக் கொண்டே இருந்ததா, அல்லது சீன் கட்டாகும் போது விழும் நிலையில் இருந்ததா?

அதை நீங்களே யூகித்துக் கொள்ள வேண்டியதுதான். தெளிவான பதில் யாரிடமும் இல்லை.வேண்டுமானால் படத்தை இன்னுமொருமுறை பாருங்கள்....

படத்தின் ஆரம்ப சீன்களில் காப் தனியாக ஹோட்டல் அறையொன்றில் உட்கார்ந்து பம்பரத்தை சுற்றிவிட்டு கையில் துப்பாக்கியோடு நிற்கிறான். பம்பரம் சுற்றிக் கொண்டே இருந்தால் துப்பாக்கியால் தன்னை சுட்டுவிட்டு கனவைக் கலைத்துவிடுவான். அந்த அளவு நிஜத்தையே நாடிக் கொண்டிருப்பது அவனது இயல்புகளில் ஒன்று.

படம் முழுக்கவும் பம்பரத்தை சுற்றிவிட்டே தீர்மானத்தை எடுத்துக் கொள்வதாக காட்டப்பட்டிருக்கிறான். எனினும் இறுதிக் காட்சியில் பம்பரத்தை சுற்றிவிட்டு தீர்வைக் கவனிக்காமல் குழந்தைகளைப் பார்க்க போய்விடுகிறான். அவன் அந்த மனநிலையில் அவன் எது ரியாலிட்டி என்றோ, இன்செப்ஷன், பிரித்தெடுப்பு பற்றியோ கணக்கெடுக்வேயில்லை. அவனுக்கு வேண்டியதெல்லாம தனது குழந்தைகளுடன் நிம்மதியான ஒரு வாழ்க்கை.
அது கனவுலகமாயிருந்தாலும் சரி, நிஜ உலகமாயிருந்தாலும் சரி...

The lesson is over. any doubts?..

தொடரும் முடியுது, கடைசியில் வாக்குப் பெட்டியிலும் இன்செப்ஷன் தான் முதலிடத்தில் இருக்கிறது... ஆஹா!!

இப்போ ரேட்டிங்ஸ்,

நடிப்பு = 18
இசை = 17
கலை+ஒளிப்பதிவு = 18
கதை+திரைக்கதை = 20
இயக்கம் = 19

மொத்தம் = 92% அசத்தல்!!

THANX TO - SCREENRANT.COM